Gelumbang angin pandak Radio Free Sarawak (RFS) bisi napi beberapa bengkah penanggul ti enda ditemu pun penatai ba minggu-minggu ti udah, ti ngujungka bala peninga bekirumka email enggau betelefon betanyaka kebuah ngagai stesyen iya. Bala pengeluar program RFS madahka pengirau ati mensia mayuh ti nyau majak nambah nya nunjukka pemayuh bala peninga RFS mega udah betambah, kelebih agi ari raban bansa Iban enggau Melayu di menua pesisir Sarawak.
Bala peninga ari Betong, Bintulu, Baram, Miri enggau pelilih menua ti bukai, madahkan mayuh bengkah penanggul ti ditapi sida, tang mayuh agi ari bala sida nya serebanaka jam program nya ditaburka udah dikurangka setengah jam ari dua jam baka ti ngelama tu.
Ba hari ti bukai bala peninga ba menua bukai serebanaka sida endang enda bulih gelumbang program RFS nya.
Program nya udah dituntung penanggul kenyau ari tengan bulan Sebelas tu tadi. Utai ti ngasuh ati irau agi nya beduduk ari penemu sekeda orang ti ngumbai gelumbang radio nya udah dikeruga sepengudah bala peninga ti bisi didinga mansutka jaku bantah ti ditujuka ngagai bala orang politik enggau sekeda menteri kanan dalam BN di menua Sarawak.
Kenyau ari beberapa minggu ti udah, bisi penanggul ba program ti ditaburka ari RFS ketegal hari ti enda manah tauka ketegal kabut ba sekeda kandang menua. Tang bisi mega bala peninga madahka penanggul ba gelumbang SW 15420kHz ti beserak enggau gelumbang jaku India enggau China ti enda patut bekunsika gelumbang ti sebaka enggau gelumbang ti diagihka ngagai Radio Free Sarawak.
Pengirau ati bala peninga enggau bala pengeluar program RFS ti dituntung penanggul nya dipelabaka dikereja raban perintah nya pelaba ti bisi pelasar. Bala YB ari BN udah suah didinga serebana ke program ti ditaburka nengah RFS lalu ba sekeda kes bisi sekeda ari bala YB udah madahka deka minta opis ti bisi kuasa ngena undang-undang madamka semua program RFS.
Terang bendar juluk ati bala menteri BN belabuh bisi pengirau laban sida mar bendar deka nimbal mayuh macham jaku bantah ari mensia mayuh bekaul enggau rekod pengawa perintah BN sekumbang 50 taun udah bekuasa, ke lebih agi bekaul enggau pengelantang bala orang di menua-menua pesisir. Stesyen RFS endang sebengkah stesyen ti naburka program enggau berita ti ditusui bala peninga pasal penanggul ti nuntung pendiau enggau pengidup sida, lalu baka ni semaya-semaya bala tuai BN ti suah enda dikamatka.
Pekara ti balat agi dipansutka nengah RFS nya pasal pengirau ati bala orang pasal tanah ti kena rampas enggau program pengentap pendiau ke bepuluh ribu iku raban bansa asal ketegal kena keruga projek SCORE. Pengirau ati mensia mayuh ti baka tu endang nadai ditusui ba sebarang suratberita ti dijual sebelah pasar enggau nengeri besai, ti udah diberi lisin nyual berita lalu dikemataka perintah BN.
Tang, sekumbang bala orang perintah ti enda rindu ninga sada enggau kangau bala rakyat sida empu enggau atur sepeneka berandau, bala peninga ngasaika pengawa ngulihka berita ari RFS nya enda patut ditagang.
Bala peninga ti bukai madahka program ari RFS nya udah muka mata enggau runding sida ba penanggul ti nuntung raban bansa sida empu, ti endang ditapi semua raban bansa ti nguan menua peisisir selampur menua Sarawak.
Belabuh ari hari Minggu tu kemari, sekali agi program RFS ulih didingaka baru di serata menua Sarawak nengah slot pukul 6-8 lemai. Siku ari bala peninga, Kassim ak. Aji (ari sitak parlimen Bukit Begunan di Sri Aman) madahka dalam jaku randau dalam telefon, RFS udah manah baka selama.
Diatu program RFS udah pulai manah baka selama taja pan stesyen radio nya enggau raban orang ti bekereja ba stesyen nya mengkang napi bantah ari perintah ti enggai bebatak-asur penemu, taja pan radio nya diagihka 2 jam ninting hari bepelasarka atur sepeneka bekunsika penerang.
Bala pengeluar RFS bisi bulih penerang ti madahka perintah menua suah udah dipadahka ngambika madamka program RFS di serata menua Malaysia nyerumba pengawa perintah ti nyediaka diri napi pengawa bepilihbesai. Bala orang politik dipelaba ngena semua macham chara dikena sida ngelimpangka perati mensia mayuh ari RFS
Diatu menua Malaysia enda tau enda nemu sereta ngelala, enti iya deka ngachau tauka ngeruga gelumbang radio ti dikena RFS, pengawa nya deka ditekanka ngelanggar undang-undang penabur entarabansa.
Stesyen RFS udah diagihka siti gelumbang lalu sebarang chara dikena nagang arus gelumbang nya dkira ngelanggar atur Gerempung Pengerembai Penerang enggau Berita Entarabansa ti nguasa semua gelumbang radio di serata dunya.
Manah agi perintah Barisan Nasional belabuh belajar lalu nerima sebarang jaku bantah ti manah-manah sebaka enggau ti dikereja di menua beperintahka adat demokrasi ti bukai, ti endur jaku bantah ti manah tentu deka ngeluarka perintah ti manah mega.