Menteri Betanam-betupi BN, Mong Dagang, ti udah ngemaduka duit bantu RM300 sebulan ke siku orang ti timpang pendiau, lalu pia mega Presiden PRS, James Masing, ti nyukung pengawa Mong, sama-sama udah ditemu nerima duit suap bejuta-juta ringgit!
Dua iku menteri nya sama-sama ngulihka duit ari tanah-tanah NCR ari sitak seduai empu!
Pengamu dua iku menteri nya udah ngujungka seduai ti bekaul rat enggau perintah rejim Taib Mahmud nyau tebantai laban disempulang penyumbung seduai nya.
Mai mua malu, bala pemesai opis perintah di Sri Aman, madah ngagai Frusis Lebi, sida nerima surat perintah ari Mong Dagang empu ngasuh sida ngetuka bantu, ketegal Frusis udah ditemu Mong bisi nyukung parti penyakal rambau pengawa ngundi tu tadi!
Sida nyuaka iya sesalin surat ti merintah sida ngasuh ngetu “meri semua macham bantu ari perintah” ngagai Frusis, taja pan Mong Dagang empu endang ngelala Frusis nya siku orang ti bisi penimpang dalam pendiau.
Bala orang ti bisi macha isi surat nya enda tentu arapka isi ti ditulis dalam surat nya, laban sida nganti Mong empu bebula surat nya lalu ngumbai surat nya ditempa ngapa. Tang enda mukai-mukai Mong majak ngering diri madahka iya endang nulis surat nya! Iya berupai bendar deka ngukum sapa-sapa orang ti enda nyukung iya enggau BN, enggau enda ngira penimpang pendiau orang nya! Enda lama udah nya James Masing, siku menteri dalam opis Taib lalu pia mega presiden PRS iya nya sebengkah parti ti ngumbai diri ngeringka raban Dayak di Sarawak, bisi didinga bejaku madahka sukung iya ngagai ‘ukum ti dipejalaika’ Mong Dagang!
James Masing bisi didinga mantah sereta nangkan Frusis Lebi, “jangan lawan taukey” [anang ngelaban taukey]!
Diatu kami ulih ngayanka pansik kami ti ngamatka Mong Dagang bisi megai share ti besai dalam kompeni Noble Rewards Sdn Bhd ti kenu ku iya dikena bejalaika pengawa pemansang tanah ba sitak ti diarika iya. Orang bukai ti bisi bekaul enggau Mong dalam kompeni nya nyengkaum Bawang Anak Deru (bini Mong); Henry Masing (menyadi James Masing) enggau Leyta Kupa (bini Wilson Ugak, ti nyadi setiausaha peribadi ke James Masing).
Enggau asil pansik nya Sarawak Report deka nemu nama kuasa iya nerima duit suap ari ngereja pengawa pemansang tanah dalam sitak iya?
Pengari rakyat ti mega siku lawyer ari PKR, See Chee How, nerangka, lebih 50% bala orang di menua nya ngenggaika pengawa muka kebun dandang besai sawit di menua nya, lalu mayuh mega orang enggai nyambut pampas RM1,000 ke sebuah ruang bilik ti kala diberi bala kaban politik ti pencuri tanah nya.
Tang taja pan projek nya dibantah, projek nya dipajakka Menteri Pemansang Tanah James Masing enggau YB ari menua nya empu, Mong Dagang, laban kenu ko seduai, projek nya tau mai penguntung ke bala orang di menua nya.
Dua iku menteri nya ti ngumbai diri deka ngukum penyalah siku orang ti timpang pendiau ketegal ti meri sukung ngagai pengari parti penyakal maya bepilihbesai tu kemari enggau chara ngetuka tulung perintah RM300, endang kala udah ngerampas tanah-tanah NCR ti berega bepuluh-juta ringgit di pelilih menua nya.
Berani amat dua iku Datuk nya meri jaku tangkan ngagai bala orang di Sri Aman ti udah dirampas seduai tanah sepemesai 70,000 ekar, lalu nanya sida “sapa bagi kitai tu tuan”?
Diatu Sarawak Report belabuh masang pending nganti kes tu dibai ngagai mahkamah. Ba atur pechara ti bendar bala orang politik ti nyadi penchuri nya deka ditinggang ukum ti berat nyengkaum mayar pulai semua rega tanah bejuta-juta ringgit pulai ngagai orang asal ti kena rampas sida tanah.