Kena 7hb Sebelas nyin kemari kepala Sarawak Energy Berhad (SEB) bebansa Norway udah bejimat maya mansutka jaku tuduh iya ba bansa Penan ti ngibun empang jalai sida nuju ke tapak Tekat Murum, enggau cara ngansak kami awakka ngemasukka jaku komen iya dalam laman kami tu.
Nengah emel iya ngagai gerempung NGO Switzerland Bruno Manser Fund (BMF), ti disalinka iya ngagai ruang komen ba laman kami tu, iya udah ngumbai ruang bilik Penan bisi minta duit enggau chara pejal ari mensia mayuh ti deka meraka empang jalai sida.
Pengawa nya, endang salah ba adat menua, laban ngambi duit enggau pejal ari orang mayuh.
Nya alai jaku tuduh nya pekara ti serius ba raban bansa asal ti lemi, ditambah mega tanah enggau rampa kampung sida udah dirampas kompeni besai ti endur Torstein nya bekereja.
Jaku ti disebut iya dalam ruang komen laman Sarawak Report tu, udah bekau pengawa nangkap 8 iku bansa Penan ti dipejalaika 80 iku raban polis kena 7hb Sebelas nyin kemari.
Enggau chara tu Sjotveit udah nuduh Sarawak Report enggau BMF nya raban orang ti pemula lalu bansa Penan nya siti raban bansa asal ti baruh pendiau sereta ngembuan ulah ti jai.
Enti Sarawak Report deka ngenataika sebarang jaku tuduh, sida iya deka beati-ati mansutka penerang dikena nyukung jaku tuduh nya. Tang Sjotveit enda ulih baka nya, lalu iya rindu agi nunjukka diri nya besai agi kuasa ari batang pengawa iya ti nyukung jaku tuduh nya, ti endur iya udah dipeda puntan ngereja nya enggau chara ti betul sereta meruan.
Aram kitai sama-sama meresa jaku saut ke terubah iya ngagai gerempung BMF lebuh sida minta iya meri penerang bekaul enggau atur meri tender ari SEB lalu ngenuluka kompeni enggi anak Taib lebuh meri kontrak ti beungkus beratus-juta ringgit.
Sekali ke iya deka ngumbai orang mayuh di dunya tu enda ulih meda penyumbung iya nya? Enti iya udah leju enggau ‘pemula BMF’ iya patut ulih mansutka pengamat penerang enggau ati ti lurus!
Cherita ti sebubu pasal penemuai raban pengarang berita ngagai Tekat Murum
Jaku tuduh Torstein ngagai bansa Penan mega patut diambi kira ba konteks berita sebubu ba ujung minggu nyin kemari bekaul enggau penemuai raban pengarang berita ti bebulaka berita madahka SEB kala ‘ngemaruhka pendiau’ bansa Penan lebuh penemuai sida ba bulan nyin kemari.
Tu mih berita ti dikenataika ngagai laman Sarawak Report.
Kepala Gerempung Pengarang Berita Sarawak, Sulok Tawie (ti kala didinga muji-muji SEB ba jaku terima kasih iya), udah kala ngenataika penusah ati iya ngagai raban orang ti ngaga tekat ai ti mansutka berita angin pasal bansa Penan nya “idup bepanggai ba pemeri orang bukai lalu sida nya mega raban bansa ti ngelusu”.
Diatu, taja pan, Kepala SEB nya empu udah mansutka jaku tuduh ti jai agi ngagai bansa Penan ti lebih ari ngarapka pemeri ari orang bukai. Iya empu udah nuduh sida bepintaka duit enggau chara pejal ari orang mayuh ti nengah jalai nya!
Nadai sebarang ukum ba bansa Penan
Ke bendar iya, semua bansa Penan nya udah dilepaska ari tangkap polis lalu jaku tuduh ari Torstein nya endang salah.
Nitihka lawyer ti ngarika raban bansa Penan, Abun Sui Anyit, ke semua 10 iku bansa Penan ti udah dilepaska nya “udah dipinta datai ngagai kot di Belaga kena 26. 11. 2013 tu ila ngambika nyaut jaku tuduh S.341 ke penyalah nagang enggau S.448 PC ke penyalah tama kandang endur enggau enda beradat.”
Lawyer Abun Sui Anyit madahka ngagai Sarawak Report jaku-jaku tuduh Torstein nya nadai bekait enggau sebarang tuduh penyalah bepintaka duit ari orang mayuh enggau chara pejal.
Tang bansa Penan nya tetap deka bebulaka jaku tuduh nya lalu sida deka ngetanka diri empu maya dalam kot tu ila.
Agi mega, sapa ti tau nyalahka sida enggau jaku tuduh ti ngumbai sida ‘tama enggau enda bearadat’ ke dalam menua asal sida empu, ti udah endur kompeni Torstein enggau Perintah Sarawak belabuh ngaga tekat enggau chara ti salah kenyau ari taun 2008 suba?
Penumbuh Tekat Murum nya sebengkah pengawa ti bepejal ti udah ngelanggar semua macham atur lalu nadai sebarang sempekat ditanggam enggau orang bansa asal ti mantah, ti endur Torstein diatu bebendar ngulihka pemendar ari sida nerima pampas nya, lalu ngampuhka tekat nya sereta nengelamka menua asal sida.
Ba ujung minggu nyin kemari lawyer Abun Sui Anyit udah mansutka penerang madahka bansa Penan diatu udah ngenataika kes sida ngagai kot dikena ngelaban SEB enggau perintah menua Sarawak, ti ditemu ngelanggar kuasa pengelantang ba adat menua bekaul enggau tanah di Sarawak.
Lawyer nya mega bisi udah mansutka sebengkah penerang ngarika bala anak guaman iya ti serebana kena keruga raban polis ti bependiau mabuk sekumbang bekereja, ti nitihka tuduh iya sida polis nya bisi dibekalka enggau arak diengkahka ba pos jaga sida dianjung kompeni SEB.
Sepuchuk surat surat mega udah dituliska sehari tu ari 27 iti gerempung NGO ngagai Menteri Besai menua Malaysia minta awakka Perintah Menua Sarawak bejalaika tanggungpengawa nyaga kuasa pengelantang enggau pengelikun orang bansa asal ti diburu pansut ari menua asal sida dikena ngawakka pengawa ngaga tekat-tekat.
Chukup maya endur minta ampun
Diatu Sjotveit dipejal minta ampun lalu kami deka ningaka iya.
Lebuh atur nangkap orang bansa asal dipejalaika kepala polis ti bekuasa ba endur nya udah madahka bisi enda kurang ari dua iti repot polis dikenataika ‘orang periman’ ti sereban ke diri kena pejal meri duit lebuh ti meraka empang jalai.
Taja pan baka nya, terang bendar raban polis enda mujur tetemuka sebarang penerang dikena sida nyukung repot nya. Repot nya enda ulih diayanka ba atas keretas jaku tuduh.
Bala orang bansa Penan diri sebilik ti diatu nyau majak suntuk runding ngulihka pemakai, udah minta bantu mata duit ari orang mayuh ti deka meraka empang jalai sida. Mayuh agi bala penguna jalai ti bisi penyinu ati ke sida bisi meri bantu ngena mata duit lalu sebuah tin ti dikena sida nyimpan duit bantu nya ngundan RM700 udah mega dirampas raban polis lebuh sida 8 iku kena tangkap.
Tang Sjotveit nengah emel iya didinga kering bendar penemu ti madahka bansa Penan nya udah minta duit enggau chara pejal ari bala orang ti nengah jalai ti diempang sida. Kami deka nemu, dini iya udah bulih runding tu lalu nama kaul iya enggau orang periman ti udah ngenataika repot polis ti asal nya?
Kami mega deka ninga saut ari Sjotveit ba jaku tuduh ti madahka kompeni SEB bisi mekal raban polis enggau arak dikena sida bejaga ba tapak empang jalai. Pengawa tu tau dikumbai ngaga peransang dikena bejalaika pengawa, lebih agi bisi ari raban polis ti bejaga nya bepengarap Islam. Ulih tauka enda Sjotveit bebula ke jaku tuduh tu?
Komen penuh ari Sjotveit diatu bisi diayanka dalam laman kami tu. Sekali ke udah datai bamaya iya endur siku kepala bepenuduk tinggi dalam SEB ti mangah sereta dipeda enda landik bekereja nya patut diketuka ari pengawa iya?
Torstein • 3 hari ti udah
Chukup maya endur nindukka diri: Aku laun tinduk demalam udah aku ti nuliska saut aku nengah emel nuju Pengarah Lukas Strauman ari gerempung Bruno Manser Fund:
Tabi Lukas [Pengarah BMF], aku sinu bendar ke bala Penan ti ditangkap polis nya, tang aku deka ngeengkahka tanggungpengawa nya ngagai nuan enggau gerempung nuan ngambika kita ngelalau raban bansa nya pasal penanggul ti nuntung sida. Kita tentu nemu nama kebuah sida Penan nya kena tangkap, tang aku nyadang kita deka nyekat pengamat lalu pengamat nya deka nyadi sebengkah pemula ti deka disadung-sadung kita enggau SR dalam pengelama bebulan-bulan ke deka datai tu.
Ke bendar iya, sida udah mindahka empang jalai sida ke ili ke agi lalu nagang pejalai perengka pengangkut nuju Murum lalu sida mega bepintaka duit enggau pejal, tu sebengkah penyalah ti lalu ngujungka raban polis datai lalu nangkap sida.
Aku belabaka nuan tentu deka enchabar aku pasal pekara tu lalu nempa siti agi cherita, tang aku arap bendar entara utai ti bekelulu enggau utai ti bendar, ke dudi ila iya ke bendar nya deka tebantai lalu dikena”
Lukas, aku minta nuan ngereja sebengkah pemanah ke raban bansa Penan, laban kami bisi mayuh bendar projek CSR (Tanggungpengawa Sosial Korporat) ti beguna ke orang ti mayuh penemu baka nuan, nama kebuah nuan enda nguji ngereja nya ke sida dikena mantu sida?
Aku patut ngetu berandau diatu laban aku patut tinduk, enda baka nuan, aku bisi tanggungpengawa ti berat dikena mantu raban Penan lalu dikena aku mantu ngangkatka pengawa pemansang ke orang di Sarawak, nya mih utai ti didirika aku ke penguntung sida.
Selamat malam,
Torstein Dale Sjøtveit
Dikirumka nengah iPad
