BN udah keras bendar madahka sida enda tau enda nipu maya bepilihbesai tu ila lalu sida udah enda ulih nejuka penemu raban penyakal datai ba pending bala pengundi sida.
Ba ujung minggu tu tadi sida udah melanjaka duit awam ti mayuh bendar dikena sida ngatur serang ba laman-laman radio internet Radio Free Malaysia enggau Radio Free Sarawak.
Sida udah nguji nyerang gelombang angin ti dikena naburka program dua iti radio internet nya lalu mega nguji ngelumpuhka laman-laman web radio-radio nya, tang pengawa sida nya puntan.
Kena hari enam tu tadi sida nyerang Gelombang Angin Pandak Radio Free Malaysia ti ditaburka ngena gelombang 1359kHz enggau niat nyekat program, tang pengawa sida BN nya mega puntan.
Pia mega sida udah nyerang Gelombang Angin Pandak Radio Free Sarawak beberapa hari tu udah lalu dipelabaka bisi ngengkahka program-program bukai ngembar gelombang 15430kHz nya. Pengawa sida nya udah mega puntan lalu kami benung bejalaika pengawa ngiga ari ni penatai penanggul nya.
Kedua-dua set serang nya dipejalaika sida enggau chara ti salah ba undang-undang entarabansa ba pekara penabur lalu mega dipeda salah guna duit bala pemayar chukai ti mayuh bendar.
Soldadu cyber
Nyerumba nya bala ‘soldadu cyber’ BN udah ngelancharka serang-serang DDOS (Distributed Denial Of Service) ba atas laman-laman web Radio Free Malaysia enggau Radio Free Sarawak, lalu sida arapka serang nya ulih ngemuntanka radio internet dua iti nya.
Sekali agi serang nya ditemu ngena belanja ti mayuh sereta salah ba undang-undang.
Pengawa ti baka nya nyadika kelai BN udah mupuk putus pengarap sereta lemi, lalu sida mega irau sereta takut bendar ke bala peninga sida ninga penerang ti enda dikemendarka sida.
Tang seninjik bendar dua iti laman nya udah manah baru lalu dipejalaika baka ngelama tu, tang udah nya laman-laman nya diserang baru. Laman-laman nya tetap deka dipejalaika baka selama, ti nandaka serang-serang ti ngemalu diri nya udah enda mujur dikereja raban BN.
Kita mega ulih ningaka program ari stesyen-stesyen radio internet nengah laman Sound Cloud
Laman-laman web kami nya benung diseruri lalu digaga manah agi dikena napi sebarang serang ti disadang nangkanka tu. Tang kami andal bendar laban ulih mai bala peninga kami ngagai laman Sound Cloud, ti endur sida ulih ningaka program-program sebarang maya lebuh bisi penanggul.
Radio Free Sarawak ulih didingaka nengah https://soundcloud.com/radiofreesarawak
Radio Free Malaysia ulih didingaka nengah https://soundcloud.com/radiofreemalaysia
Kami meransang bala orang BN ngena semua ‘belanja perang’ sida (ti mayuh agi nya datai ari pengawa makai suap ngulihka kayu kampung, baka ti diaku sida diatu) enggau chara ngelumpuhka laman Sound Cloud, ngambika udah nya sida tau dikutuk bala peninga bukai di serata dunya tu.
Kelai bala orang BN nyau enda ulih napi sebarang penemu ti besakal enggau propaganda sida ti enda ngetu-ngetu?
Serang-serang ba atas RFS enggau RFM tu nyadika tambah pengawa raban orang BN ti nguji ngelumpuhka pejalai laman blog Sarawak Report tu.
Ba sehari tu aja, Hari Enam, Sarawak Report bisi napi tujuh iti serang, semua nya beniat dikena madamka berita enggau data ari laman blog tu.
Kami enggau gaga sereta andal meri penemu ditu madahka pengawa sida nya udah ngaga gamal BN baka nembiak mit ti nyabak ringat ngelingkang.
Agi mega parti ti benung merintah nya chakah bendar nguasa semua suratberita enggau media penabur di Malaysia sepemanjai sida merintah, bejalaika penyalah makai suap ba pekara penabur berita, ti dulu suba dikumbai sida media bebas.
Lalu sida terus salah guna enggau kuasa sida dikena mansutka propaganda ti nanahka rejim perintah sida.
Sida udah enggai meri peluang ngagai raban penyakal ngenataika sakal penemu sida nengah media ti dikuasa sida, lalu enggau nya RFS enggau RFM nyau mansar diri naburka program chara ti belalai dalam pengelama dua jam sehari dikena ngenataika penemu ti enda sebaka ngagai bala peninga, ke lebih agi di menua pesisir.
“Apuska RFM” nyadika “Pugu jurai” sida!
Ba minggu nyin kemari sebengkah penerang bisi tiris ari aum kabinet ti madahka pugu penemu BN diatu iya nya dikena “ngapuska” Radio Free Malaysia!
Simpul penemu kami diatu iya nya Najib udah dipeda lemi sereta takut bendar ke pengawa kami ti enda besai ti ditimbal sida enggau serang ti beabis-abis.
Sekali ke BN diatu udah lenyau pengarap ti madahka sida takut besara penemu, tang udah beabis-abis nguji ngapuska sada nyawa ti mit baka ti ditabur kami nengah program dalam timpuh ti enda panjai nya?
BN diatu dipeda takut deka ngemendarka mensia mayuh nemu penerang pasal penyalah makai suap ti dikereja sekeda bala menteri sida; penyampau duit ti mayuh bendar lenyau ari wang turu menua lalu dipasukka ngagai akaun-akaun orang siku-siku ti enda dikelala dalam bank di menua tasik; ngelakar maya bepilihbesai; ngeluar tauka ngulihka kontrak-kontrak enggau konsesyen-konsesyen enggau chara ti salah ba undang-undang; berampaska tanah-tanah ti endang bisi orang bempu tauka mayuh agi penerang pasal pengawa salah ti dikereja bala sida sekaban dalam perintah BN ngambika dibantaika ngagai mensia mayuh.
Baka nya mega, sida BN udah enggai meri kuasa enggau peluang ngagai tuai-tuai raban penyakal, nyaut jaku tuduh sida pasal ngena platform media dikena ngelaban tauka mantah sida.
Enggau nya, nyadika penutup iya, BN enda berani ngemendarka sara penemu tebuka laban sida deka ngelamun rekod salah pengawa sida ti udu korup sereta udu meri pemalu lalu sida udah enda ulih ngetanka penyalah nya.