Bala rakyat menua Sarawak siatu benung meratika penyumbung bala anak indu Tun Abdul Rahman, baka ti udah diayanka dalam video ti direkod gerempung NGO Global Witness pasal pengawa sida ti berampaska tanah-tanah NCR enggi orang bansa asal di Sarawak.
Dua iku ari anak indu Tun Abdul Rahman nya, ti udah mujur bulih tanah NCR nengah kompeni sida ari petunggal sida Ketua Menteri, udah nerangka dalam filem ti direkod belalai baka ni sida ngenang pasal kaul sida enggau bala orang ti “seranta mensena” di menua Sarawak.
“Nemu nuan, sida nya merinsa amat lalu lebuh bisi pemesai-pemesai datai ngusung sida, sida meda bala pemesai nya baka bala raja lalu sida seruran ngarapka sebarang utai ti deka diberi”,
ku Fatimah Abdul Rahman ti gemuk agi nya, ti nyadika siku orang ti tau enggau betemu ngarika kompeni sida Ample Agro Sdn Bhd, sebuah kompeni ti udah mujur bulih 5,000 hektar tanah NCR di pelilih menua Julau.
Enti semua penerang tu enda chukup dikena ngemaruhka pendiau bala orang bansa asal, uji kitai meratika komen aka tuai iya, Norlia Abdul Rahman, ti nyadika siku pengari sida sebilik “ti ngemataka pejalai pengawa ba sitak parlimen [Tanjung Manis]” ke siku agi menyadi indu sida, iya nya MP Norah Abdul Rahman.
“Bala sida nya semina numpang atas tanah dia laban tanah nya ukai enggi sida, nya udah tanah perintah, nya kebuah sida semina numpang dia aja”,
pia ku Norlia, ti mengkang ngumbai iya bisi kuasa madahka bala orang bansa asal nya tau diburu ninggalka tanah adat sida, nya kebuah iya empu enggau bala menyadi iya ti kaya nya bisi kuasa atas tanah nya. Engka laban sida nya peturun ‘Raja’ kini? Raja Inggeris di Sarawak kelia enggau naka penyimat enggai ngindikka kaki sida ba atas tanah orang bansa asal di Sarawak.
Penerang-penerang ti tau ngasuh kitai tekenyit ati nya udah ngansak bala pemeri penerang kami bekirumka kami sekeda gambar bala anak Abdul Rahman ti ngeluluka diri bependiau baka bala ‘raja’ di sitak Tanjung Manis, sebengkah laluh kandang kampung paya bakau ti agi bisi di menua Sarawak, sebengkah kandang menua ti udah dirusak kompeni-kompeni sida ngambika diubah nyadika “Hab Halal”.
MP Norah Abdul Rahman diatu suah dipeda ngeluluka diri baka raja indu ba menua ti diwan orang ti merinsa lalu iya mega matih anak menyadi iya, iya nya anak lelaki Norlia nyuaka ang pau ngagai bala nembiak bansa asal ti seranta.
Bala anak indu Tun Abdul Rahman Ya’kub nya seruran ngumbai sida nya peturun raja. Tang sida ukai bansa nya.
Apai sida nya siku lawyer ti udah mujur nyadi orang politik ti kena pilih lalu udah nya ngangkatka petunggal sida, Abdul Taib Mahmud, ti mega siku lawyer ngambika dipilih rakyat. Raban sida nya ukai peturun raja.
Pasal tanah nya, ti diterima sida ari petunggal sida, Kepala Menteri Taib Mahmud nya ti ngena penuduk enggau kuasa iya ti nyadi pengari rakyat merintah menua. Pemeri ti baka nya sebengkah suap, rumpak reta orang bansa asal lalu mega salah guna kuasa.
Tang, terang bendar bala anak Tun Rahman nya seruran ngumbai sida nya bisi kuasa atas sebarang utai ti ulih sida laban ti bekabanka Taib Mahmud, lalu bala orang bansa asal ti deka angkat mantah sida nya dikumbai sida “manchal” tauka “jai”.
Terang bendar bala anak Tun Rahman nya berasai ringat sereta nyida ngagai bala pemesai dalam Opis Tanah enggau Survei Sarawak ti udah nangkan bala orang bansa asal ti madahka tanah sida udah dibagi ngagai kaban belayan Taib Mahmud baka sida, laban ba undang-undang, bala orang bansa asal nya endang bisi kuasa atas tanah adat diri empu.
Dalam pengawa sida ti ngelanggar undang-undang, bala anak indu Tun Rahman nya mengkang milih ngereja pengawa bedagangka tanah enggau chara belalai, ngambika ulih endur sida nyual baru tanah dikena ngulihka untung ti besai agi, sebedau bala orang bansa asal nemu tanah diri udah dirampas.
Terang bendar mega, Fatimah udah ngaku petunggal iya, Taib Mahmud, nya siku tuai menua ti korup dalam filem nya. Penerang ti dipansutka iya nya beduduk ba peragam iya ti ngumbai semua tuai menua di dunya tu korup magang-magang.
Peragam iya nya ngumbai semua orang politik BN ti dikelala iya nya raban tuai perintah ti korup sereta kamah ulah magang-magang. Ba penemu iya, nadai siku ari orang politik BN nya beresi ari penyalah.
Tang enti di menua bukai, bala tuai perintah ti ditemu ngereja penyalah makai suap deka ditinggang ukum ti berat. Semina bala tuai perintah diktator di menua ti bedau mansang aja ti ulih nabanka semua pengeraja sida enggau terang-terang baka bala orang politik BN.
Tang Fatimah udah besetujuka pendiau korup Taib Mahmud bisi “pemanah” ba mayuh pekara ti dikereja iya di menua iya empu nya.Nya alai, penerang-penerang ti baka nya ti meransang bala pemacha ngaga gambar ba runding diri empu ti madahka penyeranta enggau penyuntuk ti agi nating bala orang bansa asal di Tanjung Manis, ti diarika menyadi sida nya, Norah Abdul Rahman.
Tu mih siti kandang menua ti dirusak kompeni sida Tun Abdul Rahman enggau Abdul Taib Mahmud sebilik. Sida udah ngerampas tanah paya bakau enggi orang bansa asal ti besai bendar rampa lalu udah nya endur sida nirika kilang enggau penyangkai kapal ti dikena sida ngulihka untung ari duit wang turu ti deka dipasukka Kepala Menteri.
Chura pengawa nya sebaka magang, ti endur perintah menua deka melanja penumbuh kilang dia lalu udah nya kilang nya deka diempu bala sida Taib Mahmud sebilik enggau bala anak Tun Rahman ti deka ngulihka penguntung.
Tu mih siti ari kebuah endur Taib Mahmud enda tau enda ngulihka sukung kaban parlimen ari sitak parlimen nya, iya petunggal iya empu, Norah Abdul Rahman.
Tu mega nyadika siti ketegal ti enda ulih diterima akal enti Kepala Menteri nya madahka dua iku petunggal iya nya semina ngeluluka diri “ngemaruhka nama iya” ngena filem nya. Ke bendar iya, dua iku petunggal indu iya nya udah enda bejimat lebuh seduai ti berandau enggau siku lelaki ari menua tasik ti enda dikelala seduai ti ngeluluka diri deka meli tanah ari sida.
Bala anak indu Tun Rahman nya tentu enggai ngelabuhka nama Taib Mahmud laban sida menyadi nya mega endang ngarapka diri majak bulih penguntung ari iya enggau chara nerumpak rakyat menua Sarawak.