Kepala Menteri Sarawak nya siku ari orang di Sarawak ti tebilang bendar pechaya sereta seruran ngereja pengawa bemanang enggau penemu petang, taja pan iya endang ngumbai diri orang Islam, sebengkah jalai pengarap ti nagang pengawa bemanang baka nya. Ba sebelah laman rumah iya di Demak Jaya, mayuh bendar burung chelum inggap lalu nya tau bendar ngasuh temuai takut ngelawa rumah iya.
Ba begian baruh rumah iya, mayuh bendar perengka bemanang disimpan lalu semua utai nya dikena Taib ngangauka sukung ari roh ti alus ari dunya pemetang dikena iya ngalahka semua munsuh politik iya.
Nya alai, iya mega nemu reti enti siku burung mit terebai datai ari kampong puang lalu tama ngagai rumah panjai lalu inggap sereta ningaka mensia ti benung betunga mua berandau enggau pangan diri. Utai ti baka tu bisi nyadi lebuh kepala parti penyakal PKR YB Baru Bian benung bejaku ba mua orang mayuh di sebuah rumah panjai ba minggu nyin kemari.
Ba cherita kami ke sekali tu kami ngeluarka baru cherita ti diambi kami ari laman blog enggi YB Baru Bian lebuh maya bala orang di menua Sarawak ngiga lalau enggau tenggau milih sapa orang ti tau nyadika tuai sida kejang pengawa bepilihbesai ti deka diatur enda lama agi.
Baru Bian di Uma Sambob: Enda mukai-mukai, siku burung mit terebai tama ke rumah panjai …
Uma Sambob, Long Semutut nya sebuah rumah panjai ti penudi ditiki YB Baru Bian dalam penemuai iya ngagai pelilih menua Ulu Rejang kena 28 – 30 haribulan Tujuh 2012 tu tadi. Siku ari orang di menua nya, niang Joseph Lenjau, kala udah diarika YB Baru bechara ba sebengkah kes dalam court ngelaban 6 buah kompeni enggau Perintah Menua Sarawak berapa taun ti udah lalu.
Sereta YB Baru belabuh bejaku ngenang pasal niang Joseph Lenjau, dia enda mukai-mukai siku burung mit terebai tama ke rumah lalu nuju YB Baru. Burung mit nya terebai ari atas pala YB Baru, lalu udah nya ngelingi iya ti benung bejaku, lalu udah nya burung nya inggap betul-betul atas tikai nunga YB Baru.
Burung nya enda kebut-kebut, baka ti mendingka Baru Bian bejaku, nyentuk ke ngagai maya iya tembu bejaku ba mua orang mayuh. Udah nya siku indu ari bala orang dia lalu angkat ngambi burung nya. Bala orang ti sama meda utai nya pan sama alit ati meda pendiau burung nya jinak bendar baka ti nejuka diri ditangkap indu ti nangkap iya nya. Indu nya lalu ngerendut burung nya serayaka ai mata iya labuh nerutu kuyu, lalu mai burung nya tama ke bilik. Enda lama udah nya indu nya tadi lalu pansut ari bilik lalu ngelepaska burung nya ke tanju. Bala orang mayuh ti meratika pekara nya alit sereta sinu bendar ati.
Ba bala orang di menua nya, penatai burung mit nya meri kelai ti nyelai bendar.
Nitihka penemu bala orang di menua nya burung nya terebai tama ke rumah laban mai pesan pasal pemerinsa pengidup semua macham utai idup enggau utai tumbuh nyengkaum raban mensia ti kena keruga pendiau dikereja kompeni ti ngulihka kayu batang enggau kompeni ti muka kebun dandang besai di menua nya.
Nitihka penemu sida mega, burung nya mai pesan madahka pengelurus nyau udah datai ba sida lalu ba sida ti mengkang ngulihka pengelurus, sida iya deka bulih pemenang.
Besai bendar meh reti pesan ti dibai burung mit ti terebai tama ke rumah nya.