Diatu Sarawak Report bisi nerima sesalin repot ti ditiriska pasal pengawa ngeruga pengelantang enggau pengelikun raban orang bansa asal di menua Sabah enggau Sarawak, ti benung teguh dipelalaika perintah BN nyentuk ke tembu pengawa bepilihbesai ke-13 tu ila.
Repot ari Suruhanjaya Hak Asasi Manusia Malaysia (Suhakam) nya udah mantah Perintah Sarawak ti betuaika Kepala Menteri Abdul Taib Mahmud bekaul enggau pengawa ngeruga tanah enggau rampa kampung enggi raban orang bansa asal.
Repot ari Suhakam nya udah nyimpulka penemu sida ti madahka orang bansa asal udah “dipejal nyadi anak kuli ba tanah diri empu” ketegal pengawa keruga ti dikereja PELITA (tauka LCDA) ti betuaika Kepala Menteri Abdul Taib Mahmud empu nyadika pengerusi sida.
Dalam beberapa minggu tu udah, jaku-jaku tanya udah dipansutka sekeda bala orang dikena ngulihka penerang ti silik nama kebuah Perintah BN lubah bendar ngeluarka repot Suhakam nya.
Ba minggu siti nyin kemari bala kaban Suhakam bisi nuliska sepuchuk surat tebuka ngagai PM Malaysia Najib Razak dikena sida madahka pengirau ati diri pasal repot sida ti lalu bedau dikeluarka ngambika bisi dibacha mensia mayuh, ti endur haribulan ke penudi udah ditetapka nya kena 25hb April iya nya beberapa jam sebedau komisyen nya dipadamka.
Salin tiris ti bisi dikirumka ngagai kami nya udah ngujungka beberapa iku menteri di Malaysia belabuh kasak-kasak nguji deka ngelalaika penerang nya nyentuk ke ngagai sepenembu pengawa bepilihbesai tu ila, laban repot Suhakam nya ngundan semua penerang pasal penyalah ngelanggar atur pengelantang mensia kenyau ari 5 dekad tu udah baka ti dikereja perintah BN di Malaysia, ti semina ngeringka raban korporat enggau skim jampat kaya aja.
Jaku-jaku bantah ti balat ti ditujuka ngagai Taib Mahmud bekaul enggau penyalah ngeruga kuasa pengelantang bala orang bansa asal di Sarawak
Suhakam nya mai reti Suruhanjaya Hak Asasi Manusia Malaysia.
Belalauka terma-terma ti patut, Komisyen nya udah nerangka sida engka deka mansik semua macham jaku tuduh pasal penyalah ngelanggar kuasa pengelantang mensia, tauka nyadika timbal ba jaku sebana raban-raban ke bukai. Nitihka Suhakam mega, sida bisi nerima mayuh bendar jaku sebana kenyau ari taun 2002 ngagai 2010 bekaul enggau keruga atas tanah NCR, ti nyentuka sehari agi mayuh kes bedau diputarka.
Diatu kami udah ngengkahka asil pansik ari komisyen nya udah bekau kami nerima repot tiris ari sida.
Kami bisi diberi salin ti ditiriska laban Perintah Besai menua Malaysia lalu bedau ngeluarka asil pansik bekaul enggau pemuntan pengawa sida ngemataka pengelantang rakyat sida empu, lebih agi bekaul enggau penyalah ngeruga sereta ngerampas tanah ti dibantu raban ari opis perintah di Sarawak.
Mayuh pekara ditusui dalam repot nya ti nyukung pekara-pekara ti udah dituliska kami dalam laman blog tu ti ngenang pengawa Perintah Menua Sarawak ngerampas tanah-tanah NCR enggi orang bansa asal lalu diserahka ngagai kompeni-kompeni dagang kunsi tauka diserahka ngagai kompeni kayu batang enggau kompeni kebun dagang besai ti ngumbai diri bejalaika pemansang ke rakyat.
Suhakam mega nerangka dalam repot sida madahka perintah menua Sabah ti betuaika Kepala Menteri Musa Aman mega bejalaika atur ngelanggar kuasa pengelantang rakyat iya empu enggau salah guna kuasa, lalu sebaka mega dikereja di menua-menua di Semenanjung Malaysia.
Sekali agi Sarawak Report udah nerangka enggau silik pasal projek ti dikumbai tau pulai ke penguntung mensia mayuh, tang ke bendar iya udah mai pengeraja ke bala Taib Mahmud sebilik, enggau bala kroni dagang iya, ti endur Taib empu endang orang ti bisi kuasa ngeluarka lisin nengah penuduk iya ti nyadi Menteri Pengeraja Asal enggau Perambu, Kepala Menteri enggau mega pengerusi dalam gerempung PELITA.
Lalu dalam repot tiris ari komisyen nya sida udah nyukung penerang-penerang kami lalu ngerintaika mayuh macham chara dikena Taib ngeruga sereta ngerampas tanah ari raban orang bansa asal di Sarawak.
Asil sekeda pansik – Menua Sarawak mengkang enda ibuh ke pemutus-pemutus kot
Asil-asil pansik ti dirintaika repot Suhakam pasal menua Sarawak nya, baka ti diterangka dalam Bab 7, nyengkaum penerang ti madahka Perintah Menua Sarawak suah bendar enda ibuh ke pemutus-pemutus kot ti udah nirika kuasa bala orang ti bempu tanah adat di Sarawak dikena ngelaban jaku Taib nyadika undang-undang enggau Kod Tanah Sarawak.
Sarawak, sebengkah menua ti udu ngembuan resia enggau pekara-pekara ti dilalaika
Repot Suhakam nya mega madahka perintah Sarawak udu balalaika mayuh macham penerang ti patut ditemu mensia mayuh. Nitihka Suhakam, pemuntan menua Sarawak mutarka penanggul nya endang pekara ti endang disengajaka lalu balat bendar nuntung pengidup orang bansa asal ti bempu tanah, ti endang ditejuka enda nemu nama langgur pengawa ti benung diatur atas tanah sida empu.
Sengaja belubah-lubah bejalaika pengawa
Repot Suhakam nya madahka pengelubah enggau pengelaun ti disengajaka perintah Taib mutarka kes-kes enggau jaku-jaku sebana ari orang bansa asal pasal keruga ti nuntung sida. Penyampat sida mutarka mayuh bengkah kes nya enda konsisten.
Nadai notis diterima
Repot nya ngayanka utai ti ditemu tiap iku rakyat Sarawak ti endur perintah enda madah enggau silik pasal langgur pengawa ti dikereja atas tanah sida ti diserahka ngagai kompeni-kompeni kayu batang tauka kompeni ti deka muka kebun dandang besai sawit. Repot nya nekanka pengawa ti baka nya salah ba undang-undang menua.
Nadai bantu lawyer ke bala rakyat
Repot nya mega madahka perintah enda mantu raban bansa asal enggau sanding penemu lawyer lebuh sida kena keruga kompeni ti tama ngagai menua sida deka ngulihka kayu batang tauka muka kebun dandang besai. Orang bansa asal nya ditejuka berunding enggau kompeni-kompeni ti bependiau kasar.
PELITA dipaduka nyadi ‘pemegai reta’ ngarika orang bansa asal ti bempu tanah!
Suhakam madahka asil pansik sida udah tetemuka PELITA ti betuaika Taib nya dipaduka nyadi pemegai reta ba tanah enggi orang bansa asal lebuh sida deka ngambi tanah lalu diserahka ngagai kompeni awakka bisi dipasukka ngagai pengawa ‘dagang kunsi’ ti dipelanja.
Kitai patut ingatka pengawa dagang kunsi tu, udah dikereja sida Taib sebilik enggau bala kroni iya, ti endur pengawa nya udah enda tau bebalut enggau pengawa menteri iya, lalu PELITA patut bisi tanggungpengawa ngemataka pengelantang raban bansa asal.
Nyata bendar ke sebarang sapa ti ngarika perintah mansutka jaku penerang enggau chara tibar jala madahka pemansang ba tanah orang bansa asal nya ke penguntung sida empu. Repot Suhakam nya terang bendar madahka semina Taib siku aja enggau sida sebilik ti bulih untung ari ngereja tanah enggi orang bansa asal nya, lalu orang ti endang bempu tanah nya majak seranta.
Raban polis dikena ngelaban sereta nekanka rakyat
Repot Suhakam nya madahka raban polis udah puntan bejalaika pengawa sida ngelindung orang bansa asal enggau tanah sida ti kena pasuk lalu dikeruga kompeni ti bekeringka lisin enggau konsesyen kampung ari perintah, nyengkaum chara kompeni nya ti beupahka raban apek bayat.
Repot nya madahka raban polis semina deka ngambi tindak lebuh orang ti bisi lisin kampung nya ngaga repot ngagai sida madahka diri kena kachau bala orang bansa asal lalu nyimpan sida nya dalam rumah jil, taja pan sida nya berambunka nyawa ngetanka tanah sida empu ari kena keruga orang ari luar.
Pengerusak rampa kampung enggau menua enda dikibuhka
Sama disebut dalam repot nya mega madahka perintah Taib seruran nyeliahka Pansik Empas Ngagai Rampa Menua ti mega enda dipejalaika enggau silik, lalu orang bansa asal udah ditejuka ngidupka diri ngena sungai enggau tanah ti udah rusak, kamah sereta berachun.
Jurai ti pelesu
Repot Suhakam nya madahka nadai diatur sebarang jurai enggau raban bansa asal ti kena keruga lebuh lisin dikeluarka ba tanah sida. Tang lebuh ti ngatur jurai surat-surat nya semina dipandang-pandangka aja ngagai bala bala tuai rumah ti endang dipaduka gawa lalu diupah Taib.
Bala tuai rumah nya ngetanka penuduk enggau upah sida nya enggau chara nurutka sebarang utai ti diasuh perintah, reti nya sida ukai bekereja ngarika nembiak diri empu, tang ngarika, lalu nyukung pengawa dagang Taib. Tu sebengkah chara ti ngelanggar atur pengelantang mensia ti nyata.
Nadai dividen ke bala orang bansa asal
Repot Suhakam nya mega ngenang penanggul dibai projek-projek dagang kunsi Taib ti suah udah dibantah nengah laman blog tu. Lebuh Kepala Menteri ti rangka nya rindu bendar madahka projek-projek nya endang dikena ngemansangka dagang kunsi dikena ngemanahka penatai pemisi raban bansa asal, jarang bendar sida nya dibayar dividen!
Raban orang ti majak kaya nya bala Taib sebilik enggau bala kroni iya ti bisi kompeni ba dagang kunsi nya. Tu nunjukka PELITA ti ‘ngibun’ tanah orang bansa asal nya endang ukai chakah ngatur pengawa ke penguntung raban bansa asal, tang ke penguntung Taib aja.
Nadai pampas
Repot nya mega madahka Taib enda mayar sebarang pampas ngagai orang bansa ti udah kena keruga lalu lenyau tanah NCR.
Lalu mutarka penanggul bekaul enggau undang-undang
Lalu lebuh datai ba maya bala orang bansa asal ngaga pemutus runding sida deka bedawa kompeni-kompeni enggau perintah menua, rampa kampung sida udah abis dikereja, lalu Taib endang seruran enggai ngetu bejalaika pengawa ngeruga rampa kampung seagi-agi kes pechara dalam kot bedau tembu.
Tu mai reti, taja pan perintah Taib enggau kompeni kayu batang suah alah bechara, tanah ti benung diperebutka nya lama udah kusi sereta rusak. Taib patut lama udah diketuka perintah besai BN laban nyata bendar ngelanggar atur pengelantang enggau pengelikun rakyat iya empu. Tu mega nyadika dalih BN ngelalaika repot Suhakam nyentuk ke pengawa bepilihbesai ke-13 Malaysia nya tembu diatur.
Beduan
Repot Suhakam nya mega nunjukka raban polis enggau polis ari cawangan khas enggau mega bala apek bayat enda diupah beduan bala orang bansa asal awakka nyerahka kuasa sida ke guna dagang Taib.
Penutup
Repot ari Suhakam nya ngenataika langgur enggau tuduh penemu ti ngasuh mulaika tanah ti udah dirampas lalu mayar pampas ke pengerugi ti enda ulih diputarka agi.
Dikena ngaduka pengerusak ba tanah enggau rampa kampung nya, Suhakam besenutuk penemu enggau semaya raban penyakal ti deka numbuhka Komisyen Tanah. Suhakam ngembuah langgur ti sebaka, iya nya ngansak perintah numbuhka Tribunal Tanah Orang Bansa Asal.
Suhakam mega minta orang bansa asal patut nerima bantu lawyer ngarika sida ngetanka tanah sida, awakka kuasa sida ba tanah diri empu nya dikelala semua orang di entarabansa.
Ngelama tu Taib engka suah udah ngeleseka jaku-jaku bantah raban NGO enggau bala pemerati iya.
Deka tauka enda iya ngumbai bala NGO nya “manchal” baka iya ti udah ngela raban MACC ti deka bejalaika pansik ba iya bedau lama tu?
Rejim perintah BN udah bebendar amat ngelamun penyalah iya enggau Kepala Menteri Sabah Musa Aman ngena mayuh repot ti udu nekan sida. Tang diatu sakal sida nya nuju pemuntan.
Rakyat Malaysia diatu udah leju sereta puas enggau ulah Taib lalu sida berasai malu ketegal ulah iya ti ngeruga sereta ngerumpak rakyat diri empu di Sarawak. Umbas milih tuai ti udah mai pemerinsa ke bansa enggau menua diri, lalu tukar iya ti puntan enggau orang ti baru sereta bepenemu lurus.
