“Panatai kali kedua Anwar Ibrahim. Iya niki ke puchuk tang udah nya dipasukka dalam rumah jil. Diatu tuai penyakal Malaysia nya bediri baru ba pintu pemenang ba pengawa bepilihbesai” [suratberita Independent, UK]
“Anwar Ibrahim, tuai penyakal Malaysia, diatu bediri semak agi ngagai kuasa ti deka betukar enggau chara demokrasi ari sebuah perintah pemadu lama di dunya ba pengawa bepilihbesai hari Minggu tu” [suratberita Telegraph, UK]
Artikel-artikel ari dua buah suratberita tebilang di UK ti enda sebaka penemu politik nya, Telegraph ti lebih agi chundung ngagai penemu konservatif enggau Independent ti lebih liberal, udah meri penerang ti ngembuan jaku tangkan ngasuh bejimat-jimat ba penerang ti madahka Anwar Ibrahim, Sapit Menteri Besai Malaysia dulu suba nya, disadang deka ditentuka nyadi tuai menua ti baru.
Tambah mega, sehari kemari ke terubah iya undi-undi dalam media perdana udah nunjukka Anwar Ibrahim lebih agi dikerinduka mensia mayuh lebih ari Najib nyadika Menteri Besai, lalu ayun sukung ti penudi nya chundung agi ngagai raban penyakal.
Taja pan bisi pengawa meri duit suap ti balat dikereja, enggau keruga, taja pan ditangkan ti madahka projek deka diketuka enggau taja pan semaya-semaya deka ditunaika tiap hari ari BN.
Engka rakyat Malaysia diatu udah leju enggau perintah ti pemadu lama di dunya?
Enti perintah-perintah bedemokrasi bukai di sebelah dunya tu ulih nerima ubah, ulih tauka enda Malaysia ngaga pemutus runding diri deka ngereja nya?
Tang suratberita Finacial Times udah nunjukka pengerak ti ngeregaska agi ayun dikena ngelaban BN nya bala pengundi ti biak enggau pengundi baru ti udah mereti lalu ngelala penyalah makai suap. “Iya [pengundi baru] ngelanggur deka ngundi penyakal laban iya berasai malu ke penyalah makai suap lalu bala tuai enda tau ditanya”, pia ku suratberita FT.
Artikel nya mega nunjukka baka ni Najib nyata bendar bebelika undi ba minggu-minggu ti udah.
Pengarap ti ngujungka berita-berita di menua tasik pasal menua Malaysia ti madahka ekonomi Malaysia nya mujur.
Tang mimit aja bala orang ti deka pechayaka BN endang bepanggai ba pengeraja asal tanah Malaysia, lebih agi pengeraja asal ari menua Malaysia Timur ti kenu ku sida enda tau abis, enti bebanding enggau pengawa deka ngemansangka ekonomi ngeluarka barang chara moden.
Utai ti mai pengirau ati iya nya ‘pemujur ekonomi’ BN endang bepanggai ba raban kroni ti balat bendar ngulihka minyak, kayu batang enggau pemisi ari tanah ti kenu ku sida enda tau abis.
Sekalika bala pengundi deka nyereminka penguntung-penguntung ti enda lama ba pengawa ngeruga ti udah dibai, tang semina ngagai seraban orang ti enda mayuh tubuh?
Rindu agi ke Anwar
Ba pekara ekonomi enggai pengawa ngundi aja, surat-suratberita UK dipeda baka ti saum penemu ba Anwar Ibrahim nyadika tuai ti ngembuan penan bekelas dunya enggau siku ari orang ti liat napi penanggul ti nuntung.
Suratberita Independent nusui cherita pejalai pengidup Anwar ti ‘ngerinduka ati’ belabuh ari iya ti nyadi reformis biak, ngagai nyadi tuai lumur dua menua, nyentuk ke iya dipasukka dalam rumah jil lalu diatu disadang menang ba bepilihbesai ti deka mai Malaysia nuju demokrasi tulen nengah atur betukar perintah enggau chara ti manah.
Nyerumba nya, rekod-rekod pengawa Anwar ti penuh enggau pengelantang enggau penusah enggau cherita-cherita ti ngasuh takut ti udah disadung madahka pengawa betukar perintah nya kenu deka ngeruga pengarap raban mensia di serata dunya ba Malaysia, diatu enda ulih dikarapka agi.
Cherita pengidup Anwar Ibrahim ti nyau deka sebaka enggau enggi Nelson Mandela ari menua Afrika Selatan nya mega bisi dikenang. Anwar disadang tau nyadika chunto tuai menua, sama ngulihka penyinu perintah-perintah menua Barat sebaka enggau iya ti diatu.
Anwar Ibrahim suah bendar madahka dalam randau iya enggau surat-suratberita menua tasik ti endur iya ke sekali tu ngena semua pengeliat ati iya bejuang lalu enti iya puntan sekali tu iya deka nyerahka pengawa bejuang iya nya ngagai rebak orang ti biak agi.
Tang enti pemutus bepilihbesai nya ditejuka dalam pengakang ati ti endur BN deka ngumbai diri menang taja pan dibalut jaku tuduh ti madahka sida ngena chara ti kamah, penduduk tuai penyakal nya deka nyadi mar agi.
Kedua-dua piak deka betindak enggau lurus ati dalam semua pengawa ba bepilihbesai tu. BN patut enda ngena pengundi antu enggau pengawa kamah lalu kedua-dua piak patut ingatka dalam semua atur demokrasi, parti ti alah tentu ulih menang baru dalam kandang lima taun ti deka datai!