Sarawak Report udah nerima jaku bebula penerang ari BBC ti madahka sida kala nerima sereta ngamatka sebarang gambar tauka penerang betulis ti dikeluarka Ben Fogle pasal penemuai iya ke Sarawak bedau lama tu udah.
Penemuai Ben nya ti dipelanja sebuah kompeni PR ari menua UK, Hills balfour, endang dibayar Perintah Menua Sarawak lalu mayuh agi gambar enggau artikel nya digaga beduduk ba Sarawak.
Ben Fogle direpotka udah nemuai sama enggau raban ‘juru kamera BBC’, tang dipelabaka raban sida nya bala juru kamera ti kala udah bekereja enggau BBC suba, ti ngereja pengawa sida ngatika diri diatu. Reti nya sida nya nadai agi bekaul enggau BBC.
Sebengkah raban pengeluar filem ari menua Sarawak empu mega bisi dibai ngaga filem nya, ti ngumbai diri 4CG, tauka nama penuh sida For Common Good.
Perengka-perengka promosyen sida nya ditegapka agi sechara online pasal kontrak kompeni sida ti bisi ngaitka nama ‘BBC’.
Penemu nya udah ditegapka nengah jaku tesau ari Hills Balfour, ti udah ngamatka bala juru kamera ‘ti tebilang’ nya ngiring penemuai Fogle sepemanjai iya ke Malaysia ari menua UK.
‘Bala orang ari BBC’ tauka semina raban juru kamera ti ngatika diri ti bekereja ngaga filem ke Lembaga Pelancongan?
Tang nya nyadika tanggungpengawa anak indu Jacob Sagan ti benama Sharon, ti udah ngemesaika kaul iya enggau BBC.
Sharon Sagan udah chakah bendar becherita dalam blog iya empu pasal kaul iya enggau raban ari BBC lalu iya mega ngaku BBC nya udah dipasukka iya dalam rintai nama pelanggan iya. Dikena iya ngenegapka ambu iya nya, iya mega udah ngengkahka gambar Ben Fogle sama enggau lambang kompeni BBC!
Tang diatu kitai udah enda bidik laban blog Sharon Sagan nya udah ditutup iya sepengudah kami nuliska repot kami dulu ari tu bekaul enggau pengawa ti dikereja iya pasal penemuai Ben Fogle nya.
Kimpin pasal penemuai Ben Fogle ke Sarawak nya dikerembaika nengah laman Twitter enggau video-video promosyen sereta penerang-penerang ti bukai udah narit ari mensia mayuh ti endang nemu pasal penanggul rampa menua enggau penanggul ti nuntung raban bansa ketegal dikeruga penyalah makai suap ti dikereja Kepala Menteri Sarawak Abdul Taib Mahmud.
Dikereja enggau chara ti landik raban Hills Balfour ari pun nyentuk ke pengambis, jaku pesan ari Ben Fogle nya madahka iya udah nemuai ngagai kampung bungas di menua Sarawak ti bedau kala dikeruga seraya meda jelu mayas!
Ke bendar iya kaul ‘produk eko-temuai’ Ben enggau anak jelu mayas ti endur indai enggau apai jelu nya udah parai laban diburu ari kampung ketegal dikeruga pengawa ngulihka kayu batang enggau muka kebun dandang besai dikereja Taib Mahmud.
Hills Balfour udah ngemesaika kimpin sida nya nengah laman blog dikena ngangkatka pasal rampa menua Sarawak ti agi mayuh kampung bungas, ngena asil tulis bala blogger ti landik ngarang, tang sida udah nadai sekali-kali nyebut pasal pengerusak rampa menua ketegal pengawa ngulihka kayu batang enggau bekebun bedandang besai sawit.
Kompeni PR nya udah ngangauka bala blogger ke nengeri London ngambika betemu mua enggau Ben Fogle empu lalu meda filem ti dilakon iya, lalu lebih ari nya udah besemaya deka meri perais ngagai sapa-sapa blogger ti bidik. Sida ti bidik nya deka dipelanja nemuai ke menua Sarawak.
Chara ti baka nya nyau mulaika pengingat kitai ngagai penemuai-penemuai ti diatur Josh Trevino ke gerempung APCO enggau kompeni FBC Media ti nguji ngaga publisiti ti manah pasal menua Malaysia ti dibayar bejuta-juta ringgit ari Najib enggau Taib Mahmud.
Bala orang ari raban ‘Mummy bloggers’ ti chukup landik nulis dalam blog benung chakah begigaka belanja enggau chara ngayanka iklan nengah laman-laman web sida udah meri timbal ti manah. Tang nadai siku ari bala sida nya kala nemuai ke menua Sarawak lalu meratika enggau mata diri empu pasal utai idup dalam babas enggau bansa ikan enggau burung ti majak pupus, lalu mega enggau raban bansa orang asal ti majak lenyau kuasa ba tanah sida empu.
Tang kelimpah ari nya, kompeni PR nya udah ngarapka timbal Tweeter ti manah-manah pasal pemerani Ben Fogle begambar enggau jelu mayas.
Gambar-gambar nya diambi Sharon, iya nya anak MP sitak Baram Jacob Sagan, ti nerima mayuh konsesyen nebang kayu belian bejuta-juta ringgit. 