Stesyen Radio Free Sarawak ti bisi ngena jaku bansa asal udah ngeluarka sebuah berita sehari tu ti madahka raban bansa Penan Murum, ti dientapka pendiau ba palan ti baru udah madahka sida enda ulih nganjung tauka nerima berita ari luar ketegal tanggul laban ikas ai tekat ti majak niki lalu sida mega madahka bekal pemakai sida nyau majak abis.

Berita nya dikeluarka nyerumba cherita ti madahka CEO SEB bebansa Norway, ti dikumbai udah bekereja bebendar amat bejalaika atur ngubah sereta nyungkak pengidup orang bansa asal Sarawak, disadang deka ninggalka kontrak pengawa iya ke diatu ba ujung taun tu ila.

Gerempung ti rinduka rampa menua enggau kuasa pengelantang mensia, iya nya NGO Bruno Manser Fund, mantaika berita pasal Torstein Dale Sjotveit ti deka badu bekereja enggau SEB ba sebengkah penerang media sida lemai tu tadi.

Serebana raban bansa asal, ti udah dipejal ngentapka pendiau ba sebengkah kandang menua di Metalung kejang hari Krismas iya nya sereta sida udah nembuka pengawa ngibun empang jalai 77 hari, diatu bisi didinga betelefon ngagai Radio Free Sarawak (iya nya sebengkah gerempung berita ti bekaul enggau laman blog Sarawak Report).

Bala orang bansa asal ba palan pengentap pendiau ti baru nya, diau ba endur ti setengah tembu, madahka sida udah minta bantu ari SEB ngambika nganjung bekal pemakai enggau gas dikena sida nyumai, ti diatu majak abis.

SEB udah nyadung bekal pemakai nya sebedau hari Krismas, ti nyadika siti ari pakej pampas ti balat bekontrovesyel nya.

Pampas nya ketegal pengelenyau genturung pendiau asal sida, kampung endur sida ngasu-beburu enggau tanah pesaka sida enggau batang sungai nyengkaum pemakai sida dalam pengelama 4 taun enggau elaun sida ba penyampau RM250 sebulan ke sebuah ruang bilik orang diri sebilik. Penyampau nya jauh bendar mimit ari ti dikarapka sida lebuh maya sida “berunding” enggau kompeni SEB nya suba. Tang datai ke sehari tu, siti pan penanggul nya enda ulih diputarka taja pan ngena sukung ari bala lawyer tauka ngena chara betulis.

Ba bulan ke terubah taun tu, bekal pemakai ti ditinggalka SEB ke sida nya, nyengkaum beras enggau lauk rangkai, udah abis ba musim Krismas enggau rambau nyambut Taun Baru, lalu raban bansa asal nya diatu nyau majak abis gas dikena sida nyumai.

Penusah tu bepun ari ikas ai tekat Murum ti nanggul arus pejalai sida kin-kitu ari kandang menua sida, ti diatu udah ngampuhka jematan ti dulu suba endang ditengah sida kin-kitu meraka batang sungai ti ngelingi genturung pendiau sida.

Penusah nya, semina beberapa minggu udah bekau SEB mantu sida pindah ke Metalung awakka sida ulih ngepunka pengidup ti baru, udah ngayanka SEB enda ulih nyediaka bantu ti chukup ba sebengkah raban bansa ti ngemeranka pengawa ngasu-beburu enggau pengumpul asil kampung menua Asia ti penudi, diburu pansut ari menua asal sida empu.

Raban bansa Penan ti endang ngemeranka pengawa ngasu-beburu dalam babas nya, ngasaika pemar diau ba endur pengentap pendiau ti baru ti digaga ba tisi kebun sawit ti enda dikereja agi. Diatu sida bepanggai bendar ba bekal pemakai ari SEB, lalu sida nadai udah meda sebarang sekula tauka klinik tauka ai beresi tauka bekal kuasa elektrik ba endur ti baru sida nya.

Pasar endur sida ngalu ti pemadu semak enggau menua nya Belaga, 4 jam pejalai ngena kerita, tang diatu mayuh jalai udah putus ketegal ampuh laban ai tekat.

Nitihka raban bansa Penan nya sida takut nengah jalai ti jauh agi sereta bebukit – Sarawak Report enda nemu sekalika SEB bisi nyediaka perengka pengangkut enggau minyak petrol dikena mantu sida nengah jalai ti jauh agi nya.

Sekumbang ikas ai ti majak niki ba rambau Krismas enggau Taun Baru tu tadi, bala pemesai ari SEB udah enda ingat nyenguk raban bansa asal ti benung dituntung penanggul nya.

Torstein Sjotveit dipelabaka benung belelak ngelantangka ati di menua iya empu di Norway ba maya Krismas tu, taja pan gerempung NGO Bruno Manser Fund ngumbai iya benung nemuai ngagai menua Burma laban ngiga peluang bekereja din.

Raban bansa Penan ti bisi betelefon enggau stesyen RFS madahka sida mengkang bepegai ba jaku semaya bala pemesai SEB ti deka nganjung bekal pemakai ngagai raban bansa sida ti benung dituntung penusah suntuk pemakai nya.

Nyerumba nya, pengamat berita pasal Torstein Sjotveit ti deka diketukaka ari pengawa iya benung dianti-anti, ti disadang diatur dalam bulan Sebelas taun tu ila. Penuduk iya deka diganti siku peranak menua Sarawak empu.

BMF mega udah ngansak ngambika Pengerusi SEB diketuka ari pengawa iya. Hamed Sepawi nya sekali petunggal enggau Kepala Menteri Abdul Taib Mahmud lalu mega nyadika bakih pengawa dagang iya ke rapat.

Gerempung NGO BMF nya madahka Hamed Sepawi nya ukai siku tuai kompeni ti landik sereta sikar ba atur projek ngaga tekat ti balat dipecharutka nya, ti bisi bendar bekaul enggau pengawa meri kontrak besai-besai ngagai kompeni enggi sida Taib Mahmud sebilik.

Torstein Sjotveit, ti udah dipeda chakah bendar mansutka penerang dalam mayuh bengkah suratberita sereta bebalaska emel enggau gerempung-gerempung NGO, udah ngayanka diri deka meda ubah ba pengawa pemansang ba menua Sarawak nengah program kuasa elektrik hidro iya.

Tang diatu iya dipeda deka ninggalka juluk ati ti dipunka iya empu kenyau ari pun suba.

Iya udah ngayanka diri ukai orang ti chelap sereta ulih napi sebarang jaku bantah enggau penanggul ti udah mayuh ngasuh iya empu malu sekumbang iya mangku pengawa nya.

Tu nyengkaum penanggul ba kuasa elektrik di selampur menua Sarawak, ti dipelabaka orang bepun ari pemuntan operasyen Tekat Bakun ti baru tembu nya, ti udah ngujungka pengerusak besai ba palan pengelebur besi aluminum dalam SCORE lalu ngujungka orang mayuh mantaika pengeringat diri di serata menua Sarawak.

Torstein mega ditekan jaku tuduh iya empu ti madahka kompeni iya nya bejalaika atur nitihka stindit entarabansa pemadu tinggi ba pengawa ngeluarka kuasa elektrik hidro, lebuh gerempung NGO nunjukka pemuntan iya nitihka atur bekaul enggau sosial, kuasa pengelantang mensia enggau isu rampa menua.

Ba pun minggu tu tadi Sarawak Report udah mantaika berita ti madahka SEB udah direpotka raban bansa asal di Baram laban sida ti nguji meri duit suap, lebuh kompeni nguji meri duit bantu hari Krismas ngagai genturung ti balat mantah program Tekat Baram.

Sehari tu, Tuai Genturung ari Long Lama udah ngaga repot polis pasal pengawa SEB ti nguji meri duit suap nya.