Menteri Besai Malaysia, Najib Tun Razak sehari tu udah bebula berita ti dipansutka kami ti madahka iya kena serang penyakit strok ti enda raya.
Enggau chara bebuti iya madahka repot berita kami udu ngerichau lalu minta rakyat Malaysia enda agi macha lalu arapka sebarang berita ti dikerembaika sebarang penyadung berita ti enda belisin tauka nadai pemendar ari rejim perintah iya.
“Anang kita arapka laman-laman blog nya” ku pinta iya, balalaika diri empu endang siku ari orang ti ngembuan sebuah laman blog.
Enggau nya Menteri Besai udah nunjukka diri udah meretika semua utai ti direpot dalam laman blog ti enda belisin nya lalu besedia mansutka sebarang isu bebula lebuh datai ba maya ti patut endur iya ngereja nya, ulih tauka enda iya ngubah batang randau ke bukai ti begunaka iya mansutka buah runding diri?
Ba minggu-minggu ti udah rakyat Malaysia udah ditejuka betanya sereta berasai ringat ketegal Najib ti mengkang enda engkeretik ke semua jaku tuduh ngelaban iya.
Menteri Besai nya udah dituduh dalam kes beleman enggau kes bunuh, bekaul enggau meli senyata enggau chara makai suap.
Nama kebuah Menteri Besai enda ngena peluang nya ngamatka pengerai iya ti manah nya dikena iya bebula semua jaku tuduh orang ti ngelaban iya?
Agi mega, enti iya endang amat tau temegah ke semua penerang pasal iya nya udah sengaja dikemesaika orang ti ngelaban iya nya, nama kebuah iya enda ngeluarka surat prosiding mahkamah dikena nimbal semua jaku tuduh bala orang nya?
Siku pengarang berita internet bisi madahka raban pengarang berita sida kala nguji ngulihka saut ari Najib enggau Rosmah bekaul enggau semua tuduh nya, tang sida enda kala mujur.
Menteri Besai ti lama enda engkeretik nya udah nimbal enggau chara ti nyelai. Dua minggu tu udah Opis Menteri Pengelikun iya udah madahka sida udah meli share dalam kompeni Astacanggih Sdn Bhd, ti enggi Deepak Jaikishan ti udah bebendar mansutka jaku tuduh ngelaban iya, enggau rega RM30 juta.
Opis Menteri nya mega madahka sida deka meli sebidang tapak 200 ekar enggi Kepala Wanita UMNO Raja Ropiah enggau rega RM150 juta ngena duit tabung pemayar chukai, ti endur Deepak udah ngaga dagang ti kompleks, lalu udah nya ngujungka Deepak rugi nanggung duit suap ti diberi iya ngaga sida Najib sebilik.
Enggau chara Deepak ti ngelama tu udah suah nuduh Najib, nya alai Najib enda tau enda bebula penerang nya ngena chara mayar iya chara belalai ti dikumbai iya betul agi.
Agi mega tu kali kedua tuduh atas iya bekaul enggau kes bunuh ti enda tau enda dilamun iya, bebanding enggau chara iya ngabas pengamat semua tuduh nya dalam mahkamah.
Ke terubah suba, SD ti ditulis siku bekas pemesai polis, ti udah kala bekereja ke perunding peribadi Menteri Besai dalam sebengkah pengawa meli kapal selam Peranchis dalam taun 2008, udah nusui enggau silik pasal kaul leman, kes bunuh enggau penyalah makai suap ti udah nya ngujungka kes nabanka lalu munuh indu Mongolia Altantuya Shaaribuu.
P I Bala Subramaniam udah madahka diri nemu pasal pemarai Altantuya enggau kaul iya enggau Abdul Razak Baginda, ti madahka Altantuya nya endang indu simpan Najib, maya nya Najib agi nyadi Menteri Pengelikun. Altantuya udah dikumbai ngachau Razak Baginda laban seruran betanyaka komisyen pemujur meli kapal selam Peranchis nya.
Ari ti bebulaka semua penerang nya, Najib udah nyuap Bala ngambika ngubah SD iya nyadi SD ke dua.
Sehari nangkanka nya Bala udah ngubah semua jaku tuduh iya dalam SD ti ke terubah, lalu iya lenyau nadai temu penunga. Kira setaun udah nya iya ayan baru di menua UK lalu iya bejaku madahka diri agi bepegai ba SD iya ti ke terubah suba, ti endur iya madahka diri kena emba ngambi ngubah SD nya lalu iya madahka diri bedau nerima pampas ti penuh baka ti kala disemayaka ngagai iya lalu udah nya iya tepejal ngelalaika diri di menua India.
Najib napi semua jaku tuduh nya … tang enggau chara ti enda engkeretik!
Diatu dua taun udah nya, kejang Malaysia napi bepilihbesai, Deepak pansut lalu ngamatka cherita dalam SD terubah enggi Bala, madahka diri kena kangauka Rosmah ngambika nangkan Bala ngubah SD terubah nya lalu mampas Bala ti ngelalaika diri nya.
Deepak udah meri saut ba mayuh jaku randau lalu mega bisi ngeluarka sebuah manuskrip penuh bekaul enggau semua jaku tuduh iya nya. Tang, Najib enggau Rosmah mengkang enda engkeretik.
Lebuh mayuh agi jaku tuduh dipansutka, besereta enggau surat-surat resit, nyengkau penerang ti nunjukka Deepak kala meli barang kemas berega mar beratus juta ringgit ke Rosmah maya sida agi ngaga kaul, dua iku pemesai menua melaki bini nya mengkang enda engkeretik.
Tang, Opis Menteri Pengelikun enggau enda mukai-mukai udah ditemu ngisi duit ti mayuh ngagai share kompeni enggi Deepak!
Nya alai kami gaga bendar ati laban Menteri Besai nya ulih madahka kami enggau bendar pasal pengerai iya; tang nama meh guna enti pendiau enggau ulah iya ti suba udah kamah laban pengawa iya?
Semua rakyat Malaysia mengkang nganti iya bebula kaul iya ti nyelai, ti ngayanka iya empu enggau bini bebalut enggau cherita skandal seks, salah guna kuasa, beleman, munuh, makai suap enggau entelah pengidup iya ti bukai!
Datai ke sehari tu, semua jaku tuduh ngelaban Najib nya lalu enda padam-padam. Ba sehari tu mega Deepak besemaya deka mansutka semilan iti agi aum media “dikena iya mansutka isi berita bekaul enggau SD Bala ti udah diubah, pengawa meli tanah Raja Ropiah, enggau pengawa dagang iya enggau sida Najib sebilik”.
Ni pemayuh ulih diseliahka nuan, Najib – nya aja chara nuan tau madamka semua jaku tuduh nya!