Bala penyukung ti taluk ngagai Taib Mahmud udah sekali agi madah ngagai Sarawak Report pasal isi ti silik dalam pekat dikena ngerampas kuasa politik di menua Sarawak, ti dikena sida mechat Kepala Menteri sepengudah bepilihbesai tembu dipejalaika ila.
Perening sida nya ditegapka agi ti madahka gerempung parti-parti dalam BN ti benung charut entara diri sama diri nya senutuk bendar enggau maya bala tuai parti sida ti berebutka ‘pengeraja asal tanah’ Menua baka ti dikenang Najib Razak.
Kuasa enggau penuduk Kepala Menteri nya ti benung dipegai Taib Mahmud dalam pengelama 30 taun tu, diatu nyau nyadika aruh ati Menteri Perambu Pengawa Kedua iya, Awang Tengah.
Penyarut dalam BN empu nya mega beserumba enggau penyarut dalam BN perintah besai di KL, ti endur Sapit Menteri Besai, Muhyiddin Yassin, mega ditusui nyadika tuai pengatur pekat dikena iya ngulihka kuasa ke iya empu sepengudah bepilihbesai tu ila.
“Nukar Taib Mahmud enggau Awang Tengah nya sebaka reti enggau pengawa kitai ngelepaska diri ari nyawa jelu jagu lalu tama ngagai nyawa jelu rimau”, pia ku pemeri penerang, ti mega madahka ketegal bala penyepu wisel rindu agi meri penerang ngagai Sarawak Report laban surat-suratberita ti dikemataka BN di Sarawak lalu mengkang takut nuliska repot ti amat pasal penendu sukung bala kaban dalam BN.
Atur dikena nguasa bala chalun BN ba ikas perintah besai?
Bala penyukung ti taluk ngagai Taib Mahmud madahka raban pengatur pekat ti udah asa ati nya udah niriska penerang ti chukup bekaul enggau utai ti benung nyadi.
Sida iya takut bendar laban enda bepeluang betemu enggau Taib Mahmud awakka madahka ngagai iya, ti deka mantaika rintai nama chalun BN ba bepilihbesai tu ila ti penuh enggau bala penyukung resia ti taluk ngagai Awang Tengah.
Penerang ti kala udah ditusui nengah blog tu udah ngerintaika nama bala penyukung ke Awang Tengah ari raban ADUN BN, nyengkaum Speaker DUN BN, Awang Mohd Asfia Awang Nassar.
Awang Tengah udah besemaya deka meri penuduk enggau pangkat Gabenor Sarawak ngagai Awang Asfia enti iya empu mujur nyadi Kepala Menteri Sarawak ti baru.
Ba renggat kedua dalam pekat nya, Awang Tengah enggau raban penyukung iya benung ngatur lalu ngerintaika bala chalun sida ti tentu menang, lalu meri rintai nama sida nya ngagai Taib Mahmud enggau Najib Razak.
Beberapa iku MP Sarawak mega udah dibai tama ke dalam pekat nya. Sida nya deka disukung bala pemesai dalam BN, tang sida ti taluk ke Taib Mahmud deka dikeruga enggau repot pengawa sida ti enda manah. Lalu bala penyukung Awang Tengah deka diayanka nyadi chalun ti tampak agi ba sitak bepilihbesai sida empu.
Bala orang ti berupai agi ba pekat tu iya nya kaban DUN Sebuyau, Julaihi Narawi; Sekretari Politik ke Kepala Menteri, Abdullah Saidol; Chalun DUN Batang Lupar ti dikerinduka Awang Tengah, Awang Jamuddin Awang Kon; Sekretari Eksekutif ke PBB, Awang Bujang Awang Antek; Chalun DUN Sibuti ti mega dikerinduka Awang Tengah, Pandi Suhaili enggau Kepala ‘Raban Nembiak’ PBB ti beperangai baka soldadu penyelawai, Radin Kadri, ti dipelanja Awang Tengah.
Raban sida tu suah betemu lalu baum ba Sarawak Golf Club tauka ba rumah meligai baru enggi Awang Tengah, ti didirika iya ngena upah penuduk iya ti nyadi Menteri Perambu Pengawa Kedua
Nitihka penerang ari kem Awang Tengah, Kepala Sekretari Politik ke Kepala Menteri, Abdullah Saidol betemu enggau Kepala Sekretari ke Taib Mahmud, Mustapha Han nyau deka ninting hari dalam opis Kepala Menteri ketegal ngatur pekat sida nya. Mustapha Han mega nyadika siku orang ti pemadu beguna ba Taib Mahmud ti udah dibai masuk kem Awang Tengah.
Rintai nama!
Sarawak Report mega bisi bulih penerang ari dalam BN empu pasal rintai nama bala penyukung Awang Tengah enggau agih sitak bepilihbesai sida ti disadang tau menang ila.
Rintai nama nya nunjukka baka ni semua kerusi bala chalun Dayak dalam BN ti benung balat diperebutka kem-kem dalam parti ti sama ti benung charut enggau pangan diri nya.
Kepala PRS ti benung dituntung penanggul nya, ‘Menteri Pengerampas Tanah’ James Masing dipadahka udah masuk nyadi kaban dalam kem Awang Tengah. Parti-parti dalam gerempung BN, baka SUPP enggau SPDP mega dituntung penyarut dalam parti sida empu.
Pengawa melanja kimpin dalam pekat nya diatur nengah menyadi Awang Tengah empu ti tau dikarapka iya, iya nya Awang Damit.
Ketegal ti nadai siku orang ti kempang deka ngereja nya dikena ngulihka duit ngena budaya korup BN, Awang Tengah dipeda bejalaika pengawa nya ngena duit ti mayuh lalu mega ngena kuasa penuduk iya ti nyadi Menteri Perambu Pengawa ti ngujungka iya ulih matahka pengering siku tuai ti kala pechayaka iya, Kepala Menteri empu.
Rintai nama chalun ti udah tiris ari bala orang ti bekaul semak ngagai raban pengatur pekat nya udah ngujungka Kepala Menteri nya tampak bendar ngagai keruga ti tau bendar ngemediska iya.
Pengawa bala orang ti kala dikarapka Taib
Kami dalam Sarawak Report diterangka pasal Awang Tengah enggau Awang Mohd Asfia udah nguasa beberapa iku orang ti pemadu beguna ke Taib Mahmud ti endur seduai iya udah nurunka kuasa nya ngagai raban pengatur pekat milih bala chalun sida.
Sarawak Report mega bisi bulih rintai bala orang ti gawa perintah ti benung dikena Awang Tengah ngenataika repot pemanah pengawa bala chalun bepilihbesai, lalu nulak beberapa iku MP enggau bala orang ti enda sepenemu enggau iya.
Taib Mahmud enggau Najib Razak deka bepanggai bendar ba semua repot tu maya milih lalu netapka nama chalun BN kejang bepilihbesai deka diatur enda lama agi.
Siku ari orang ti kereja perintah nya Pengarah ba Opis KEMAS Sarawak, Abang Rabaee Abang Muhi. Opis KEMAS nya nyadika pun penatai beberapa bengkah projek perintah, ti dikena BN meli sukung ari bala pengundi.
Pekara ti korup agi iya nya baka ni agih belanja nya diberi ke projek-projek ti enda terang asil iya. Tu meri peluang dikena ngeluarka duit dikena bebelika sukung bala pengundi sida.
Sekeda penyepu wisel madahka Awang Tengah enggau penyukung iya deka ngena penuduk enggau kuasa Abang Rabaee nyentukka bepilihbesai udah tembu ila. Pekara tu ditegapka agi ngena sepuchuk surat ti ditulis Abdullah Saidol ti ditujuka ngagai Kepala Pengarah KEMAS di Putrajaya, ti enda ditemu Taib Mahmud, ti madahka Kepala Menteri Taib Mahmud nya agi begunaka Abang Rabaee, taja iya patut betukar endur gawa ke menua Sabah, nyentuk ngagai tembu PRU13 tu ila.
Nitihka penerang bala penyepu wisel mega, Abang Rabaee bisi disuap ngena sebuah lisin muka kebun dandang besai sawit ari ADUN sitak Sebuyau, Julaihi Narawi, ketegal ti udah meri sukung ti manah ngagai pekat konspirasyen nya. Dua iku agi orang ti sama megai lisin sama enngau iya, iya nya orang kereja perintah di Sebuyau, Jemat Chee enggau Othman Jamil.
Enggau penerang-penerang ti baka tu, Sarawak Report minta bala orang ti dikenang ditu bebulaka jaku tuduh lalu mega ngamatka penerang ti madahka nadai tanah bansa asal udah dikeruga ADUN sitak Sebuyau dikena iya mampas bala kroni BN enggau mega bala pengatur pekat konspirasyen ba sitak nya.
Seraban orang ti kereja perintah nya deka dipinta nuliska repot pemanah pengawa ngagai Majlis Tertinggi BN enggau Taib Mahmud bekaul enggau sebarang chalun ti tampak agi nama lalu nengkeman agi dipasukka dalam rintai nama nya. Bala sida nya, Abang Daud Abang Jolkipli; Hasli Drahman; Khusairi Salleh enggau Dayang Norlida Abang Ahmad, ti endur semua sida nya bekereja ba Opis Pemansang Menua Pesisir.
Pengawa resia sida nya dikena nentuka semua MP dalam rintai nama chalun nya meri penaluk enggau sukung ti penuh ngagai Awang Tengah ti enda tau ditemu Kepala Menteri.
Awang Tengah mega udah ngasuh Abdullah Saidol nentuka semua pegawai KEMAS Sarawak ba 31 buah kerusi parlimen meri iya repot penuh sida dulu, sebedau iya nyerahka repot-repot sida ngagai Pengarah KEMAS Sarawak lalu udah nya ngagai Menteri Besai enggau Kepala Menteri.
KEMAS nya nyadika salur belanja BN dikena ngagihka projek dikena sida ngulihka sukung ba pengawa bepilihbesai, lalu enggau chara bacha ngelansa semua repot nya Awang Tengah beniat deka ngemesaika nama bala penyukung iya nyadika sebengkah raban orang ti pemadu manah dikena ngulihka undi.
Bala pemeri penerang ti madahka ngagai kami, sida ulih ngamatka pengawa bala penyukung Awang Tengah deka ngulihka repot ti manah-manah.
Aum belalai
Sarawak Report mega bisi nerima penerang ti madahka opis KEMAS Sarawak ti nyukung Awang Tengah udah baum belalai ba Dewan Pustaka Negeri Sarawak endur bejuraika baka ni sida deka ngatur propaganda ti nunjukka Awang Tengah nya siku “Pemimpin Berjiwa Rakya” lalu nyadika iya siku orang ti patut bendar nyadi Kepala Menteri nukar Abdul Taib Mahmud ila.
Nyerumba nya, penyarut entara chalun baru enggau sida ti benung mangku pengawa dalam perintah majak nyadi dalam BN. Ambi ke banding, di Sebuyau ba minggu tu tadi, chalun BN ti benung mangku pengawa, MP Rohani Abdul Karim nadai dikangauka enggau ngulu pengerami BN ti betuaika Speaker DUN Awang Mohd Asfia dikena ngulihka sukung ke chalun baru ke kerusi Batang Lupar.
Tuju pengerami nya dikena ngangkatka nama chalun ti dikerinduka Awang Tengah, iya nya Awang Jamuddin Awang Kon, ti sama bisi datai maya nya. Bala penyukung ti taluk ke Taib Mahmud udah besebana madahka leka jaku enggau repot pasal pengerami nya endang enda senutuk lalu betuju dikena ngelaban chalun ti benung mangku pengawa ba sitak parlimen dia.
Penerang-penerang ti munyi nya semina nyereminka MP Rohani ti enda dibai ngagai pengerami nya lebuh 34 pampang PBB Batang Lupar dipeda datai ngemenuhka dewan nya. Enggau nya pansut berita ti nyelai ti madahka penyerakup dalam BN nya semakin dituntung penanggul!
Bala munsuh politik Awang Tengah irau bendar ati ketegal tu meh perambu iya lalu iya deka bejalaika perambu iya tu dikena numbangka Taib Mahmud ti udah arap bendar ke iya. Pengawa iya ti nangkanka tu iya nya nulak Abang Zohari Tun Openg, ti nyadi sapit ke Taib Mahmud dalam PBB ti pemadu lama bekereja enggau iya lalu mega tampak agi nama ba BN di KL.
Dalam kem-kem ti enda sepenemu dalam BN, penyarut sida nya dipeda bakla sebengkah penyarut nyentuk ke titik darah ti penudi; entara idup enggau mati.
Nama utai digalau bala orang BN Sarawak ti udu rangka ke rakyat mayuh sida? Dini endur kuasa-kuasa bala rakyat ti dirintaika sida senutuk enggau batang pengawa bala orang ti charut nya?
Lebuh maya bala orang enggau parti dalam BN majak charut, tu meh maya rakyat mayuh milih lalu ngundi orang bukai ti ukai ari BN. Tu meh maya bala orang ari menua pesisir nentuka undi sida enda dibali tauka dichuri bala orang kereja perintah ti dibeli BN ti rangka sereta korup ti benung chakah berumpakka pengeraja menua ari rakyat Sarawak empu.
Bala agen bepilihbesai enggau bala pengereja pengawa sida ti nipu nya patut bempu tanggungpengawa ba bala pengundi lalu patut diambi gambar ti udah nya kes sida patut direpotka ngagai bala penerit adat ti bekuasa.