Kepala Menteri Sarawak Abdul Taib Mahmud seruran ngumbai kuasa pengelantang iya empu patut dikena ngereja sebarang utai nitihka peneka iya empu. Betanya tauka mantah tauka enda nurutka peneka iya deka dikumbai iya ngelanggar kuasa pengelantang iya.
Taib udah bulih rampa kampung ti besai bendar, ngerusak kampung pemadu berega di dunya enggau nubai batang sungai lalu iya mega kala madahka diri “bisi mayuh duit lebih ari ti ulih dipelanja iya” asil ari pengawa ngerampas kandang menua di menua Sarawak. Tang, kuasa pengelantang orang bukai baka ti dikelala dunya, udah enda dikibuhka iya.
Kena 2hb Lapan tu tadi, sebedau tembu pansik ba empas ngagai rampa menua tauka sebedau bisi sebarang pemendar ke projek Tekat Baram ti udu napi jaku kutuk orang, Taib udah mansutka arah iya dalam suratberita Borneo Post, ti ngasuh Perintah menua Sarawak ngambi tanah adat asal, laban tanah nya “dipeguna”.
Arah ti sumbung nya semina meri timpuh maya 60 hari ke bala orang bansa asal ngiga raban lawyer ngarika sida ngelaban pengawa ngambi tanah sida nya.
Tang, Tekat Baram mengkang nadai sebarang ikas ti betul ba undang-undang lalu bala orang bansa asal enda dipadahka dulu, lalu semina mimit aja ari bala sida nya ti bisi macha surat berita Borneo Post, tang mayuh agi bala sida nya deka lenyau tanah pesaka sida sebedau projek nya dikemendarka.
Raban NGO International Rivers udah mantah pengawa ngelanggar kuasa pengelantang mensia enggau orang raban bansa asal nya.
Ngelama tu mayuh bendar raban bansa asal udah ditipu lalu dirampas tanah pesaka ulih perintah menua ti betuaika Taib, enggau nadai bulih sebarang berita, bantu ari lawyer tauka penerang ti chukup
Orang ti kala nipu maya bepilihbesai awakka menang ba kerusi Baram diatu udah regas bendar ngansak pengawa ngaga tekat ti nadai guna nya lalu nyakal penemu enggau peneka orang bansa asal di menua nya. Nambah ke nya CEO Sarawak Energy Berhad bebansa Norway, Torstein Sjotveit chakah bendar ngansak projek nya dipajakka nyentuk ke tembu.
Tang, Taib endang ngarapka semua utai ti dikedekaka iya nyadi magang. Iya endang nadai ditemu deka ngasuh projek nya diketuka.
Merintah nya kuasa?
Taib seruran ngumbai diri ulih nabanka sebarang utai ti dikeinginka iya laban ngelama tu iya endang teleba bependiau baka nya, sekali ke pengawa nya betul tauka salah. Agi mega perintah ti diuluka iya mengkang regas ngiga chara ngena semua kuasa elektrik ari Bakun, ti digaga ditagaka deka dijual ngagai Semenanjung Malaysia, nyentuk ngagai Kepala Menteri nya enda ulih enda nerima perambu iya nya enda senutuk enggau penemu saintifik.
Langgur iya ti baru diatu nya nukar kampung asal nyadi kampung batu ti penuh enggau perengka dikena ngelebur besi ti ngena kuasa elektrik ari Bakun lalu endur iya nugungka bala pengereja pengawa ari menua India, ba projek ti benama SCORE.
Lalu laluh ari kampung paya bakau ti berega tinggi di Sarawak enggau mega kampung tanah gambut deka dirusak laban dikena meri awak endur ngaga palan “hab dagin halal”, dikena nupi jelu sapi enggau kambin ke dijual ke menua Arab di Timur Tengah.
Penemu tu endang ke penguntung dagang sida Taib sebilik. Kami udah kala mantaika baka ni Taib udah salah guna penuduk enggau kuasa menteri ngulihka duit jali ti mayuh dikena beranakka puku dagang ba pengawa ti nadai guna. Perintah Sarawak ditemu nginjau bon RM30 billion, taja ba pun iya Sjotveit udah nguji ngelalaika penerang pasal pekara tu. Kami deka nuduhka penemu awakka kompeni-kompeni ti deka bedagang enggau perintah ti jai nya enti sida enggai ke pemanah nama sida kena balut pengamah penyalah makai suap enggau atur ngelanggar kuasa pengelantang mensia.
Nya tau nyadika pengingat ke Kepala Menteri ti seruran chakah ngulihka tanah pesaka enggi raban orang bansa asal. Lalu sekumbang Aum Besai Gerempung Pengeluar Kuasa Hidro Entarabansa ti diatur di Kuching bulan Lima tu tadi, bala pengari ari Sarawak udah tepejal ngaku mayuh penanggul udah nyadi lalu diputarka enggau chara ti salah ba undang-undang.
Raban bansa asal ti dituntung penanggul ari Bakun lalu enda dipampas enggau menuku sepuluh taun tu udah ngenataika penyai nama menua Malaysia ba mata dunya.
Lalu Sarawak Report udah mantaika enggau silik agi langgur dikena muru raban bansa asal pansut ari projek Tekat Murum ti nadai reti nya, ti endur sida nya nadai dibayar pampas ti menuku. Taja pan baka nya, Sjotveit udah madahka peminta ari raban bansa asal nya benung diperundingka.
Ba aum besai pengeluar kuasa hidro entarabansa tu tadi, sida udah balat bendar bejuraika nya raban bansa asal di Murum udah dipampas enggau penuh, lalu nambah ke nya sida mega dipajakka pindah ninggalka menua asal sida empu.
Tang raban NGO International Rivers udah mansik sereta meresa gaya utai ti bendar di Murum lalu repot sida deka dibantaika ti endur raban bansa Penan Barat di endur nya dituntung penanggul kena buru ninggalka pendiau sida lalu disemayaka pampas ti enda nyata – janji ti tau enda ditunaika laban sida enggau perintah nadai ngaga kaul ti meruan ba undang-undang.
Nya kebuah orang Baram enda tau enda angkat.
Sida enggau mega orang di Murum enda patut arapka Taib lalu sida patut enda ngasi kea rah iya.
Menua Malaysia endang nyadi kaban dalam UN ti nyain sempekat besetuju enggau menua-menua bukai di dunya tu bebasaka atur pengelantang mensia, lalu komuniti dunya mega nyukung semua raban bansa asal Sarawak, lalu ukai semina bebasa ke penemu Taib siku aja ti deka ngulihka penguntung ke iya empu.
Tiap iti papan notis ba tiap buah rumah panjai enggau genturung pendiau di Baram patut ukai semina endur ngelekatka jaku arah ari Taib, tang patut mega endur ngelekat tauka mandangka sekeda artikel ti bisi dalam Penetap UN bekaul enggau Kuasa Pengelantang Mensia enggau Orang Bansa Asal nyadika pemuka mata ti madahka komuniti dunya endang meruan ngarika sida.
PENETAP UN BEKAUL ENGGAU KUASA PENGELANTANG ORANG BANSA ASAL
Artikel 10
Bala orang bansa asal enda tau dipejal ninggalka tanah pesaka sida empu. Nadai palan pengentap pendiau tau didirika enti ukai ari setuju enggau peneka orang bansa asal enggau udah bekau sida dibayar pampas, lalu enti ulih sida patut diasuh milih mulaika diri baru ngagai menua lama sida.
Artikel 18
Orang bansa asal patut dibai ngambi bagi lalu mega dibai ngaga pemutus runding ti bekaul enggau pekara pengelantang sida, nengah pengari sida, kelimpah ari nentuka pemansang institusyen ngaga pemutus penemu ke raban bansa sida empu.
Artikel 26
1. Orang bansa asal bisi kuasa atas tanah, menua enggau pemisi asil menua ti diturunka ngagai rebak sida, endur sida diau tauka dikena tauka diulihka sida empu.
2. Orang bansa asal bisi kuasa dikena sida ngempu, ngena, ngemansangka sereta bekuasa atas tanah, kandang menua enggau pemisi asil menua ti diturunkan aki ini sida.
3. Perintah menua patut ngelala lalu bebasaka tanah nya, kandang menua enggau pemisi asil menua. Pengawa dikena ngelala nya patut nyengkaum adat, gaya idup enggau atur ngulihka sereta ngempu tanah raban bansa asal.
Artikel 32
1. Orang bansa asal bisi kuasa nentuka lalu ngemansangka pemisi sida enggau chara dikena sida ngemansangka tauka nguna tanah sida tauka kandang menua enggau pemisi asil menua ti bukai.
2. Perintah menua patut berunding enggau bekerejasama enggau niat ti manah enggau orang bansa asal nengah institusyen ti ngarika sida dikena ngulihka pesetuju sida ke sebarang pengawa ti deka ngeruga tanah enggau kandang menua sida.
3. Perintah menua patut meri sebarang chara ti manah dikena bejalaika sebarang pengawa lalu mega besedia enggau sebarang atur dikena napi sebarang penanggul ba rampa menua, ekonomi, kaul entara mensia, gaya idup enggau jalai pengarap.