Surat berita ujung minggu Australia ti tebilang, The Age, ngeluarka berita pasal menyadi Kepala Menteri Sarawak Taib Mahmud, iya nya Onn Mahmud, sehari tu.
“Siku tauke ngerarika diri ari mayar cukai reta bejuta-juta dollar”, “Pengawa dagang ti ngasuh kakang ati” enggau “Tangkap iya, pengelenyau bemisteri orang kaya Malaysia” nya sekeda ari batang repot suratberita ti mantaika pasal pengawa jai Onn Mahmud, ti kala nyadika nomini pengawa dagang ke Taib Mahmud dalam pengelama beberapa taun, sebedau berita iya dibantaika nyadi siku orang ti nerima duit suap bejuta-juta dollar ari bala pengekspot kayu batang ari menua Jepun.
Berita-berita dalam The Age nya ngamatka repot ti udah dibantaika Sarawak Report pasal Onn Mahmud enggau pengawa iya ti nguji nyeliahka diri ari mayar chukai, ti udah mai penyaru runding ngagai raban ari Opis Pengumpul Chukai Australia bekaul enggau status beberapa iti kompeni iya di menua nya.
Onn Mahmud diatu udah enda besepenemu enggau menyadi iya empu, Abdul Taib Mahmud.
Tang semua bekau jari iya agi mengkang ba kompeni-kompeni sida sebilik ti ditumbuhka iya di sebelah-belah menua tasik di serata dunya tu. Suratberita The Age ngela iya enggau nama orang kedua pemadu kaya di Malaysia, lalu menyadi iya empu, Abdul Taib Mahmud, nyadika orang ti pemadu kaya di Malaysia!
Nya alai, bala pengundi di Sarawak patut berunding panjai-panjai sekali ke deka ngundi tauka mechat orang diri sebilik ti jai nya sereta meri malu ke menua sida empu.
Tauke ngelipakka mayar chukai reta bejuta-juta dollar
Siku ari orang pemadu kaya Asia udah ditemu nguji nyeliahka diri ari mayar chukai reta beungkus bejuta-juta dollar ba dagang reta iya di menua Australia ti nyau ka dua abad tu udah.
Onn Mahmud – menyadi kepala menteri Sarawak ti mega orang pemadu kaya di Malaysia nya – udah ngena jarin sistem pejalai pekara wang dikena mai pansut penatai pemisi iya ari sebuah pengawa dagang reta di menua Sydney ti dipelabaka manggai $100 juta.
Ba sebengkah pengawa dagang Onn Mahmud udah nyual sebuah tapak apartmen di Sydney ba pililih Potts Point enggau rega $15.5 juta dalam taun 2007 – dikena iya ngulihka penguntung ba penyampau $10.8 juta. Siku bakih dagang Onn ti kala madahka chukai ba untung ti dibayar ba pengawa dagang nya enggau semua penguntung nya udah dipindahka ngagai sebengkah pengibun reta ti bisi opis di Cayman Islands.
“Semua atur pengawa iya endang ditusun enggau jimat dikena nentuka iya enda mayar chukai di Australia,” pia ku Farok Abdul Majid, ti nulung Onn bejalaika pengawa dagang reta iya di Sydney dalam pengelama beberapa taun.
Surat-surat penerang ti diambi ari Fairfax Media nunjukka Onn Mahmud udah meri penerang ti bebida-bida ngagai raban ari opis-opis perintah Australia dikena ngulihka visa dagang lalu nirika reta ti dipejalaika iya nengah pengibun reta iya di Cayman Islands ti dikemetaka bank Merrill Lynch di Isle Of Man.
Farok Abdul Majeed diatu benung nguji ngulihka bejuta-juta dollar ti ditagih iya nyadika yuran ti bedau abis dibayar, nyengkaum komisyen-komisyen enggau mega belanja ti bukai. Raban arkitek ari Crone Partners mega madahka utang Onn ba sida bedau dibayar datai ke $500,000.
Onn Mahmud direpotka nyadika orang kedua pemadu kaya di Malaysia ngembuan pengeraja ti manggai $2 billion – mayuh agi nya datai ari pengawa iya ti nyual kayu batang enggau chara ngerusak kampung di menua Sarawak.
Bini enggau bala anak Onn Mahmud ditemu nguan sebuah rumah besai di Carrara Road, Vaucluse, ti nunga ngagai Penyangkai Kapal Sydney, tang iya empu suah agi diau di Singapura enggau mega pulai ke Malaysia.
Peminta iya ngaga visa dagang iya dalam taun 2002 udah dipelanja kompeni Ryan Park Limited enggau tiga buah agi kompeni ti dipejalaika sida Onn menyanak: Ferncroft Ltd, Golden Arrow Ltd enggau Cherry Blossom Ltd.
Lebuh ti minta ngulihka visa dagang nya Onn madahka kompeni Ryan Park enggau kompeni-kompeni iya ti bukai udah beranakka puku dagang $50 juta ba dagang reta di Sydney. Tang Farok madahka dagang Onn di Australia nya dipelabaka bulih untung dua kali lipat ari nyampau ti disebut iya nya.
Lumur register dagang Australia (ABN) ke Ryan Park nya nunjukka kompeni nya sebengkah “kompeni privat Australia” tang kompeni nya nadai rekod dalam opis Komisyen Dagang enggau Sekuriti Australia lalu ke bendar iya kompeni nya udah direjista di Cayman Islands dalam taun 1991 nyadika sebengkah entiti “ukai peranak menua”.
Dalam bulan Tiga 2007, bala pemesai ari bank Merrill Lynch udah nulis penerang bestatutori di Isles Of Man ti madahka kompeni Ryan Park nya “sebengkah kompeni ari menua luar ti enda berejista” lalu kompeni nya “nadai bejalaika pengawa dagang di Australia”.
Kompeni Ryan Park enggau tiga bengkah agi kompeni ti bukai mega direjista di Cayman Islands ti udah dikeluarka ari rintai nama kompeni-kompeni di menua pulau nya beberapa taun tu udah.
Reta ti udah ditugungka Onn Mahmud ba pun taun-taun 1990 nyentuk ngagai 2007 nyengkaum sebengkah hotel enggau kompleks kedai makai ba tengah nengeri Sydney enggau sebuah rumah opis ba Elizabeth Street di Sydney ti udah dijual iya dalam taun 2005 dikena iya ngulihka untung ti disadang lebih ari $5 juta.
Farok, siku peranak menua Malaysia ti bekereja nyadi penyanding penemu ngemataka projek enggau pemansang, udah ngambi tindak kot dikena iya ngulihka $5 juta ti ditagih iya ke utang Onn Mahmud ba iya.
Dalam bulan Lapan 2007, sebengkah Kot Tinggi di New South Wales udah ngasuh Onn mayar $2.2 juta ngagai Farok nyadika utang bayar yuran enggau komisyen-komisyen bukai. Arah ari kot nya enda diteruska laban Farok empu udah enda ulih ngenataika diri mendingka kes nya dipecharaka beturut maya ti endur arah nya udah dichabar bala lawyer ti ngarika Onn Mahmud.
Onn Mahmud lalu bedau meri sebarang saut ke beberapa iti jaku tanya ari Fairfax Media ti udah dikirumka bala lawyer sida di menua Singapura ba minggu nyin kemari.
Bacha penerang ti silik dalam: http://www.theage.com.au/national/tycoon-dodges-millions-in-land-tax-20130427-2ilmn.html#ixzz2RhHbQoU1