Ba ujung minggu tu tadi sebuah opis pekara pengarap Islam perintah, Jakim, ti bejalaika atur sida ari luar Opis Menteri Besai, udah ngeluarka arah awakka semua mesjid di menua Malaysia ngutuk “kuasa-kuasa liberal” dalam internet, ti udah dituduh sida nguji ngelemika raban orang Islam.

Sarawak ti nyadika sebengkah menua meri ungkus belanja ti besai lebih ari patut ngagai Opis Menteri Besai lalu pekara nya patut nyadika jaku tanya sekali ke patut tauka enda, menua ti bedemokrasi berubah nyadi menua totalitarian ti endur pekara jalai pengarap mega dirampas lalu dimain-main sekeda raban orang politik?

Patut, tauka enda sebuah opis ti di luar opis Najib nuliska jaku ajar dikena ba sembiang ngambika dibaca bala tuai-tuai sembiang dalam mesjid sida?

Baka ni jaku ajar nya udah belabuh ngajar pasal peneka bejaku dalam internet; jaku bantah ngagai pekara politik ti dikemendarka enggau jaku kutuk ti ngelaban penyalah makai suap nya tau ngelemika pejalai pengarap Islam?

Jaku ajar ti dikena maya sembiang nya udah nguji ngubah cherita lama menua (sejarah menua) lalu bemain-main ba ulah enda ibuhka utai bukai, lalu meri buah penemu ti madahka pengawa angkat ngelaban perintah di menua Ejip, munyi ti disaraka nya datai ari internet, nya nyadika sebengkah atur pengawa dikena ngelaban Islam.

Ke bendar iya, baka ti endang ditemu semua orang ti ningaka berita nya, bala orang mayuh ti udah angkat ngelaban Mubarak nya suba endang ari raban penyukung ti taluk ngagai gerempung-gerempung Islam, ti diatu udah kena keruga rampas kuasa perintah soldadu.

Bala penulis jaku ajar bepolitik ke Menteri Besai nya diatu dipeda nguji ngenyarutka penemu rakyat Malaysia awakka arapka batang penemu ti madahka Islam nya pro-penumbuh lalu mega, pro-BN!

Pengirau ati disaraka dalam Parlimen UK

Ari pengawa BN ti masuk champur, ti seruran ngiga chara ngelemika raban orang ti talukka jalai pengarap dikena ngemuaska juluk politik sida, diatu benung nyadika perati dunya demokrasi ti besai agi rampa.

Nyerumba menua Malaysia ti nguji ngemanahka nama diri di menua tasik nyadika sebuah menua ti sedang tauka rumpas, moden enggau ulih bebatak-asur, perintah ti betuaika iya agi bejalaika pekara pengarap ngena atur ti lama, enggau chara ngarak raban ti dikena nyukung kempen-kempen ti ngembuan penemu politik bebagi-bagi.

Atur ti dipejalaika Opis Menteri Dalam menua ti muputka ulah bechiping ngagai raban orang Kristian ngena kempen sida nagang leka jaku “Allah” dikena, udah disaraka bekaul enggau pengawa ngelaban raban Kristian ti sekeda menua Islam di Timur Tengah kenyau ari beberapa hari tu udah.

Ba maya besaraka penemu dalam rumah Parlimen UK, MP Tom Greatrex, siku raban Komiti Semua Parti ti bekaul enggau menua Malaysia, nunjukka baka ni Malaysia diatu benung nuju sebengkah raban menua-menua ti endur rakyat sida ti orang Kristian udah berasai takut ketegal kena pejal. Iya udah nunjukka sara iya ngagai menua-menua ti diuan mayuh agi orang Kristian di Malaysia Timur.

Orang ti ngepunka sara nya, MP Fiona Bruce, madahka isu nya lalu iya madahka pengirau ati majak betambah bekaul enggau keruga enggau keduan ba bala orang Kristian di serata dunya, ti datai ari pemenchi sekeda raban ti ngembuan juluk politik.

Sebuah repot ke baru diatu ti datai ari gerempung pekara pengelantang orang Katolik, Aid to the Catholic Church in need, udah nunjukka, dalam 130 buah menua di serata dunya, endang bisi keruga ba orang Kristian dikereja.
Ambi ke banding, pekara ti bekaul enggau pengawa nyiping enggau pengasar dikereja, MP Fiona Bruce bisi ngenang pasal siti insiden ti udah nyadi di menua Iran ba bulan nyin kemari.

Malaysia patut milih jalai-jalai bukai

Raban orang Kristian balat bendar irau ke menua Malaysia nya tau singit ngagai oleh ti sama, lalu pekara tu enda ngasuh orang tekenyit. Ari berita ti ayan ba ujung minggu tu ti ngerekod tinjau Menteri Pekara Orang Islam Sarawak, Daud Abdul Rahman, ti meri penemu iya awakka raban penerit adat ba Opis Pengarap Islam Sarawak patut diangkatka agi nyadi ‘Opis Dawa Shariah’ lalu sida mega patut dibekalka enggau senyata api!

Tu mih siku menteri ti udah dikemendarka moral jalai pengarap iya meri kontrak awam beribu-juta ringgit ari opis pekara pengarap Islam ti dikemataka iya enggau opis perintah ti bukai, dspasukka ngagai kompeni-kompeni iya empu!

Dalam pengerembai pekara tu, siti jaku tanya patut dikenataika, nama kebuah, ba menua ti mayuh agi rakyat bepengarap Kristian, nadai siku menteri tauka opis menteri Pekara Orang Kristian ditumbuhka? Lalu nama kebuah, lebuh duit orang mayuh berungkus bejuta-juta ringgit enggau rega tanah dipintaska dikena nyukung pengarap Islam, lalu nadai sesen pan dikena nyukung pengarap raban orang ti mayuh agi tubuh di menua nya?

Parlimen UK udah mujur meresa gaya pekara ti udah amat nyadi lebuh menua-menua ti ngembuan rakyat mayuh pupu jalai pengarap enggau bansa deka dikemendarka lalu diasuh ngerembai penemu ti kelalu lunggar enggau bechiping, taja pan ba dunya ti moden tu.

Disadang lalu bisi ditemu sekeda gerempung jalai pengarap ti nguji ngentapka diri di Malaysia. Gerempung-gerempung tu nyengkaum raban-raban NGO Islam ti landik ba atur serang bala raban orang ti ngemataka pengelantang mensia lalu nuduh sida enggau chara ti kasar nyadika ‘pemechat orang Islam’. Raban-raban NGO Islam tu nyau majak bulih pemendar ari perintah sida.

Tuduh ngagai raban orang ti ukai Islam enggau bala orang Islam liberal udah belabuh dilancharka lalu atur-atur sembiang ba jalai pengarap ti udah diterima orang mayuh dalam pengelama beratus-ratus taun ti udah nya dikutuk sida lalu dikumbai salah ba adat menua.

Bisi sebengkah dalih ba ulah tu lalu iya nadai bekaul enggau jalai pengarap tauka penemu ti diajar jalai pengarap.
Iya bekaul enggau juluk ati ti deka numbuhka seraban penyukung ngambika ngelala sebengkah parti politik nyadika raban ti ‘pro-Islam’ lalu sida ngumbai semua parti ti enda sebaka penemu enggau sida nya ‘anti-Islam’.

Jalai ti udah dipilih nya tau bendar ngerusak menua, laban nya tau ngeruga, bechiping sereta ngenataika penakut ke raban orang ti ukai Islam di Malaysia Timur. Sida bisi kuasa nyadi takut laban sida enda nemu kini penunga pejalai pekara tu.

Dalam sara iya, MP Fiona Bruce udah nekanka batang principal dalam Penetap Kuasa Pengelantang Mensia lebuh semua orang nyau belabuh betalatka pasal jalai pengarap lalu bala penulis jaku ajar ti ngemesaika UMNO/BN patut ingat.

Adat menua, tauka undang-undang, di Malaysia diatu udah belabuh enda ibuhka batang principal nya. Nama kebuah, ambi ke banding, sekali ke orang jalai pengarap bukai enda tau jadi melaki bini tauka diajar jalai pengarap nitihka peneka ati sida?

Enggau nya, engka menua Malaysia patut nuju ke mua dikena ngemanahka kuasa-kuasa pengelantang mensia kelimpah ari nejuka sebarang pekara nyadi kelalu lunggar majak nyadi?

Beserimbai enggau nya, enti Menteri Besai, nengah opis Jakim, udah bebendar ngiga kuasa meri jaku ajar maya besembiang ngagai bala jemaah sida ninting minggu enggau ba tiap iti mesjid, nama kebuah nagang orang bukai ngena internet?