Ba minggu nyin kemari Taib Mahmud udah ngeluarka sebengkah penerang ti deka netapka laluh 18 buah pulau di tasik Bakun nyadika Taman Negara dalam gazet perintah.
Enggau chara nya, engka Taib deka nyadika siku penerima perais orang ti chakah ngulihka pemanah rampa menua.
Tang utai ti ngasuh ati tusah iya nya Taib nadai udah netapka kandang menua dalam taun 1998 suba, iya nya sebedau kompeni Pacific Chemicals nebang semua kampung Bakun nya nyentukka abis.
Kompeni Pacific Chemicals lebuh nya diempu empat iku bala anak Taib begulai enggau kroni dagang iya, Ting Pek Khing.
Sebengkah rampa kampung ti sama bela pemesai enggau pulau Singapura udah dikeruga lalu ditebang dikena ngawakka endur ngaga projek tekat Bakun lalu semua syer ti besai ari asil tebang nya endang diambi Taib enggau bala kroni iya.
Pengawa tu udah nyadika ‘Taman Negara’ nya sebengkah kandang menua endur ngatur dagang temuai rampa menua ti ngemalu menua, laban tebal agi bansa jelu enggau utai tumbuh udah punas, lalu laluh jelu enggau utai tumbuh nya semina bisi tepagang ba pulau-pulau ti bisi ayan ari atas ai tasik Bakun nya. Tu mega nyadika Taib Mahmud majak dituntung jaku kutuk enggau jaku bantah nyadika siku orang ti bependiau hipokrit (bebulaka jaku diri empu).
Batang pengawa Pacific Chemicals ti ngerusak rampa kampung Bakun
Bala pemansik udah mantaika mayuh bengkah penerang ti madahka kaul Taib dalam kompeni Pacific Chemicals enggau mega kaul iya enggau kompeni Ekran Bhd enggi Ting Pek Khing, ti ba pun iya nyadi penerima kontrak ngaga tekat Bakun. Penerang-penerang nya nunjukka baka ni sida Taib sebilik udah ngulihka untung ari pengawa ngerusak kandang menua nya, ti diatu, kenu ku iya deka dikemataka.
Taib enggau bala kroni iya majak betebangka kampung dia taja pan projek Bakun nya udah digantung ketegal penanggul krisis ekonomi Asia ti nuntung Malaysia enggau Sarawak. Pengawa ngulihka batang nya dipeda berupai bendar dikena ngulihka sepemayuh kayu dikena nyediaka tapak endur ngaga tekat nya.
Ke bendar pengawa dagang Ting ukai ngaga tekat, tang ngaga rumah pasang siap. Lalu sapa ti meri iya perengka berumah enggau ramu nya? Tentu iya sida Taib sebilik ti bulih penguntung.
Menteri Pekara Belanja menua maya nya, ti diatu nyadi kepala penyakal, Anwar Ibrahim, mega bisi nusui pasal pengawa dagang sida Taib sebilik bekaul enggau Pacific Chemicals dalam repot polis iya ba perambu ngaga tekat Bakun ti dibalut penyalah makai suap nya. Anwar udah ngamatka penerang ti madahka Taib endang bisi juluk ati betebangka kampung ba kandang endur nya. Lalu Anwar endang patut nemu laban maya nya iya orang lumur dua ba perintah besai.
Pechat ari bansa Ukit
Dalam taun 1998 bisi sebengkah rampa menua ti udu nyelai sereta manah dipeda ti ngelingi Bakun lalu patut ditagaka nyadi pesaka dunya. Kandang menua nya mega diuan sebengkah raban orang asal ti endang udah diau dia kenyau ari beratus-ratus taun tu udah – bansa Ukit.
Raban bansa asal nya udah suah bendar minta ngagai Taib enggau Mahathir Mohamad, Menteri Besai ti dulu suba, ngambika enda ngachau kandang menua nya lalu nyaga pemanah Sungai Rajang, ti diatu udah balat bendar keruh sereta rusak ketegal projek Bakun.
Tang seduai iya majak ngerusak menua nya lalu muru bansa Ukit enggau raban bansa ke bukai ngambika dientapka pendiau di Sungai Asap ti enda manah sereta nyamai diuan, ti endur agi mayuh pampas ti udah disemayaka perintah lalu bedau diberi dalam kandang sepuluh taun tu.
Jaku gerah ari BN
Enggau chara netapka pulau-pulau di tasik Bakun nyadika rampa enggi perintah, terang bendar Taib merambu deka ngapuska kuasa pengempu menua ba raban bansa Ukit ti endur iya bedalih deka ngaga projek dagang temuai.
Diatu mayuh bala menteri BN udah nguji ngayanka pementas ati sida enggau chara ngadaka peluang bekuli enggau nyadi tukang ngaga barang ari pengelandik jari dikena sida nyediaka pengawa dagang temuai, lalu bala orang bansa asal enda agi ulih ngumbai rampa menua nya enggi sida, lalu pia mega sida enda tau bumai betaun di endur nya.
Mayuh orang ulih meragamka sapa raban orang ti deka bulih penguntung ari pengawa dagang temuai nya, ari orang ti deka bempu hotel enggau dagang bukai ti deka dikemansangka dia (ti endur semua projek nya tentu deka dipelanja ngena duit ari tabung menua).
Nyerumba bansa Ukit ti berundingka diri ti bulih pengawa bekuli bekereja ba atas tanah pesaka sida empu ti enda agi deka nyadi tanah sida ila, mayuh agi penguntung deka pulai ngagai sida Taib sebilik enggau bala kroni politik sida.
Taib udah ngena chara lama iya ngeluarka notis pasal perambu pengawa iya ti endur raban bansa asal deka bulih mimit bendar peluang nemu sereta meretika perambu iya nya.
Penerang dalam suratberita Borneo Post nya berat sepiak lalu tentu enda datai ba bala orang ti diau jauh di menua ulu.
Notis nya semina dalam timpuh 60 hari endur serebana tau dikenataika, lalu pengawa tu semina dikereja bala lawyer aja. Chara tu lama bendar udah dikena iya muru orang bansa asal lalu dibayar pampas ti mimit bnedar.
Taib patut nganjung raban pemesai opis perintah iya betemu enggau bansa Ukit ngambika bisi nerangka enggau silik pasal perambu perintah ti datai ngagai menua sida enggau chara ngadaka servis lawyer pechuma enda kurang ari 6 bulan.
Tang Taib semina ngeluluka diri ngena atur demokrasi, lalu ukai iya ti bendar.
Enggau tu, bala menteri PBB tau enda ibuh agi bejaku durah-durah pasal pekara tu. Mayuh orang udah nyima ati udah ninga MP Santubong ti mega Sapit Menteri Pengawa Berumah, Wang Junaidi Tuanku Jaafar ti madahka bansa Ukit dikemendarka diau nguan langkang melepung sida tang sida enda dikemendarka bumai betaun baka selama, iya nya tebang-enggau-tunu.
Nama kebuah iya enda madahka pekara tu ngagai tuan iya Taib Mahmud dalam taun 1998 suba? Bala pemacha laman tu dipinta nyain petisyen pasal netapka Bakun dalam gazet perintah.