Bala orang ti bempu tanah NCR di pelilih menua Sampadi udah diajar pasal nadai utai tau dikarapka enti udah terengkah ba jari bala orang BN, diatu udah nyadi sebengkah penyarut entara orang kanan dalam BN ti benung berebutka tanah NCR ti dirampas sida.

Ba bulan Julai tu tadi bisi 12 iku bala orang ari Kampung Gerunggang udah mutuska runding diri deka nyual sekeda ari tanah NCR sida ngagai siku orang ti bisi ati deka meli tanah ari sida.

Orang ti bisi ati deka meli tanah nya siku menteri BN. Aaron Dagang nya siku MP ari parti PRS ke sitak Kanowit, ti deka bediri minta pilih ngetanka kerusi iya ba pengawa bepilihbesai ti deka datai tu ila.

YB Aaron Dagang seruran ingatka gaji menteri ti diterima iya enda kala chukup lalu nya ngujungka iya ngulihka tanah-tanah NCR ari bala pengundi ngena rega ti jauh murah ti udah nya deka meri penguntung ke iya empu jemah ila.

Ba jaku semaya ti ditanggam iya enggau bala orang kampung, iya deka meli 77 ekar tanah NCR ti enda jauh ari Kuching, ba rega RM231,000, ti udah nya deka dikemansangka iya nyadi tanah kebun dandang besai sawit. Nitihka rega baka ti dikangauka Onn Mahmud, menyadi lelaki Taib ti deka nyual tanah kebun iya ba rega RM31,000 ke seeker, tanah ti dibeli Aaron Dagang nya tentu deka berega bepuluh kali lipat mayuh agi.

Enggau nya, Aaron Dagang dipelabaka tau tepantup ati udah iya ti pechaya ke bala orang kampung ti udah suah milih pengari BN ti udah nya enda belampung ati ngelepaska tanah temuda sida ba rega ti murah bendar.

Diperansang rega ti manah lalu udah sida ningaka jaku lalau ari Opis Tanah, dia orang di menua nya udah mansutka belanja ti mayuh dikena sida nyukat tanah NCR sida, lalu sida mega diterangka tanah sida nya ditanda nyadika Lot 155 dalam Blok 8 di pelilih menua Sampadi.

Tang sereta pengawa jual-beli tanah NCR ba Lot 155 baru deka belabuh, dia sida sama tekenyit laban tetemuka penerang ti madahka Lot 155 nya nadai agi dalam rekod!

Udah sida bejalaika mayuh pansik, lalu udah beberapa minggu udah nya pansut siti penerang ti madahka tanah ti deka dijual-beli nya udah ‘ditukar’. Nitihka penerang dalam Opis Pengerejista Tanah, lot 155 udah nyadi sebagi ari Lot 154.Diatu Lot 154 ti besai agi nya udah diberi Opis Tanah ngagai sebengkah kompeni dalam taun 2010.

Reti nya bala orang kampung ukai orang ti bempu tanah ti deka dijual sida nya. Tambah mega sida nadai kala dipadahka tanah nya udah diubah, pia mega sida nadai ditagang mansutka belanja dikena nyukat tanah sida ti udah berubah nya!

Enggau nya, sapa meh orang ti besai bendar kuasa ulih ngulihka tanah nya ari Opis Pengerejista Tanah enggau enda ibuh madahka pasal sebarang utai ngagai orang ti bempu tanah NCR nya?

Ba sebengkah pansik dalam Opis Pengerejista Tanah bisi ngayanka dalam taun 2010 Lot 154 (diatu udah dipegulaika enggau Lot 154) udah dijual nyadika ‘tanah perintah menua’ ngagai kompeni Saradu Plantation dikena nanam pisang. Dulu ari tu, kompeni nya diberi nama Emerald Discovery:

Saradu Plantation suah udah bulih untung ari pengawa jual-beli tanah nengah Opis Tanah, lalu nitihka sebengkah salin ti tiris ari Opis Pengerejista Tanah, udah ngujungka kami ulih ngayanka penerang sapa meh ti ke bendar bulih untung ari Opis Menteri Perambu Pengawa enggau Pengeraja Asal sepengelama 30 taun ke udah.
Ba sapa-sapa orang ti agi bedau tentu nemu sapa ti bekuasa dalam Saradu Plantation, aram kitai mansik penerang dalam surat ti bisi diterima kami tu.

Menyadi indu Taib, iya nya Raziah Mahmud, nyadika siku orang ti tau digiga bekaul enggau sebarang pengawa dalam kompeni Saradu nya. Ba kes bekaul enggau Lot 154 Blok 8 di pelilih menua Sampadi nya nadai nunjukka Raziah kala mayar sebarang ungkus belanja dikena iya bulih tanah nya.

Raziah Mahmud diatu berat bendar ke pengeraja anak indu iya, taja pan chara seduai menyanak nya ngulihka pengeraja enggau chara ngeruga pengidup orang bansa asal di Kampung Gerunggang.
Enggau pengawa bepilihbesai ti deka diatur enda lama agi, udah tentu bala pengundi BN deka pandai agi milih sapa pengari ti patut dipilih sida ari bala sida Taib Mahmud sebilik?

Tambah mega Taib Mahmud udah salahguna kuasa iya dikena iya ngemendarka pengawa ngerampas tanah NCR orang bansa asal sepeneka ati iya. Enti enda baka nya, nama kebuah iya enggai enda mangku kelalu mayuh pengawa kelimpah ari ti nyadi Kepala Menteri, tang iya mega mangku pengawa Menteri Perambu Pengawa enggau Pengeraja Asal, enggau pengawa Menteri Pekara Belanja, tiga bengkah penuduk ti ngasuh iya bekuasa penuh atas tanah-tanah di Sarawak?

Ba siku orang ti udah tuai umur, mangku tiga iti batang pengawa mar bendar diterima akal lalu tau dikumbai lebih ari patut.

Tang nitihka pemayuh pansik kami, kami ulih ngamatka penerang ti dalam pengelama 30 taun Taib Mahmud udah megai kuasa ti lebih ari patut dikena iya ngerampas tanah, lalu diatu udah lebih ari setengah rampa kampung di menua Sarawak udah diberi iya ngagai sida sebilik, bala penyukung politik iya enggau bala kroni dagang iya dikena iya ngenegapka penuduk iya dalam perintah.

Bala orang di Kampung Gerunggang nya diatu nyadika orang ti udah tasah kena keruga pengawa ngerampas tanah nya.

Diatu mayuh jaku tanya dipansutka, baka ni menyadi indu Taib, Raziah Mahmud mujur bendar bulih tanah temuda enggi orang asal baka ti diayanka ba surat penerang dalam Opis Pengerejista Tanah nya.Bisi sekeda orang betanya nyangka nya Raziah Mahmud nya bisi kaul enggau menteri Awang Tengah Ali Hassan ti mantu iya ngulihka tanah nengah Opis Menteri Pengeraja Asal ti dikuasa iya. Awang Tengah mega udah dipansutka kami nyadika siku menteri pengerampas tanah. Ditu, kami minta semua orang patut nulak semua menteri BN ti rangka nya, lalu nukar sida enggau perintah ti baru nitihka atur undang-undang ti betul.

Diatu MP Aaron Dagang udah ringat bendar udah iya nemu juluk ati diri ti deka bgulihka tanah nya puntan laban pengawa Raziah Mahmud bulih tanah dulu ari iya nengah Opis Tanah!
Diatu mega Aaron udah ngiga lawyer dikena ngarika iya ngulihka tanah ba Lot 155 ngambika disirap keluar ari lesen kompeni saradu Plantation
Sekumbang raban orang dalam BN charut enggau diri sama diri pasal sebidang tanah nya, kes nya mega udah mai pengirau ati ngagai orang di Kampung Gerunggang.
Diatu kami bisi dipadahka laluh ari tanah 170 hektar dalam Lot 154 ba Blok 8 sitak Sampadi nya benung dikereja bala orang ti endang bempu tanah NCR nya, lalu nyentuk ke kami mega bisi dipadahka sida Raziah sebilik deka ngerusak semua utai tanam di endur nya lalu deka diganti enggau kebun pisang.

Bala orang di Sampadi diatu udah ditangkan, pia mega bala orang di Kanowit, ti endur Aaron Dagang ti udah dipilih sida dulu suba enggau nadai disakal sapa-sapa ari parti penyakal. Enti bala orang ba dua bengkah menua nya enda ngambi sebatang tindak ba bepilihbesai tu ila, tanah NCR sida ila tentu deka lenyau diambi orang.

Dua bengkah menua nya (Sampadi enggau Kanowit) diatu udah bisi pampang parti penyakal ti tegap lalu sida minta ubah patut dipejalaika, sebedau orang bansa asal ba dua bengkah menua nya majak lenyau tanah temuda dikeruga sida Taib Mahmud sebilik.

Kitai sama nemu Taib Mahmud enggau sida sebilik nya endang tebilang nipu, tang bala pengundi ti udah mutus ati patut ngelala lalu angkat ngelaban pengawa nipu nya.