Bisi penerang madahka mayuh ruang bilik orang asal ti dipejal ninggalka menua lama sida di Murum lalu tetemuka pengentap pendiau baru ti enda meruan sereta agi mekang-mekang tembu, enda baka ti disemayaka kompeni Sarawak Energy Berhad (SEB) ngagai sida.
Ba minggu nyin kemari bala temuai ti bisi ngabas orang diri sebilik ti dituntung penanggul dientapka baru di Murum nya, semina diberi bauchar dikena sida tama ngagai rumah panjai ti baru, tang rumah panjai nya enda chukup dikena nangkup pemayuh tubuh raban orang diri sebilik ti baru datai kia.
Ruang bilik orang ti dituntung penanggul nya ti baru datai dia nyau minta sereta nyanda endur sida ngenduh ari bala kaban belayan sida ti udah dulu datai dia, ti endur enda kurang ari 3 ruang bilik orang diri sebilik bekunsika siti penaik.
Tang penanggul ti ditapi sida ti ba palan pengentap pendiau ti baru nya mimit lantang agi bebanding ke enggau penanggul ti ditapi bala orang diri sebilik ti benung betan ba tapak empang jalai di Murum, ti diau dalam langkau arau di sebelah tisi jalai nuju tapak projek nya.
Diasuh diau bepadat dalam sebuah bilik lalu diberi bekal beras dalam kambut
Pemar gaya idup ti ditapi raban bansa asal tu bebida bendar enggau jaku penerang ari sekeda orang baka Datuk Torstein Dale Sjotveit, siku CEO dalam kompeni SEB.
Datuk Torstein kala didinga mantah jaku kutuk sekeda orang ti endur iya madahka palan pengentap pendiau nya diatur enggau chara pejal ba orang bansa asal nya deka ngemanahka pendiau enggau pengidup orang ti diasuh ngentapka pendiau diri baru ti bingking enggai tama ngagai palan nya.
Tang mayuh bendar penerang ti ngayanka raban bansa asal nya udah dikeduan enggau chara ti jai.
Raban orang diri sebilik nya udah diburu pansut ari menua lama sida empu enggau enda betimpuh-timpuh, udah bekau pengawa ngisi tekat Murum belabuh dikereja ba bulan nyin kemari.
Udah nya rumah panjai lama sida ditunu SEB, nyengkaum reta tengkira sida, baka enjin sangkut, ti tau ditagih sida ganti baka ti disemayaka ngagai sida.
Diatu sida nemu diri diasuh diau ba rumah ti bedau tembu ba tengah-tengah rampa menua ti puang sereta kusi, iya nya sebengkah kebun dandang besai ti enda dikereja agi, nadai perengka-perengka ti diguna baka sekula tauka klinik lalu, enti bisi pan, jauh berbatu-batu ari pendiau baru sida nya.
Ba palan pengentap pendiau ti baru nya sida nadai agi endur ngasu-beburu, ngupa-nubu, baka di menua asal sida suba, lalu sida enda ulih nambangka perengka pemindah kin-kitu ngena duit pampas RM800 sebulan ke sebuah ruang bilik ti disemayaka ngagai sida nya,
Enggau nya, dikena sida beridup, SEB semina meri sida bekal beras dalam kambut, diengkahka ba luar penaik sida, ti kenu ku penerang ari SEB, bekal beras ti nyampau nya deka chukup ke guna sida dalam pengelama sebulan.
Baka tu chara ngubat nembiak mit ti dituntung penanggul pengerai kurang pemakai ti manah?
Raban orang bansa asal ti kala ngasaika penyamai pemakai ari babas enggau sungai sida, ti diatu udah diampuhka ai tekat Murum ti dikereja Perintah Menua Sarawak.
Kenu ku siku ari orang bansa Penan ti bisi berandau enggau siku tukang gambar ti ngabas sida, jelu diberi makai ti manah agi ari sida.
Beduan bala orang ti mantah?
Sebana bala orang bansa asal di Metalung ngayanka sebarang sapa sida ti ninggalka diri laban mantah pengawa pindah nya udah ngayanka diri nya enda ulih arapka jaku semaya SEB tauka Kepala Menteri Sarawak, Abdul Taib Mahmud.
Mayuh agi bala orang diri sebilik ti ngemeranika diri betan ba empang jalai dalam pengelama beberapa minggu ti udah, diatu dituntung mayuh macham pemedis, nitihka penerang ari bala temuai ti ngusung endur nya.
Sida iya bepanggai ba bekal pemakai ti enda menyana baka ruti enggau mi, ti diberi bala penyukung ti ngusung sida.
Tang sida mengkang nganti semaya betulis ti ulih diterima sida, sebedau sida besetuju muka empang jalai ti didirika sida nuju tapak tekat Murum nya.
Sapa ti ulih nyalah sida ke pengawa sida nya?
Semaya betulis nya deka meri jamin ke pemanah enggau pengelantang pengidup sida dikena nukar gaya pengidup sida ke diatu.
Agi mega enti SEB ulih ngaga tekat semesai tekat Murum nya, nama kebuah sida enda ulih ngaga palan pengentap pendiau awakka pulai ke pengelantang pendiau raban bansa asal ti dipejal sida pindah kia?
Bala tukang gambar mega mujur ngambi gambar seraban polis pengerara penyarut FRU ti dikenakutka orang dikena nambahka pemayuh bala polis bejaga di endur nya, dikena ngemba sereta beduan orang bansa asal ti ngibun empang jalai dia awakka sida badu ngempang jalai dia tang enda diberi sebarang jamin ke pengidup sida jemah ila.
Bisi mega sekeda repot ari bala orang asal ti nusui pasal raban polis ti bejaga semak empang jalai sida nya udu ngirup ai bisa sereta dipeda mabuk.
Ba orang bansa asal ti enda ngirup ai bisa, ulah bala polis nya ngasuh sida udu irau laban sida napi bala orang penerit adat menua ti bisi senyata.
Berebak enggau nya mega , siku ari temuai ti ngusung palan pengentap pendiau ti kedua di Tegulang nya madahka dinding rumah dia beramuka plastic, dipeda baka sebuah pendiau ti nadai pengidup lalu didirika ba tengah menua ti kusi, ti nyadika sebengkah kelese ke raban orang bansa asal ti nyelai sereta manah gaya idup nya. Palan pengentap pendiau nya nyereminka kuasa kasar perintah bekoloni ba atas orang bansa asal. Sida berasai malu bendar digaga baka orang ti tasah tauka tepawah pendiau di menua diri empu.
Tanggungpengawa sosial korporat?
Bala orang luar ti ngusung palan nya sama betanyaka nama batang pengawa Sapit Presiden SEB ari menua Tasmania ti ngatur pasal ‘pengentap pendiau’, ‘tanggungpengawa sosial korporat’ enggau ‘jurai penemu ke raban bansa’.
Orang ti ditanyaka nya iya nya Nick Wright, ti dijali kompeni Hydro-Tasmania ari menua Tasmania dua taunt u udah ngambika bisi ngatur pengawa pengentap pendiau ke orang bansa asal di Murum.
Batang pengawa iya nya nentuka “pengawa beikas pemadu manah ba renggat entarabansa” dipejalaika baka ti dikemesaika bos Hydro-Tasmania empu, Roy Adair, ba sebengkah program jaku randau ba TV di Australia dulu suba.
Pengawa ti manah!
Nick Wright enggau sida sebilik diatu diau di nengeri Kuching, idup enggau lantang, atas gaji ti besai bendar, nyengkaum perengka-perengka diguna ti manah-manah.
Lalu beserimbai enggau bala anak raban bansa Penan kena rampit penyakit kulit lalu diau dalam pemar ti udu lalu nadai dibantu ba pekara perubat lalu nadai besekula, bala anak Nick Wright empu nya dianjung besekula ba sebuah sekula pemadu manah di nengeri Kuching.
Lalu lebuh maya sida sebilik benung ngelantangka diri memarin di tebing tasik di Sarawak, idup sosial di Kuching enggau penyamai idup ngena duit gaji ti mayuh, bisi tauka nadai sida Nick Wright ngira bala anak bansa Penan ti dibai apai indai sida diau nguan langkau arau sebelah tisi jalai betunga mua enggau raban polis ti besenyata di Murum?
Agi mega Nick Wright endang diberi tanggungpengawa dikena nitihka atur ti begunaka sempekat ti silik enggau (abis kurang iya) bayar pampas ti lurus. Lalu iya mega udah ditikika pangkat mangku pengawa nyadi orang ti landik, ti dijali Hydro-Tasmania dikena sida ngasuh dunya temegah ati ke atur pengawa pemadu manah menua Sarawak ba pengawa ngaga tekat ai nya.
Kami ulih nentuka, enti Nick Wright, tauka petunggal Taib, Hamed Sepawi, tauka Taib empu, kala dipinta orang meri awak ke projek ti besai-besai, sida tentu deka minta dipampas enggau rega ti lebih ari patut.
Sekali ke Nick Wright tauka Hamed Sepawi tauka Taib Mahmud deka besetuju dipindahka semina disemayaka ngena sechebik keretas ti nadai bejamin ke sebarang rumah endur diau maya sida datai ba sebarang palan pengentap pendiau?
Tauka, semina ngena semaya kabur ti ditaburka perintah menua ti tau nyelamatka sida ari pensuah keberuran beridup ba gaji pemadu mit?
Tang lebuh sida Nick Wright ulih beridup enggau lantang, kompeni tuan iya enggau menua Sarawak mejal bansa Penan ngambika nerima pakej pemindah nya ngena ujung senapang.
Nick Wright engka bekereja ba siku orang politik ti kasar pendiau sereta udu bedendam, Taib Mahmud, enggau tuan iya ti udu kena keduan nya, Datuk Torstein Dale Sjotveit.
Tang, sebuah pengamat nya diterangka diri empu, kitai deka arapka tu meih maya iya patut angkat lalu ngelarika diri ari bala orang ti beduan iya lalu ngereja utai ti manah ke raban bansa Penan.
Dunya diatu benung meratika iya.
