Sarawak Report diatu bisi nerima beberapa iti kar menua ti dikirumka bala pemeri penerang belalai ti deka mantaika langgur pengawa ngena jaku gerah ti deka dipansutka BN pasal pengawa ngagihka tanah endur betanam-betupi ke pengentap pendiau baru bala orang diri sebilik di Sungai Asap nya sebengkah pengawa ti meri malu.
Semua kar menua nya nunjukka baka ni 32,000 hektar tanah ti dilanggur BN ke diberi nya nyadika singkang terubah sebedau bepilihbesai dikena ngulihka undi ke bendar nya sebengkah kandang menua Kampung Ti Dijaga perintah di pelilih menua Pesu-Pelong enggi raban-raban bansa ti bukai!
Kandang menua nya mungkur tanah-tanah NCR ti udah dikelala enggi tiga bengkah raban bansa Kayan enggau sebengkah raban bansa Punan.
Reti nya 800 ruang bilik orang diri sebilik ti benung nganti diri bulih tanah baru dikena betanam-betupi ti chukup, ti udah dipejalaika sepuluh taun tu udah sepengudah sida diasuh ninggalka menua lama sida laban ngawakka projek ngaga Tekat Bakun ti nadai tuju ti menuku nya, mengkang nadai rumah ti tau dikumbai sida bilik-penaik.
Menteri Besai Najib Razak udah nyadika isu nya sesingkang ti keterubah bepilihbesai ba bepilihbesai taun 2011 suba lalu diatu iya nguji ngena semaya-semaya ti sebaka nya ngambika meransang bala orang di endur nya mengkang nyukung BN ba pengawa ngundi dua taun udah bekau nya.
Bala pemeri penerang ari dalam madahka BN udah besedia nyadika isu nya maya ngatur sebengkah pengerami nyuaka surat tanah dalam kandang beberapa hari kejang deka bepilihbesai tu enggau chara mansutka jaku gerah pasal tanah pemeri ari perintah 32,000 hektar tanah nya.
Enggau laluh beberapa hari da agi kejang deka bepilihbesai tu bala orang di menua nya ti gaga ati engka enda sempat endur ngereja tanah baru sida nya ti endur sida betanam-betupi dalam penyauh beberapa batu ari pendiau baru sida di kem Sungai Asap.
BN endang arapka penanggul nya, iya nya sebengkah penyarut tanah, enda sempat tebantai sebedau orang diri sebilik di Sungai Asap bisi endur meri undi gaga ati sida ngagai BN.
Ngelakar Peter dikena mayar Paul
Pansik atas kar nya nunjukka sebagi ari tanah ti deka diberi BN ngagai orang diri sebilik di Sungai Asap ke bendar iya tanah ti udah dirampas ari raban bansa ti bukai ngena atur nyukat perimeter survey.
Dalam pengelama beberapa bulan raban NGO, nyengkaum Radio Free Sarawak, udah nangkan raban-raban bansa ngambika angkat ngelaban atur nyukat tanah perimeter survey ti dikena perintah menua ba atas tanah sida, baka ti suah bendar ditebah-tebah sida nyadika sebengkah atur pengawa ngaga surat pala tanah.
Kebuah baka nya laban perintah Sarawak benung chakah ngelakar bala rakyat ngambika ngelepaska tanah-tanah NCR sida enggau chara ngasuh rakyat nyain surat-surat dikena ngulihka surat-surat pala tanah enggau chara ngemendarka sebagi tanah ti mit ti semina ngelingi rumah panjai sida. Perimeter survey nya siti ari chara nentuka rakyat ngelepaska kuasa sida ba tanah pesaka sida ti besai agi rampa ngagai perintah menua.
Enggau chara nya bala menteri BN ulih ngena peluang ba pengelemi enggau pengurang sida bulih lalau undang-undang ba raban bansa sida. Bala orang rumah panjai tu udah meri pengarap penuh sida ngagai bala tuai bansa Dayak sida dalam PRS baka James Jemut Masing, Mong Dagang enggau Wilson Ugak Kumbong (ti kala ditemu nugungka pengeraja ari ti nguji numbuhka dagang kunsi ngena tanah NCR orang bansa asal ngagai jari kompeni ti besai-besai).
Siti ari raban bansa asal di pelilih menua Jelalong ti semak pasar Tubau, ba sebengkah endur ti udah ditetapka diberika ngagai raban orang ti baru pindah kia, nitihka penerang dalam kar ti ditiriska nya.
Sebengkah penanggul ke bala orang Sungai Asap
Langgur ti ngasuh saru runding nya nyadika bala orang ti baru pindah masuk di Sungai Asap nya tusah ati, laban udah bekau betaun-taun sida diburu lalu ninggalka menua lama sida dikena meri awak ke projek ngaga Tekat Bakun (iya nya sebengkah projek gajah burak ti pemadu besai di Asia, lalu bedau ngeluarka bekal kuasa elektrik ketegal ti nadai peminta).
Lebuh sida ninggalka menua lama sida sedekad ti udah, sida disemayaka sida deka dikemansangka lalu tau nyadi kaya agi enggau semua macham peluang bekereja ti baru enggau penatai pemisi ti mayuh agi. Tang ke bendar iya, sida diatu mengkang idup suntuk baka ti suba lalu gisai-gisai begaru enda gatal napi pemar pengidup ba menua baru nya.
Mayuh macham jaku semaya udah disebut ngagai sida – rumah endur diau ti enda bebayar, bekal kuasa elektrik enggau ai ti enda bebayar, tanah endur betanam-betupi ti enda bebayar enggau peluang pengawa ti nyadika sebagi ari utai ti diberi ngagai sida dikena malas budi sida ti sanggup ninggalka menua lama sida.
Tang ke bendar iya, sida ti dientapka ngagai palan pengentap pendiau ti baru nya dipadahka sida diatu berutang ba perintah dikena perintah ngambi pulai ungkus nganti rumah sida (ti ke bendar iya enda digaga manah sereta betukuh sab-standard).
Diatu menua lama sida udah diampuhka ai tekat lalu sekeda palan sida melepung, ti endur sekeda bala orang diri sebilik udah mutuska runding diri pulai baru ngagai menua lama muak ke ulu tekat, laban sida udah enda mujur ngidupka diri di menua baru sida di Sungai Asap.
Sepengudah menang bepilihbesai negeri nyin kemari Najib Razak udah besetuju ngelepaska orang nya ari tanggam utang sida ba perintah ba penyampau RM41 juta, taja pan sida nya endang nadai nginjau tauka ngambi sebarang utai ari perintah.
Menteri Besai nya mega besemaya ngarika perintah BN deka ngaga rumah tumpang ke bala nembiak sekula ke raban bansa Penan di Sungai Urun ba rega RM100,000 sebuah.
Taja pan baka nya, dua taun udah ngelebus, bala nembiak nya enggau sida sebilik mengkang diau dalam rumah manuk ti diubah baru, nitihka asil pansik EIA Tekat Murum, baka ti ditiriska ngagai laman blog tu dulu ari tu.
Sehari kejang deka bepilihbesai dua taun nyin kemari sebuah unit bank ti mudah mindah-mindah udah dianjung ngagai Sungai Asap dikena mantu bala orang di menua baru sida nya nukar chek sida ngagai duit tunai ti disuaka BN dikena meli undi sida.
Sinu bendar dikenang, bala pengundi nya udah nerima duit suap ti mit bendar rega dikena nyilih tanah sida ti beungkus bejuta-juta ringgit, lalu mata sida dipampul penyuntuk sida sereta ditipu bala tuai politik Dayak dalam BN, lalu diatu BN agi ngumbai sida sekali agi deka mujur ngulihka sukung bala pengundi Sungai Asap ba bepilihbesai tu ila.
BN bisi bendar ‘pengarap’
BN diatu disadang kelalu andal tau menang baru di sitak Hulu Rajang enggau sukung MP BN ke dulu suba ti semina bisi laluh beberapa hari da agi endur nirika pengari baru PRS, iya nya sekretari politik ke James Jemut Masing, iya nya Wilson Ugak Kumbong.
Terang bendar parti nya pechaya ke bala pengundi sida kelalu beli deka arap tauka meretika skandal ngerampas tanah ti bisi kaul enggau Wilson Ugak enggau bos iya James Masing ba taun-taun ti udah, udah bekau sida mejal bala orang bansa asal di menua Sri Aman masuk pengawa dagang kunsi.
Udah nya Wilson enggau James lalu minta duit suap ari kompeni-kompeni ti deka meli projek nya ba rega RM1,000 seekar (penyampau ti mayuh agi ari ti dikarapka bala orang ti bempu tanah-tanah NCR ti udah lenyau pesaka sida).
Ke bendar iya, BN besai bendar pengarap ke sida ulih menang lalu orang bansa asal di Sungai Asap tau dikarapka deka ngundi sida enggau beberapa ringgit ke tiap iti undi.
Nama kebuah ngelakar bala pengundi enti sida nya endang tentu deka ngundi kita?