RUMAH TAIB TI BEREGA TINGGI DI LONDON ENDUR SIDA SEBILIK BELALAI

Nadai sapa-sapa nyangka tu sebuah ari rumah ti ba alamat ti pemadu manah di menoa London. Hampshire House tu siti rumah ti besai sereta manah beseberai enggau Hyde Park ti tebilang di dunya, semina datai tikau ari Marble Arch enggau Oxford Street. Rumah tu bisi sekeda ari apartment ti pemadu besai lalu pia mega nyadi ke rumah pengetu enggi Kepala Menteri Abdul Taib Mahmud.

Apartment ba tingkat baruh sekali enggi sida Taib sebilik beungkus RM43 juta (8.5 juta Pound Sterling) lalu pemesai iya bulih 4,000 kaki pesegi. Kitai nemu pemanah rumah tu enti kitai nyau bebanding ke pemanah rumah-rumah bukai berimbai enggau rumah tu ti nyau ka sebangka rega. Bala sida Taib sebilik suah ngenduh-ngenduh enda lama ba rumah tu, lalu pia mega dipelaba ke sida beempu tau ke ulih tama ngagai lebih ari siti flat ba rumah tu, laban ari chara sida ke betubuh maioh sekali maya ti ngusung endur nya.

Ngetu enda lama dalam pejalai iya nangga Haji!

Kami ulih ngayan ke sekeda pekara ti enda tau diayan ke dalam media-media (TV, radio, suratkhabar) ti taluk ke perintah BN di Sarawak empu kena hari Dua tu tadi. Lebuh maia Taib ti angkat ari Kuching ka nangga Haji ke Mekah dia pemindah iya endang ditusoi enggau silik ulih media-media nya tadi. Ari ti terebai terus ke Mekah, Kepala Menteri nya limpang lalu ngenduh ba rumah iya ti berega ba Hampshire House di London dulu. Reti nya, penerebai iya jauh amat limpang beribu-ribu batu ari tuju asal iya tadi. Pemutus iya ti ke UK patut iya ngemandak ke agi pejalai iya beberapa hari baka ti ditusoi-tusoi bala media.

Kami ba Sarawak Report tetemu ke siti kebuah iya limpang enda lama, laban iya ka ngulu pengerami sida sebilik betemu bebala maioh sebedau iya nangga Haji nya. Sari sebedau Kepala Menteri empu datai di endur nya, bala orang ti kereja ba Hampshire House endang udah besedia sereta bekemas ke rumah nya enggau naka ulih. Kami bisi ga dipadahka pasal pengawa begempuru dia laban dikena ngemanah ke agi kaul entara sida, ti ngelama tu bisi tebunsa mimit ketegal penyarut diri sebilik. Kami ulih belaba ke Kepala Menteri nguji ngempuru ke sida sebilik ti kala charut laban ngasai ke pengusut sukong bala pengundi, ti ditambah ke pengawa bepilih besai pan deka diatur sebarang maia.

Baka nya mega Onn Mahmud, menyadi Taib ti kala bekunsi dagang enggau iya, tang udah nya beserara tegal bisi charut, pan bisi ga dikangau ke datai begempuru dia. Onn kala bambi ke bejuta-juta dollar asil dagang kayu ramu ti udah nya charut enggau perintah menoa Jepun, lama amat nadai bejako enggau sida sebilik betaun-taun, lalu kala mega nyerara diri ari sida sebilik. Penemu ti begempuru tu awak ke sida tau minta ampun ari pangan diri sebedai nurun ke Mekah minta ampun ari Allah. Sida sebilik mega arap ke chara minta ampun baka tau ditunda bala pengundi sida di Sarawak.

Bisi dipeda – Sulaiman Taib

Siti mega ari kebuah Kepala Menteri mutus ke penemu iya nemuai ke Hyde Park rantu jalai iya ka ke Mekah iya nya betemu enggau anak iya. Dulu ari penatai iya empu di endur nya, pemberita Sarawak Report tepeda lalu ngambar Sulaiman ti lama udah ‘lenyau enda temu penunga’. Sulaiman datai dia nepan kereta Mercedes ti bepemandu. Sarawak Report mega belaba ke Sulaiman endang diau dia ngelama tu.

Sulaiman Taib lama amat udah enda ayan ba orang maioh di Malaysia, taja pan iya benung mangku pengawa nyadi kaban parlimen, ti mega ngujong ke iya dikenang lalu ngasuh ati orang maioh irau. Tang, sida Taib sebilik enggai mengkang enggai meri penerang ke pengelenyau Sulaiman. Iya lama amat enda ngabas bala pengundi iya, lalu lama mega enda enggau baum ba parlimen. Tu ngujong ke Sulaiman dikutuk orang maioh laban melakang ke pengawa iya tang semina nerima gaji menteri iya pechuma.

Enggau tu Sarawak Report berasai temegah enggau gaga ati madah ke suh mensia maioh iya nya anak Kepala Menteri nya agi idup, dipelaba ke grai nyamai lalu ngeluar ke gaji menteri iya nengah bank-bank di menoa London. Rahman endang suah dipeda dalam enggau luar London beberapa bulan ti udah, lalu iya dipelaba ke berubat ba menoa nya ti ditemu ngembuan bala lutor ti landik, ti nadai ditemu di Sarawak

Tukang gambar kami kena serang orang ti kereja ke Taib

Taja pan baka nya, terang amat, ba penudok sida ti tinggi di menoa Sarawak, sida Taib sebilik enda rindu ke berita pasal penunga pejalai sida, enggau berita pasal reta pengeraja sida. Sereta Rahman Taib tepeda ke tukang gambar kami, iya lalu madah ngagai bala orang ti bekereja ke iya dalam rumah nya, ti lalu pansut deka ngelala tukang gambar kami nya.

Enda lama udah nya deriba kereta iya lalu pansut ari kereta lalu nyamah tukang gambar kami nya lebuh iya majak be ambi ke gambar-gambar bala penumpang indu ti pansut ari rumah iya ti lalu tama ke dalam kereta iya. Deriba nya tadi nangkap tukang gambar kami nya ba rekong lalu ngasuh tukang gambar madam ke semua gambar ti di dalam kamera tukang gambar kami nya, tang seninjik amat tukang gambar kami nya diselamat ke bala orang ti benung ngemata ke penyarut nya tadi. Diatu pekara nya benung dipansik polis London ngena kes jamah. Pengasar ti baka tu, taja pan suah amat disalam ke laban enggai ke ditemu orang maioh di Sarawak, endang ditagang amat-amat di UK.

Kena lemai hari Dua, siko da tukang gambar kami belaba ke diri bisi tepeda Kepala Menteri nya tama ke dalam rumah nya ngati ke diri, apin tentu lama udah bilun Singapore Airlines ti ditepan iya sangkai di padang bilun Heathrow. Sarawak Report berasai gaga enti bisi orang ti bisi ngembuan gambar-gambar Kepala Menteri nya tama tau ke keluar ari Hampshire House, 12 Hyde Park Place, London W2, dikirum ke ngagai kami ngambi ke ulih diayan ke ditu.

Sapa bempu flat ti beungkos bejuta-juta pound nya?

Sarawak Report deka nemu enggau silik, sapa ti bendar bempu flat ba tingkat baruh ti suah amat endur sida Taib sebilik ngenduh. Flat nya mega dipelaba ke diuan Sulaiman. Nitih ke penerang ari upis Pengerejister Tanah menoa London, flat nya enggi Sultan Abdul Halim Mu-Adzam, siku ari bakih Taib di Malaysia, ti mega udah meri Onn pangkat Datuk ari kaul dagang.

Kaul dua iti keluarga tu, lalu ti sama ngembuah reta di London ngujong ke orang maioh deka nemu enggau silik. Kepala Menteri, taja pan begaji ke ngumbang nya sengelama 30 taun, endang enda patut ulih meli reta ti baka nya, tang iya ke nyengala ditemu, agi maioh reta sida sebilik. Taib pan udah direkod maya iya mansut ke jaku “aku bisi ke semua utai, lebih ari ti ulih dipelanja ke aku.”

Kepala menteri nya mega ditemu nguji besalam ke diri ti bisi ngemu maioh kompeni enggau reta ngena nama orang bukai ti udah besetuju nyerah pulai semua utai nya nengah janji semaya ba maia enggau timpoh ti diletak. Sarawak report mega udah bisi tetemu ke penerang sekeda kes ti bekaul enggau chara iya ngengkah ke nama orang bukai atas share-share iya. Ba sebengkah penyarut pasal rumah-rumah batu di menoa United States ti diserah ke Samling ngagai sida Taib, nya mega udah ngayan ke siti ari pemaioh reta Taib.

Nya alai, rumah ba Hampshire House di London nya dipelaba ke endang enggi Taib, tang berejister atas nama bakih iya sultan nya. Enti ukai enggi Taib tang enggi Sultan, nama kebuah Sultan ngemendar ke sida Taib ngaga rumah baka enggi sida empu? Penerang pasal hak bempu reta tu ari Kepala Menteri empu enggau reta-reta ti bukai ti ngelui ari ulih dirunding ke kitai, endang dianti kami.