RAZIAH – ORANG TI NGAYAN KE PENGERINGAT ATI KENA JEL
Kami ba Sarawak Report diatu ulih ngamat ke, bala orang ti kena tutup ketegal ngayan ke pengeringat diri ngagai kompeni menyadi Kepala Menteri ianya Quality Concrete, ti betebang ke kayu kampung atas tanah bansa asal (NCR) sida udah dilepas ke, udah bekau maioh agi raban sida bukai ngayan ke diri ringat ba luar balai polis di Simunjan. Bala orang nya udah dituduh nunu kem kompeni kayu, tang kompeni nadai ngayan ke penerang (bukti) dikena bedawa bala orang nya.
Peda berita ti silik ditu:
Ba berita ti apin lama dalam Sarawak Report kitai udah tekenyit ati ninga Quality Concrete udah nguji majak ke bala Iban nyerah ke 3,035 hektar tanah NCR sida di Sebangan enggau penyampau pampas semina RM250 (USD80) ke sepintu ruang bilik.
Kompeni nya, ti endur menyadi Kepala Menteri, Raziah Mahmud ti nyadi siko ari pengarah dia, ditemu deka betebang ke kayu kampung ti disadang berega bejuta-juta dollar atas tanah NCR nya. Tang bala Iban di menoa nya enggai nyerah ke kayu dia enggau tanah NCR sida, laban sida madah ke kayu kampung di endur deka digalau ke serak tuboh sida kerebak dudi.
Diatu, siko tuai ti ngulu ke raban orang ti ngayan ke pengeringat diri mantah pengawa kompeni udah ditutup dalam rumah jel ketegal udah dipetenah ke bisi bekau angus ti nyadi ba kem kayu enggi kompeni Quality Concrete kena hari Satu. Nadai bukti ti tegap diayan ke, tang 10 iko bala Iban udah ditangkap lalu dilepas ke baru, lalu 3 iko da agi bedau dilepas ke. Sida nya, Numpang Suntai, siko orang ti udah ngetu bekereja ba kompeni Shell; Nicholas Mujah, siko orang ti bekereja enggau SADIA, ianya gerempung NGO ti nyukong pengelantang pendiau raban Dayak, enggau Tuai Rumah Sadon anak Ason.
Nadai bukti penerang ti tegap dikena ngelaban bala Iban nya, tang juluk ati politik ti enda manah bisi sereta terang. Suntai enggau Mujah lama udah nyaup bala Iban di endur ba kempen sida ngelaban pengawa kompeni QC nya. Seduai iya mega nyukong bala orang di menoa niri ke empang jalai (blockade) kena nagang lori kayu kampung tama enggau enda beradat ngagai tanah sida. Penusah angus ti didawa bisi nyadi ba kem kompeni nya endang nadai nyadi lalu terang amat seduai tu ditan ke polis ketegal ti ngayan ke bantah sida. Seduai iya nurun ngagai balai Polis Simunjan laban ti nerima kangau ari tuai polis dia, DSP Choo Yin Kok (taja pan lumor telefon 082-803779, enggau lumor telefon binching iya 019-8583016, enda diayan ke).
Nya alai, sapa orang jai ti bendar?
Nadai bukti penerang ti nyata pasal api ti bisi didawa nyadi. Ari ketegal lesen kayu Quality Concrete ti nyau deka abis timpuh ba bulan baru, dawa pasal api nya dikena kompeni ngenegap ke agi dikena sida ngulih ke pampas insuran. Nambah ke nya, kompeni nya udah kala ditagang upis Kampung (Forest Department) ngereja sebarang pengawa betebang ke kayu kampung di sebrang endur, lalu Sarawak Reports bisi bulih surat penerang (dokumen) bekaul enggau tagang nya, tang nyangka mih penanggol nya udah nadai agi.
Enggau tu, Sarawak Reports enggau sekeda gerempung ti enda begaji (NGO) di menoa tu empu, enggau di menoa luar deka nanya: bepelasar ke penyalah nama bala orang ti ngenan ke tanah NCR sida nya kena tangkap lalu ditan ke?
Salah guna kuasa
Raziah Mahmud, siko ari bala pengarah Quality Concrete nya, endang nyadi ke tulang belakang pengawa salah tu (skandal). Iya tu menyadi Kepala Menteri Sarawak, Abdul Taib Mahmud, lalu bisi ngembuan pengaya baka sida menyadi ti bukai-bukai, nengah menyadi iya ti endang bekuasa atas semoa kemendar (permit). Raziah endang diasuh nyadi ke siko ari pengarah kompeni ari Sibu nya, dempu sida Tiang sebilik. Kebuah pia, laban nengah Raziah, kompeni nya tau dikemendar ke ngereja pengawa ngulih ke kayu kampung.
Ari chara dagang kunsi ti mai Raziah seduai Taib ti baka nya, seduai menyadi nya tentu deka bulih penguntung ti besai amat. Bala “orang dalam” industry kayu-ramu ti bisi meri penerang ngagai Sarawak Report madah ke chara-chara system nya dikena, lalu kami ba Sarawak Report tu belaba ke Kepala Menteri enggau menyadi iya nya deka bulih untung bejuta-juta ringgit ari pengawa ti betebang ke kayu kampung dia, lalu udah nya deka numbuh ke ladang sawit.
Pekara-pekara ti nyau majak balat nyadi di Sarawak
Pengawa salah (skandal) ti nyadi di Sebangan nya nyadi ke tanda Taib enggau sida sebilik udah lenyau timbang runding dikena sida nerumpak menoa Sarawak. Ba kes tu, Taib enggau Raziah endang nyengenda amat ditemu ngereja pengawa salah nya, ngenchuri utai ti ukai enggi sida. Lalu chara seduai iya nyeliah ke diri, seduai iya ngena kuasa polis nangkap lalu nan ke sapa-sapa orang ti ngerara penyalah ‘makai suap’.
Tu endang ukai sekali-dua orang diri sebilik ti bekuasa di menoa Sarawak udah ngereja penyalah tu, lalu rekod penyalah sida iya nyau majak terang-seterang dipeda dunya. Tu baru seminggu udah bekau kita ti meda Sibu ti ditunong penusah reba rarat ti besai udah nyadi. Lalu ba penusah nya James Masing udah bejako madah ke penusah nya nyadi ari pengawa ngulih ke kayu kampung enggau salah, ti endang ari asuh perintah Taib – kelai ti ngayan ke genggam orang tuai nya nyau gerah-segerah
Bah! Sapa mih ti kereja ngena atur ti salah ba undang-undang? Surat penerang tu dikirum ke Pengarah ari upis Kampung (Forest Department) ti ngasuh Quality Concrete nanggoh ke pengawa sida di Sebangan nyentuk ngagai maia penyarut entara kompeni nya enggau orang di menoa nya nyau ngetu, tang surat tagang upis nya enda dikibuh ke. Nambah ke nya reprt asal ari Sarawak Report pasal penyalah pengawa Raziah di Sebangan udah disadung ke serata dunya, lalu ditimbal mensia maioh nengah internet. Berita penanggol ti nuntong bala Iban di Sebangan mega udah ngujong ke sebengkah kempen diatur di menoa Amerika dikena mandang ke penyinu sida ngagai Iban Sebangan lalu pia mega ngayan ke bantah sida ngagai perintah Taib Mahmud ti ‘bemata adat’ nya.
Lemai tu tadi, Christina Suntai ti diau di Florida, iya nya menyadi Numpang, udah berandau enggau Sarawak Report ti madah ke Numpang enggau bala pangan iya ti enda bedosa agi mengkang ditan dalam jel. “Menyadi aku (Numpang) nadai kala ngereja pengawa jai, iya tu orang ti manah ati, lalu semoa utai ti dikereja iya dalam idup iya manah-manah magang”, ko Christina besebana. Uji ti jako ti munyi nya dipansut ke dikena ngenang ke pasal semoa tuai-tuai menoa Sarawak!
Nambah ke nya, Perintah Besai, ti endang bekuasa atas polis nyengkaum polis di menoa Sarawak tu patut ngena kuasa penuh iya ngerara penanggol salah guna kuasa enggau penyalah ‘makai suap’. Neju ke tuai-tuai bala orang ti benama ditan dalam jel, ti nadai penyalah / enda bedosa ketegal ti ngayan ke bantah ba kes ti baka tu, tau nambah ke agi dawa mensia maioh ngelaban Taib.