KE TERUBAH IYA KAMPONG KAMI, DIATU MINYAK KAMI?
Udah ti ngelus ke kampong Sarawak, diatu bala kroni Taib nyau nguing ke tasik laban deka ngulih ke minyakdalam tasik. Berita ari orang dalam bisi meri penerang ti madah ke bursa saham Singapura, kena 6hb Januari tu tadi, madah ke kompeni Rimbunan Hijau disadang deka nambah ke maioh agi perengka dikena ngulih ke minyak ke dalam anak kompeni iya, iaiy nya kompeni Rimbunan Hijau Petrogas. Baka ti endang udah disadang kami telaga minyak ti udah diagih ke ngagai kompeni nya deka ngulih ke minyak ba kandang ai pabu nebing Sarawak! Penerang tu dipansut ke bala broker saham Kim Eng ti nyual saham-saham baru ngari ke Rimbunan Hijau Petrogas. Semoa saham nya berega $0.82 ke tiap iti saham.
Aset telaga minyak nama nya?
Baka ni meh chara kepala kompeni Rimbunan Hijau Group, Tiong Hew King, iya nya siko ari pemaioh kroni dagang Kepala Menteri Taib Mahmud bulih aset telaga minyak Malaysia? Ngelama tu, lalu nyentok ke diatu semoa telaga minyak menoa tu dikemata ke Petronas, ti endang nanggam sempekat enggau kompeni-kompeni minyak entarabansa.
Taja pan baka nya, ba ujong taun siti nyin kemari bisi sebengkah penerang ti madah ke Perintah udah ngemendar ke kompeni-kompeni meoa tu empu begiga ke minyak ba kandang tasik pabu ti enda dikereja kompeni-kompeni ti besai-besai. Ke tebal agi telaga minyak tasik pabu tu maioh ditemu nebing menoa sarawak, lalu tu beguna ke kuasa Kepala Menteri ti tau meri lisin dikena ngulih ke minyak dia.
Tiong tu siko ari sepuloh iko orang ti pengambis kaya di Malaysia udah bekau iya ti ngereja kayu kampong di sarawak, terima kasih soh Kepala Menteri ti mentas amat meri iya konsesi ti maioh ngelama tu. Tiong mega siko ari orang ti keterubah diberi konsesi nanam sawit bedandang besai. Ba pun minggu tu tadi sebengkah penerang bisi diayan ke pasal Tabung Pengelantang Masjid Sarawak iya nya sebengkah ari gerempong ti bisi kaul ba pengawa bekebun sawit di menoa tu, udah mindah ke aset sida ngagai Tiong. Chairman ba lembaga tu iya nya Kepala menteri, Abdul Taib Mahmud empu.
Baka ti udah disadang, diatu Taib udah ngungkop ke konsesi-konsesi ngulih ke minyak ti ddijaga ngelama tu soh bala kroni iya. Baka ni ko rakyat Sarawak deka nemu berapa peratus ari sempekat sida nya ila deka pulai ngagai Taib?!
Penyanding penemu ari menoa tu empu
Telaga minyak kandang ai pabu nya sebengkah kandang endor ti mar dijangka bisi tau ke nadai minyak, tang enti bidik tetemu ke rezab minyak dia, penguntong ari kereja dia tentu manggai ngagai bebilion-bilion ringgit. Berita ari orang dalam Sarawak Report bisi nyebut pasal siko data executive ti udah kala bekereja enggau Petronas suba udah nyadi penyanding penemu soh Rimbunan Hijau udah bekau iya ti betukar kereja ngagai kompeni Murphy Oil, sebengkah kompeni minyak US ti ngembuan pengelandik tinggi ba pengawa ngulih ke minyak ba kandang ai tasik pabu.
Murphy Oil nya sebuah kompeni ti udah bulih penguntong manggai $20 bilion dalam kandang lima taun belalau ke data-data ti tinggi rega, lalu diatu Rimbunan Hijau mega dibantu penyanding penemu ti meri penerang enggau chara belalai dikena Rimbunan Hijau ngulih ke minyak Sarawak ti pengambis iya nya.
Berengkah enggau pengawa ngulih ke minyak?
Enti Perintah Besai udah nginsor ator ba pengawa meri konsesi dikena ngereja telaga minyak kandang tasik pabu tu lalu Taib ulih ngeluar ke lisin-lisin, kitai tau nyadang menoa Sarawak deka meda ‘lumba’ ngulih ke minyak laban kroni-kroni Taib ti bukai pan deka mega ngambi ulih ‘nginsap’ minyak menoa Sarawak nyentok ke semoa telaga minyak Sarawak tu rangkai, baka sida ti udah bekeliti ke kampong-kampong. Ngena penemu enggau pengelandik ti dikembuan sida, kompeni-kompeni nya tentu ulih bekereja enggau jampat lalu sida disadang ulih kereja semina dalam kandang empat ngagai lima taun aja.
Malaysia udah enggau bebendar ngulih ke minyak menoa Sarawak. Semina 5% aja ari penguntong dagang minyak Malaysia ti dikereja kompeni Petronas ditinggal ke di menoa Sarawak, lalu penguntong ke bukai nya dibai sida ngagai Perintah Besai enggau Semenanjung Malaysia. Tu meh sempekat ti ditanggam Taib enggau bala pangan politik BN iya. Diatu, enti iya ulih ngeluar ke lisin ngulih ke minyak nebing tasik Sarawak, tentu rakyat Sarawak deka nemu berapa penyampau penguntong ti deka diagih ke iya dikena melanja pengidup rakyat iya empu? Sekali ke sida tau ngarap ke sebarang pemanah ti deka ulih sida udah Taib enggau bala kroni iya nus ke telaga-telaga minyak menoa sida?
Sekali ke rakyat Sarawak tu belaboh ngira berapa penguntong ari pemanah ti ulih sida bedudok ba kes-kes sida ti udah lenyau tanah-tanah bansa asal sida? Diayan ke ba gambar di atas nya siko anak ti mit enggau sida apai-indai iya udah dipampas semina RM250 ke tanah NCR sida ti endang bisi tumboh kayu-kayu ti berega manggai ngagai bebilion-bilion ringgit. Ba menoa Miri beratus-ratus buah rumah panjai dituntong penusah ari tegal bah ti bepun ari pengawa ngulih ke kayu ba sebelah emperan Baram. Sebengkah ari kompeni ti betanggongpengawa mai penusah nya Rimbunan Hijau.