NULUNG DIRI IYA EMPU – TAIB NGULIH KE TANAH ARI PELITA
Sarawak Report bisi tetemu ke siti penerang pasal 700 ekar tanah menoa (State land) ba Batu 13 di Kuching, ti udah kala endur sepital Rajah Brooke Memorial. (Sepital nya udah kala endur orang ti sakit lan (leprosy) berubat.) Endur nya berimbai enggau kandang Kampung Galau Semengok menoa (Semenggok National Park), lalu diatu plot tanah nya undah nyadi reta sida Taib sebilik.
Kepala Menteri nya empu bempu share ti besai ba endur nya. Ngena pangkaty iya ti nyadi Kepala Menteri, lalu pia mega nyadi chairman PELITA, iya empu udah ngemendar ke pengawa dagang kunsi ba tanah di endur nya.
Sebengkah sempekat ti betanda “CONFIDENTIAL”!
Kami bulih penerang ti madah ke tanah ba endur nya udah disukat lalu dibagi ari sepital nya, ti udah nya lalu nyadi ke ‘ibun’ perintah menoa Sarawak dalam taun 1984. Tiga taun udah nya, dalam 1987, LCDA mindah ke ‘ibun’ tanah nya, ti berimbai enggau Kampung Galau Semenggok, ngagai kompeni ladang Lanco Plantation. Kampung Galau Semenggok nya mih kampung galau ti agi tinggal ti endur ngemata ke pengelantang pendiau jelu-jelu siga enggau ke lebih agi jelu Orang Utan. Ba pengawa dagang kunsi Lanco Plantations tu, kompeni ti bempu share ti pemadu besai iya nya Mesti Bersatu Sdn. Bhd., sebengkah kompeni enggi Taib Mahmud enggau enggi menyadi iya, Arip Mahmud.
Pekara ti tau ngemalu ke ba sempekat dagang kunsi tu iya nya sempekat tu ditanda “CONFIDENTIAL” ba upis Pengerejister Tanah, laban dipelaba ke dikena ngelamun pengawa ti enda tau ditemu sapa-sapa. Sarawak Report deka nerang ke suh bala pemacha artikel tu, agi maioh amat sempekat ti ditanda “CONFIDENTIAL” ba upis Pengerejister Tanah nya, lalu ngawak ke bala pemacha empu mutus ke penemu enggau runding diri nyagam pekara tu.
Diambi enggau chara pechuma
Mensia maioh ba endur nya lama amat udah nemu sereta ngelala menoa nya endang menoa ti endur orang bumai-betupi, lalu pia mega alai orang ti berumbat sakit lan ba sepital nya bumai. Diatu menoa nya udah diambi sechara pechuma lalu udah nya diberi pia aja ngagai menyadi Taib, Arip Mahmud. Diatu mega manoa nya dikumbai orang dia “tanah enggi Arip”. Diatu mega sida udah ringat amat udah sida ti nemu penerang enggau sempekat dagang kunsi ti bekaul enggau sapa ti bempu tanah menoa nya.
Kami ulih nerang ke ngagai sida ba menoa nya pasal rekod ti ngayan ke serata menoa nya bulih 700 ekar pemesai iya, ti udah dipindah ke nama ngagai Lanco Plantations, lalu sida Taib sebilik ti bisi share dia nadai dipinta bebayar ke sebarang premium. Reti nya tanah nya diempu sida nya enggau chara pechuma. Bala pemesai ba upis Penagang Penyalah Makai Suap (MACC) patut mansik baka ni Taib ti mangku pengawa nyadi chairman LCDA enggau Kepala Menteri, ngena kuasa iya meri tanah nya nyadi ke reta sida sebilik.
Tang nadai bagi ke menoa Sarawak
Nyerumba nya, maioh amat bansa asal, kelebih agi bansa Bidayuh udah napi pemar pengidup ketegal tanah-tanah ba menoa sida digaga nyadi ke Borneo Highlands Resort endur temuai ngelantang ke ati, enggau begaga ke jalai ti lalu dipampas mimit aja, lalu nya pan, enti bisi. Diatu terang amat udah bekau bala Mahmud sebilik ngambi tanah orang di menoa nya ngena chara pechuma, tang nadai ga duit dikena mampas tanah dia taja pan setempap.
Udah LCDA ti ditemu nadai penerang pasal mampas sepital ke tanah ti diambi nya (ti ulih bendar pulai ke duit tabung dikena merubat orang sakit lan dia), tu terang amat ngayan ke orang Sarawak endang nadai kala untung sesen udah tanah sida dirampas pia aja ulih Kepala Menteri ke tanah ti dikemendar ke Rajah Brooke sebilik dikena ngintu pengelantang orang ti berubat.
Untung ulih Taib
Sebengkah pansik ti bisi dipejalai ke udah ngayan ke rega tanah ba endur nya manggai RM50,000 ke se-ekar, reti nya ba 700 ekar semua pemesai tanah nya diatu berega RM35 juta. Endur nya diatu ditaga ke endur numbuh ke ladang sawit, taja pan ditemu deka mai pengerusak ngagai kampung galau semak nya dia. Tang laban tanah nya semak ngagai nengeri Kuching, mensia maioh belaba ke tanah ba endur nya deka digaga nyadi genturung endur pengawa berumah ke lalu tau dijual.
Saleh bin Ahmad nya siku orang tin guan Kampong Mambong datai ke saritu berati ke udah bekau Taman Negara Mulu ‘dipenyati’ enggau ‘dikeliti’ sida Taib Mahmud sebilik, pekara ti sebaka mega ka nyadi ba semak menoa iya, ti tau amat mai penusah suh jelu siga ke lebih agi Orang Utan.
Udah enda kini BN nerang ke penyalah ‘makai suap’ tu?
Tumu ba minggu tu, YB Karim Hamza, siku bakih politik ti bekaul rapat enggau Kepala Menteri bisi direkod bejako madah ke nadai kebuah orang politik ngenggai ke sebarang tanah ti berega murah ti diterima ke pemeri ari orang bukai. Iya nyebut tu dikena iya besalam ke tuan iya (Taib Mahmud), taja pan enti tanah murah nya tau niki rega jemah ila, nadai kebuah sapa-sapa orang politik nya enda nyambut pemeri nya lebuh iya agi mangku pengawa?
Bedudok ari jako nya, Sarawak Report ka nanya YB Karim Hamza sereta mega bala penyukong Taib dalam BN, sekali ke Taib meri tanah State Land suh iya empu enggau pechuma tau disengkaum dalam kategori tu lalu tau disebut “peluang dagang” munyi ko iya nya? Kami ka nemu, enti orang politik nerima pemeri tanah murah baka nya sebaka enggau reti ti disebut iya nya?
Ba reti ti bukai Hamza bisi mega madah ke enti orang politik salah kena kuasa iya ti mangku pengawa nyadi orang politik dikena nambah ke pengaya diri empu, nya dikumbai ‘makai suap’. Bakani ko tu, Taib ti nyadi chairman LCDA ngulih ke plot tanah ti besar amat nya enggau pechuma mai reti Taib udah ‘makai suap’ nunda ko penemu YB Hamza, tau ke iya agi ka ngiga chara besalam bukai ngelamun tuan iya nya?
Kami mega ka ninga ke saut ari bala kaban politik BN bekaul enggau penemu ti bechampur ke pengawa politik enggau penggau dagang nya siti pemutus ari Kepala Menteri dikena nambah ke puku ke iya empu ari tanah nya? Ambi ke banding, enti iya udah mutus ke penemu ngererak rumah sepital nya, lalu nukar guna tanah nyadi ke pengawa pemansang dia? Pemutus penemu ti baka nya, lalu ukai penuai umur tanah ke udah dia mih ti nentu ke peninggi rega tanah nya ti diambi iya pechuma ke guna sida sebilik!
Lubok mas PELITA
Tuju enggau juluk ati PELITA baka ti dipun ke Kepala Menteri dalam taun 1981, dikena ngemansang ke tanah di Sarawak ti tau ‘nguntung ke menoa Sarawak’. Amat! Pemansang endang udah enggau benung nyadi dini-dini endur. Tang diatu, mar amat kitai deka ngelantang ke ati nyintak angin beresi ti datai ari kampung puang.
Taja pan baka nya, orang luar ti nengkila ke menoa kitai tu nemu amat pasal pengeraja bebillion-billion ringgit ari kayu kampung enggau ladang sawit baka penemu ti dichiri ke PELITA tang penguntung ngagai rakyat mimit amat. Tau disebut ke nadai sekali meri penguntung ke rakyat. Kitai pan ulih meda, nama kebuah Kepala Menteri suah amat ngupah iya empu enggau sida sebilik ngena tanah ti diambi pechuma.
Ni mih maya Kertas Putih (White Paper) patut digaga dikena ngelai semoa bansa ‘dagang kunsi (dagang belalai?)’ ngena lekajako “CONFIDENTIAL” baka ti disimpan dalam upis Pengerejister Tanah awak ke ditemu mensia maioh? Sekali ke YB Hamza enggau bala kroni BN iya diatu bekerauh minta Kertas Putih nya dikena mampul mulut, tau ke ngemunas ke bala pengkritik politik baka kami dalam Sarawak Report tu.