Sarawak Report diatu ulih ngayanka sebengkah entelah pengasar apek bayat pemadu balat ti benung nyadi di menua Sarawak ti udah ditemu saut iya nya bisi kaul enggau pangan diri.
Ke bendar iya, Kepala Polis Pelilih Serian, DSP Mohd Jamali Umi, nya bekaban diri sebilik enggau Menteri Perambu Pengawa Awang Tengah ti ngemataka siti ari kompeni ti ngulihka kayu batang di pelilih menua Melikin pegai Serian, Sarawak.
Mayuh pemeri penerang ngagai kami udah ngamatka DSP Mohd Jamali Umi nya beipar-biras enggau menteri Awang Tengah (laban bini seduai nya diri menyadi), sebengkah penerang ti enda ditemu bakih politik iya dalam BN, James Jemut Masing lebuh ti ngelancharka sebengkah enkuiri ngagai perintah besai pasal penusah kena hari Lima minggu nyin kemari.
Laban, utai ti deka ditemu tiap iku orang nya, nama kebuah polis Serian nadai ngelindung bala orang bansa asal di Melikin ari kena emba raban apek bayat ti bisi kaul enggau kompeni-kompeni kayu batang ti suah udah dipansutka dalam berita.
‘Kami nadai ngemendarkan raban apek bayat bekuasa di menua tu’ – James Masing
Menteri James Masing udah mansutka jaku udah bekau kepala polis Serian nya ngenyitka ati orang mayuh ti madahka opis polis iya di Serian nadai kala nerima repot pengawa kasar apek bayat di Melikin!
DSP Mohd Jamali udah madahka diri ‘tekenyit’ laban dituduh ‘sengapa’ ti madahka raban polis udah ‘enda engkebut’.
Nyadika jaku timbal iya, beberapa iku orang asal ari pelilih menua nya, nyengkaum 5 iku tuai rumah, udah nemuai ke Kuching kena hari Lima nyin kemari laban deka betemu enggau tuai politik bansa Dayak, James Jemut Masing, ngulihka sukung iya.
Sida madahka iya dalam pengelama bebulan-bulan tu sida kena kachau raban apek bayat ti disadang sida datai ari menua Sibu, ti tama ke dalam kandang kampung NCR sida ngarika kompeni-kompeni United Teamtrade enggau Memaju Jaya.
Siku orang pemegai syer pemadu besai dalam United Teamtrade nya Sapit Menteri Perambu Pengawa Awang Tengah, lalu kelimpah ari nya, syer ti pemadu mayuh mega dalam Memaju Jaya dipegai YB ke dulu suba ari menua nya empu, Frederick Bayoi.
Nyadika reaksyen iya ngagai serebana orang mayuh, James Masing udah ngangauka pengari rakyat BN-PRS ke sitak menua nya, nembiak kaya Snowdan anak Donald Lawan, ngambi bagi dalam jaku randau iya, ti endur iya madahka diri deka ngambi tindak, enggau chara nyerahka penanggul nya ngagai opis besai polis Malaysia di KL enggau ngagai MACC!
Lebuh berandau dalam aum media, James Masing bisi didinga bejaku:
“Nama kebuah kitai patut nejuka pekara tu majak nyadi? Aku minta raban polis jampat bejalaika pengawa sida madamka pekara tu. Kitai enda tau ngemendarka raban apek bayat beraja di menua kitai tu lalu ngachau mensia mayuh ti deka nyaga reta tengkira sida empu.” [Borneo Post]
Malu
Sida ti datai ngagai aum media nya madahka ulah Snowdan ti enda lantang duduk udah bekau iya ninga tuduh penemu ari bakih politik iya ti tuai agi ari iya nya, James Masing.
“Iya nemu pasal utai ti benung nyadi”, pia ku siku ari pemeri penerang ngagai Sarawak Report, “tang nya sebengkah utai ti nyelai agi ari ti diterangka ngagai James Masing”!
Snowdan nya anak Donald Lawan ti nerima bejuta-juta ringgit konsesyen mai masuk kerita ari menua tasik, udah ngangkatka anak iya empu, Snowdan, enggau dalam kabinet menua Sarawak. Donald Lawan empu udah enda mujur ngemunaska penanggul datai ari pengawa apek bayat di sitak menua iya empu nya.
Kami udah nuliska repot baka ni lebuh bala orang asal udah nguji betemu enggau iya, iya madahka sida penanggul nya “kelalu sensitif”, reti nya, sida pechaya ke kompeni-kompeni dia endang bisi kaul enggau bala orang politik di menua Sarawak, baka Awang Tengah!
Jari kepala polis Serian ti kamah
Rara ari James Masing ti enda nemu ujung enggau pun penanggul di Melikin ke dulu suba udah bekau bala orang mayuh enggau pengarang berita berasai tekenyit ninga penerang ti dipansutka kepala polis pelilih Serian nya empu.
Kepala Polis Pelilih Menua Serian, DSP Mohd Jamali udah ngatur aum media iya empu berandau enggau bala pengarang berita kena 6hb November nyin kemari, lalu mansutka reaksyen iya ngagai isi berita dalam Borneo Post enggau Sarawak Report bekaul enggau pemansang keruga raban apek bayat di menua ti dikemataka iya nya.
Iya mega nimbal sebengkah penerang media ti dikeluarka siku lawyer ari PKR, pengari rakyat See Chee How, ti ngarika 17 buah kampung orang bansa asal di Melikin ti kena keruga nya, minta pengawa ngulihka kayu di menua nya patut ditangguhka dulu sepemanjai kes nya dipecharaka dalam kot.
Tang, enggau enda disadang, DSP Mohd Jamali madahka ngagai bala pengarang berita, penanggul ti bansa nya ukai sebengkah penyalah!
DSP Mohd Jamali madahka raban polis nadai nerima sebarang repot pasal keruga bala apek bayat ari Melikin, taja pan beberapa bulan dulu ari tu, mayuh bendar repot udah dikenataika bala orang bansa asal menua nya!
Nambahka nya, nyadika timbal ngagai pengirau ati bala orang bansa asal menua Melikin nya ti nyebut pasal raban polis ti nadai ngelawa sida beberapa minggu ke udah, DSP Mohd Jamali madahka diri enda nemu ulu-ili pasal pekara nya.
Lalu suratberita Borneo Post madahka Kepala Polis nya nyebut “tuduh pasal kes keruga nya enda bendar”.
Baka ni enggau BUKTI penanggul nya?
Sekeda ari bala orang ti datai ngulu aum media nya madahka diri tekenyit ninga penerang nya. Nama dalih kepala polis nya?
Baka ni iya tau enda nemu pasal penanggul nya taja pan suah dituliska dalam surat-suratberita dalam pengelama beberapa bulan tu udah?
Baka ni bala orang ti udah dijamah raban apek bayat, baka Tuai Rumah Sujau, ti dilanggar orang lebuh iya benung nepan motosikal lalu udah nya dipalu nyentuk ke setengah nyawa kena 15hb Sepuluh nyin kemari, enggau siku agi orang, Surik anak Muntai ti balat dijamah lalu berita pasal penusah nya udah dituliska ba surat-suratberita udah bekau iya diserang raban apek bayat lebuh maya iya deka ngambi anak iya pulai ari sekula?
Baka ni kepala polis nya tau enda nemu pasal penanggul ba menua ti dijaga iya, lebuh mensia mayuh betanya, lalu enti orang ti tusah nya enda ngaga repot polis, nama kebuah pengawa mansik nya ditagang ari ti dipejalaika?
Tang lebuh penyalah nya udah dikereja orang lalu ditemu mensia mayuh, lalu udah mega ditusui nengah suratberita, polis patut mansik, sekali ke orang ti tusah nya ulih ngaga repot tauka enda.
Ba kes nya, orang ti tusah semina nyadika saksi, enggau nadai tanggungpengawa dikena ngenataika repot (tang semina nusui utai ti bendar aja).
Kepala polis nya patut meretika pengawa enggau tanggungpengawa raban polis ti diuluka iya lalu iya patut lansik pending ningaka sebarang penyalah ti dikereja orang ti jai di menua ti dikemataka iya munyi ti ditusui dalam suratberita.
Ke bendar iya mayuh repot polis udah digaga!
Sarawak Report ulih mantaika, bebida enggau jaku dawa ti madahka nadai sebarang penusah kala udah nyadi bekaul enggau utai ti disebut kepala polis, tang repot polis KE BENDAR IYA kala bisi dikenataika pasal pengasar raban apek bayat di Melikin.
Kami udah mujur bulih sekeda gambar ti nyadika bukti bekaul enggau siti ari repot pasal serang atas Surik anak Muntai ba bulan Tiga nyin kemari.
Baka ni ku cherita pasal senyata ti udah dirampas polis?
Lalu, kelimpah ari repot polis pasal pengasar raban apek bayat, baka ni ku cherita pasal pemujur polis ti ngerampas senjata di Melikin ti dipejalaika raban polis betuaika DSP Mohd Jamali? Raban polis udah mujur ngerampas mayuh macham senyata udah sida nyerungkai kem kayu batang enggau kem kebun sawit di menua nya, nyadika timbal sida ngagai repot ari orang mayuh pasal pengasar pengawa raban apek bayat.
Berita-berita nya udah serap ditusui di serata Sarawak. Tang nama kebuah kepala polis nya seruran madahka pengasar raban apek bayat nadai kala bisi nyadi di pelilih menua nya?
Sekeda orang tentu deka betanya, sekali ke kepala polis Serian nya endang enggai bejalaika pengawa iya enggau penuh udah bekau macha berita lalu madahka berita nya bula sereta nadai kala nyadi di menua nya, tauka iya ngembuan dalih ti bukai ti ‘bisi kaul enggau iya empu’?
Tang kena hari Lima nyin kemari James Masing bisi didinga besetuju ba mua orang mayuh nya sebengkah silat jaku enti deka bebulaka berita pasal pengasar raban apek bayat di Melikin.
Tang, kaban politik bebansa Dayak nya udah milih deka meri simpul jaku madahka kepala polis Serian nya udah saru penemu, lalu madahka repot polis nya mayuh agi dikenataika ba opis polis bukai!
Penerang ti diterima kami diatu nya nunjukka dalih ‘ti bisi bekaul’ nya jauh mudah agi diperetika!