Ba berapa hari ti udah tu kami udah ngayanka mayuh bengkah perepasan makai suap ti dikena ngisi kuchik bala Datuk ari parti Barisan Nasional. Pengawa makai suap nya mayuh agi dikereja bala YB BN atas rakyat ti diarika sida ba sitak sida empu.
Jabu udah bulih lalu nugungka pengaya ke iya empu ba mayuh bengkah kebun sawit dandang besai ti diengkahka iya dikemataka sida sebilik, mayuh agi ari tanah NCR ti diambi iya ari bala rakyat ari sitak iya empu di menua Betong. Siti ari kompeni ti endur Jabu nugungka perepasan iya nya ba Durafarm Sdn Bhd ti dikemataka anak petunggal iya, Robert Lawson Chuat Entering, lalu diatu kompeni nya udah diambi WTK. Robert Lawson Chuat nya siku kaban ADUN ari Bukit Saban.
Ocarina Development nya sebengkah agi kompeni enggi siku kroni kayu kampung ti bekaul enggau Abdul Taib Mahmud, Wong Kie Nai, ti bempu kompeni WTK. Sekali agi, siku ari ‘orang au tuan’ Taib bulih untung udah ti ngeruga pendiau raban bansa Dayak!
YB Robert Lawson Chuat nya siku pengarah dalam kompeni KACC Construction, sebengkah kompeni ti udah diayanka kami, ti kala nerima kontrak datai ke setengah billion ringgit ari perintah Sarawak ba taun-taun ke udah. Bala pemegai share dalam kompeni nya nyengkaum anak indu Jabu, Jennifer enggau bala kaban belayan kaban parlimen Fadillah Yusof.
Sapa orang kala nerangka ngagai bala YB BN nya, bejalaika pengawa dagang tauka malut diri enggau kontrak perintah sekumbang ti nyadi menteri tauka pengari rakyat nya sebengkah pengawa ti salah ti bechanggah kepentingan?
Durayield bisi bulih konsesyen kayu kampung ti besai bendar ti benama Sarako, lalu sapa orang ti bempu kompeni nya? Sekali agi, pansik kami ngayanka orang ti bempu kompeni nya ukai orang bukai tang anak petunggal Jabu, YB Robert Lawson Chuat Entering enggau menyadi iya Richard Mulok Entering, ti nyadi tuai rumah.
Sebengkah agi kompeni ti benama Jarenang Sdn Bhd ti bisi sama megai share dia. Deka nemu sapa bala orang ti bempu kompeni Jarenang Sdn Bhd nya? Share ti besai dalam kompeni nya dipegai anak enggau bini Jabu empu sama enggau Bustari Yusof, iya nya menyadi Fadillah Ysuof! Sida Bustari Yusof nya endang bakih dagang kunsi Jabu! Ngelama tu Jabu endang tebilang meri jaku lalau ngagai bala pengundi ti sitak Layar enggau Betong, ngasuh orang bejaga-jaga ari orang ari parti penyakal. Kelimpah ari nangkan bala rakyat iya mega suah didinga balat bendar nganu bala rakyat. Tu siti ari chara Jabu enggau sida sebilik mujur bekerugaka sereta berampaska tanah NCR rakyat iya empu lalu udah nya diasuh iya kereja SALCRA. Taja pan Jabu nyadi pengerusi ba SALCRA, tang nadai kala ninga dividen nya nyengala ngasuh bala rakyat iya empu idup lantang senang baka iya empu. Datai ke diatu mega, SALCRA nadai ditemu ngeluarka repot taun ba penguntung gerempung nya, baka ti patut dikereja gerempung-gerempung bukai.
Di menua Limbang bisi tanah-tanah NCR udah diserahka ngagai kompeni Utahol Sdn Bhd ti dikuasa Gerald Rentap Jabu. Diatu kepala PKR Sarawak, Baru Bian benung ngarika rakyat di menua nya bechara ke tanah-tanah NCR nya.
Kebun dandang besai sawit di endur nya diserahka ngagai Gerald Rentap Jabu, lalu sekali agi diserahka ngagai kompeni WTK. Pengawa dagang Jabu enggau bakih politik iya, sida Fadillah Yusof sebilik udah nyerahka kontrak perintah ngagai kompeni Javel Engineering. Baka nya mega, Billy Abit Joo ti udah bulih kontrak ke kompeni iya, Wargana Consortium, ti belandikka kompeni nya sebengkah kompeni dagang kunsi (koperasi), tang untung ditengali iya kediri.