Nama kompeni nya Natalite Investment Limited ti beopis di Hong Kong.
Diatu kami ulih mantaika, udah bekau kami ti mansik semua surat penerang ti kala disimpan Ross Boyert, siku pengurus ke kompeni reta Taib Mahmud di menua US, Sakti International, baka ni Natalite Investment Ltd nya bisi kaul enggau Kepala Menteri nya enggau skandal nyambut duit suap ekspot kayu batang ti diangkut ari Sarawak nengah Hong Kong lalu ke menua Jepun, ti suah bendar dikeenggaika iya.
Natalite Investment Ltd nya siti ari jarin kompeni-kompeni ti asal iya ‘diempu’ siku orang dagang Shea Kin Kwok, ti nyadi tebilang dalam taun 2007 suba nyadika ‘orang ti bempu’ kompeni Regent Star, sebuah kompeni ti bekereja nyambut duit suap bejuta-juta dollar ari kompeni-kompeni kapal pengangkut kayu batang Jepun di Sarawak.
Lebuh maya nya Shea dituduh bisi kaul enggau Onn Mahmud, iya nya menyadi Taib Mahmud, ti diberi Taib tanggungpengawa ngeluarka lisin-lisin ekspot kayu batang.
Sarawak Report udah ulih mantaika penerang pasal Shea nya siku sekretari bekereja ba opis di Hong Kong lalu digaji Onn Mahmud.
Bala pemeri penerang udah nerangka enggau silik baka ni kompeni kapal ti deka mai kayu batang pansut ari menua Sarawak dipinta mayar sepenyampau duit ti mayuh bendar ngagai beberapa buah kompeni ti bepalan di menua Hong Kong, ti endur kompeni Regent Star nyadika sebuah ari kompeni-kompeni nya, dipaduka meri lisin pengangkut. Tu mih pelasar pengeraja Taib Mahmud.
Pengawa bebulaka penerang
Taja pan raban ari opis chukai Jepun udah kala ngeluarka penerang pasal duit suap enggau pengawa nguji ngambi duit ari kompeni-kompeni kapal ti mayar duit sida, Taib suah bendar bebulaka kaul diri enggau Regent Star.
Iya mega kala nyaman beberapa iku orang nyengkaum gerempung media laban ti nuduh iya bisi kaul ba pengawa nya.
Tang, terima kasih ke Natalite Inv Ltd, Kepala Menteri nya enda agi ulih bebulaka kaul diri enggau Shea Kin Kwok enggau jarin kompeni-kompeni iya ti bepalan di Hong Kong.
Kebuah pia laban repot ari opis chukai ti bisi penerang pasal kompeni Taib sebilik, Sakti International, dalam taun 2006 ti endur bala pemegai share kompeni nya (Jamilah Taib, Abdul Rahman Sulaiman Taib,Mahmud Abu Bekir Taib, Arip Mahmud enggau Onn Mahmud) udah madahka raban ari opis ti bekuasa menua US pasal Natalite Inv Ltd di Hong Kong nya nyadika alamat pengawa dagang sida.
Penerang tu nunjukka bala pemegai share nya, lalu ukai kerani dalam opis Onn, endang orang ti bempu Natalite Investment Ltd Hong Kong, ti endur iya dipaduka nyadi nomini ngarika kompeni-kompeni ti bukai.
Nya dikena ngamatka kaul entara kompeni Sakti International enggi Taib sebilik enggau kompeni-kompeni enggi Shea Kin Kwok di menua Hong Kong.
Kompeni-kompeni nya nyengkaum Whittaker Co. (dikorporatka dalam 1985), Richfold Investment Ltd (dalam 1983), Regent Star Co. (1983), Grand Will Ltd (1984), Icharaku (2001), Grand Shine (1983), Herolite Investment Ltd (1983) enggau Natalite Investment Ltd empu.
Herolite Investment enggau Grand Shine (HK) bisi share pemadu mayuh dalam kompeni Achi Jaya, sebuah kompeni enggi Onn Mahmud ti ngempu kompeni Achipelago, sebuah kompeni ti diberi Taib tanggungpengawa ngeluarka lisin-lisin ekspot kayu batang ari menua Sarawak.
Belalauka rekod-rekod kompeni awam Hong Kong kami udah mujur ngeluarka siti representasyen pasal jarin kompeni-kompeni Taib sebilik di Hong Kong, peratika gambar ti di baruh tu.
Kaul ti terus enggau Taib
Kaul Natalite Investment Ltd enggau Sakti International Inc nya udah ngasilka sebengkah pekara ti tau narit ati. Kebuah pia, laban, terima kasih ke surat-surat ari Ross Boyert, kami ulih mantaika penerang ti madahka Taib udah ngena sida diri sebilik nyadika bala nomini dikena iya ngelamun kuasa penuh iya ba atas kompeni reta iya di US.
Ke terubah iya, Taib empu nyadi Pengarah dalam Sakti International, lebuh kompeni nya dikorporatka dalam taun 1987 suba.
Kedua iya, semua surat lawyer ti diulihka Ross Boyert nunjukka Kepala Menteri nya ngaga semaya resia enggau bala pemegai share dalam kompeni sida sebilik tu (tiga iku anak iya enggau dua iku menyadi iya) enggau madahka 50% ari kompeni nya dipegai “penyaga reta” ke iya empu.
Bala nomini iya
Ross Boyert udah ninggal dunya disadang mati munuh diri udah nengah jalai pengidup ti merinsa ditinggang utang udah bekau iya ngelaban sida Taib sebilik bechara dalam kot.
Tang lebuh iya agi idup iya kala madah ngagai Sarawak Report nya iya endang netapka penemu diri ti madahka sapa ke bendar bisi kuasa penuh dalam Sakti International lalu mega dalam kompeni-kompeni sida Taib sebilik ti bukai.
Orang ti ku niang Ross Boyert nya suba iya nya ‘Kepala Apek Bayat’ Abdul Taib Mahmud.
Penerang-penerang ti bisi diterima kami diatu ulih ngaitka Taib, ti nyadi pemegai share dalam Sakti International, sama-sama enggau Natalite Investment ari Hong Kong, diempu Shea Kin Kwok nya siku orang ti udah ditangkap ketegal nerima duit suap bejuta-juta dollar ekspot kayu batang ari kompeni pejalai kapal Jepun ti ngangkut kayu batang ari menua Sarawak.
Francisco C Sebastian
Jarin kompeni-kompeni di Hong Kong nya ba ke terubah iya dikemataka Onn Mahmud ti bejalaika pengawa dagang ngarika menyadi iya Taib Mahmud lebuh iya baru masuk pengawa politik suba.
Tang sepengudah nengah atur pengawa ‘ngambi-alih’ ti kompleks, sebengkah agi nama nyelai pansut ba jarin nya ba taun 1984 nyadika ‘pengempu’ bekuasa penuh dalam jarin pengawa dagang Taib.
Orang nya siku pegawai bank bebansa Filipino, Francisco C Sebastian, ti ba pun taun 1980an suba nyadika ‘penyanding penemu ngatur reta’ ke sebengkah agi kompeni reta di Hong Kong, tang dalam taun 1984 Francisco tu numbuhka kompeni iya empu ngatur reta ti benama Intergrated Financial Services.
Nitihka penerang-penerang dalam rekod awam di menua Hong Kong, Intergrated Financial Services, ke terubah iya ngemataka reta dalam kompeni-kompeni enggi sida Taib sebilik nyengkaum kompeni Natalite Investment Ltd, ti udah diambi-alih Intergrated Financial Services ba ujung taun 2009 suba.
Diatu Francisco C Sebastian nya udah nyadi Presiden ke Philippines First Metro Bank, ti dikumbai iya “sebengkah bank awam di menua” nya.
Tu mega mai reti ti madahka pemujur niki pangkat dalam pengawa iya nya bepelasarka pengawa iya ti mantu pengawa kamah sida Taib sebilik, seraya ti nyadika nomini enggau pemegai share dalam kompeni sida nya.
Kaul ti bukai
Bisi kaul ti berupai bendar entara kompeni-kompeni enggi Shea Kin Kwok di menua Hong Kong.
Sekeda rekod bisi nunjukka sepengudah opis chukai Jepun bejalaika pansik ba duit suap kayu batang dalam taun 2007, bisi dua bengkah kompeni nya dipadamka.
Regent Star Co enggau Grand Will Ltd udah ditutup kena 9hb November 2007 suba.
Tang, utai ti nyelai dikereja udah nya, kedua buah kompeni nya udah ditumbuhka baru ngena nama bala pengarah ti bukai kena 21hb Disember 2007.
Ba hari ti sama mega, iya nya kena 21hb Disember 2007 nya sebuah agi kompeni bisi ditumbuhka di menua Hong Kong, benama Tess Limited. Kompeni nya ngembuan nama ti sebaka enggau kompeni asal ti melanja iya, iya nya kompeni Ridgeford Properties di menua UK enggi sida Taib sebilik.
Kompeni Tess Limited nya direjista nyadika sebuah kompeni BVI (British Virgin Islands menua tasik) ti enda ditemu nyadika pemegai share iya, TOA Services Ltd. Chara penumbuh kompeni nya endang dikena nyarutka penemu opis-opis bekuasa di menua Hong Kong.
Pekara ti narit ati nya, taja pan kompeni TOA services Ltd nya enda direjista di menua BVI, tang iya madahka opis iya bisi ngena alamat ti sebaka ba PO Box No 438 nyadika kompeni TESS Investment di menua Tortola BVI, ti melanja kompeni Ridgeford Properties di UK.
Ridgeford Properties nya ‘diempu’ anak indu Taib, Jamilah Taib lalu dikemataka (sekali agi) laki iya ti bebansa Kanada iya nya Sean (Hisham) Murray.
Alamat peti surat ti sebaka di BVI, iya nya POBox No 438 mega nyadika alamat ke sebuah agi kompeni sida, Astar Properties. Astar Properties mega bisi sebuah share dalam kompeni Sitehost Pty, ti nyadika kompeni Australia ti enggi sida Taib sebilik di Adelaide. Sitehost Pty bisi sebuah hotel, Adelaide Hilton enggau pasar besai Victoria.
Astar Properties mega nyadika pengempu asal ke Ridgeford properties di London, ti bisi reta tanah manggai bejuta-juta pound.
Ba pengawa nyadi siku tuai ti mega penjawat awam ti mengkang bingking lalu enggai nyurutka diri sepengudah 50 taun dalam pengawa politik, chukup tauka enda Taib patut ngembuan ulah tebuka mimit pasal pengaya ti udah enggau ti benung ditugungka iya nyentuk ke sehari tu?