Beratus-ratus iku orang bansa asal udah bejalai bebala mayuh di nengeri-nengeri besai di selampur menua Sarawak ba minggu nyin kemari dikena sida bebasaka Hari Kuasa Pengelantang Mensia Entarabansa.
Bantah-bantah ti diseretaka enggau mayuh macham chura lalu diatur enggau manah sereta chelap nya udah nyadika sebengkah pengawa ti suah udah dipeda kitai.
Tang, enti Taib deka ngambi kira utai ti dirundingka bala rayat iya, iya tentu berasai irau bendar ati.
Tang, bala orang ti bisi ngambi bagi dalam pengawa bejalai bebala mayuh nya endang bala orang ti datai ari menua pesisir di menua iya.
Baka ti diayanka nengah pengawa bepilihbesai nyin kemari, Taib endang dipeda lenyau mayuh sukung ari bala pengundi di sebelah kandang nengeri di Sarawak. Iya lenyau mayuh kerusi dalam taun 2011 lalu mayuh kerusi nya enda ulih ambi iya pulai dalam taun 2013.
Tuai ti udu bepengaruh nya, ti ngelanggur deka ngambi endur diri ba Rumah Gabenor Sarawak lalu maduka siku orang ti bukai nyadi Kepala Menteri nukar iya, benung idup dikelingi bala orang ti pedis ati ke penyalah makai suap iya lalu sida nya mega endang ngundi ngelaban iya.
Tang bala orang ti udah meranika diri bejalai bebala mayuh beserimbai enggau Hari Kuasa Pengelantang Mensia Entarabansa nya udah datai ari menua pesisir. Enti bala rayat iya nya bisi kuasa nentuka nasit Taib, iya tentu tumbang, sekali ke iya ulih tama ngagai Rumah Gabenor tauka enda.
Bedau numbas?
Menua Sarawak nya sebengkah menua di Malaysia ti bejalaika atur bepilihbesai ti balat dipalit penyalah makai suap enggau atur magi menua ti berupai bendar nguntungka sebengkah parti politik aja.
Kerusi ti mit-mit di kandang nengeri bisi bepuluh ribu iku pengundi, lalu kerusi-kerusi di menua pesisir semina bisi beratus iku pengundi aja, ti endur bala agen Taib deka nentuka bala pengundi sida nya ditejuka seranta lalu udah nya deka disuap lalu diemba ngambika sida ‘ngereja utai ti betul’ ba maya ngundi.
Pia mega sida ulih dibai kereja sama, laban bala rayat ‘ti bisi penanggul’ mar bendar direjista nyadi pengundi, terima kasih ke salah guna kuasa BN.
Baka ti ditemu, semua ubah dipenyadi dudi ba menua-menua pesisir.
Bala orang di menua pesisir lubah bendar nerima penemu ti baru ti dibai ngagai sida, lebih agi sida ti ari raban orang ti seranta, lalu mega raban bala pengundi ti udah tuai umur.
Enggau pengeran ati iya muru bepuluh ribu iku orang bansa asal ngena program tekat iya engka Taib udah lunggar pengawa lalu pengawa nya deka ngapuska penaluk ati sida ba iya.
Kepala Menteri/Gabenor-ti-nganti-gintir nya patut puh berunding, enti pengawa bejalai bebala mayuh ke terubah iya tu diatur, tu engka tau nyadika kelai ubah pengawa politik ti baru betumbuh ba nengeri ti mit-mit enggau ti besai-besai lalu mega deka ditunda orang ba endur bukai ila?
Engka nya enda ngawa ba iya. Bala orang bansa asal tau ngundi sepeneka ati sida, tang iya seruran bemain-main enggau rekod sepeneka ati iya? (Suratberita ti dikuasa sida sebilik, New Sarawak Tribune, nuliska repot pasal raban orang ti bejalai bebala mayuh di menua Kemboja, lalu ukai repot pasal utai ti nyadi di Kuching).
Taib endang lama udah mai ubah ke menua Sarawak, lebih agi ubah dikena iya nugungka pengeraja ke iya empu. Tang ubah ti baka nya enda manah ke bala rayat iya empu.
Asil ari kampung enggau tanah pesaka enggi orang bansa asal udah mayuh dalam jari kompeni-kompeni kebun dandang besai. Tang diatu Kepala Menteri nya udah jauh agi nyingkang ke mua. Iya udah ngeruga sereta ngerusak sungai lalu muru bepuluh ribu iku orang bansa asal ari menua asal sida ngambika iya ulih neruska pengawa ngagai kandang industri ti deka begunaka tulang orang ari menua bukai, iya nya program kuasa elektrik ke SCORE iya.
Penanggul ti baka tu tentu iya deka diseliahka bala orang bansa asal ti seranta.
Lalu bala orang ti udah tanggul laban projek-projek tekat ai ti dulu suba nya raban orang ti udah teguran, ukai kepapas ke iya – iya nya raban orang ti besebanaka penanggul ti udah nuntung sida enggau jaku semaya ti enda kala dikamatka iya.
Sekali ke Taib nya udah kelalu tuai endur iya ngelala berapa penyampat berita dikerembaika ba maya ke diatu?
Bala agen BN engka mujur mujuk bala tuai kampung tauka tuai raban bansa. Suratberita BN enggau radio tetap deka nusui pemanah ‘SCORE’ ngena jaku positif ti bebelit-belit enda ngetu-ngetu, tang penerang ti bendar udah datai ba orang bansa asal di Baram enggau di Baleh enggau endur ti bukai, lebih agi ba nengeri ti mit-mit, ti endur raban parti penyakal diatu majak entap.
Parti penyakal DAP enggau PKR enggau mega gerempung-gerempung NGO diatu nunjukka baka ni program ti enda laku Taib nya “ngemansangka” sida enggau chara ngerusak pengidup sida ti makin enda bulih sukung dunya, laban iya endang ditemu ngelanggar atur pengelantang mensia.
Sida tu madahka ngagai orang di menua pesisir nya chara ti dipejalaika BN enda sejalai agi enggau atur ti dikarapka.
Sida madahka bala orang bansa asal patut dibai berundingka atur, dibayar pampas pengerugi lalu dibai bejurai sereta ngaga pemutus runding ba sebarang program ti ngubah pengidup sida empu.
Lalu endang baka ke ngelama tu, bala orang di menua pesisir ti irau mudah agi deka besetuju.
Ba sebengkah penerang kena 26hb Sebelas bala tuai raban bansa di Baram udah mansutka jaku bantah sida ba jaku dawa ti madahka sida kena asut raban NGO ari menua tasik dikena sida ngelaban projek tekat ai perintah menua.
Sida ulih berundingka nama utai ti manah ke guna sida empu, lalu sida endang ngelaluka sebarang sukung ari raban orang luar ti bisi penyinu ke sida.
Penerang tu, ti ditanggam beberapa iku tuai raban bansa di Baram, nunjukka sida udah ngelala ngarika raban bansa ti diarika sida. Utai tu patut ngasuh Taib irau ati.
Ke bendar iya penerang nya mega bisi ngeleseka Taib laban ngulihka sukung bala orang ari menua luar, lalu iya balat bepanggai ba orang luar baka Torstein Dale Sjotveit dikena iya bejalaika atur tekat iya ti besai-besai.
Udah tu ila, bala pemacha kami dipinta ngundi bala parti penyakal?
‘Atur pengawa perintah ti majak tendu’ menua Sarawak
Sebengkah agi repot beguna ti dikeluarka ba ujung bulan nyin kemari ari NGO Sahabat Alam Malaysia (ti nyadika kaban gerempung NGO Friends of the Earth) nunjukka “pemuntan menua lebuh mantaika ubah ti patut ba polisi enggau atur undang-undang dikena nentuka sida sejalai enggau pemutus bala akim” bekaul enggau kuasa pengelantang raban bansa asal.
Nya nyadika lalau ti nangkan Kepala Menteri nya udah tumbang ba talat pechara iya pasal ‘ubah atur’ tanah, taja pan iya diatu majak muru bepuluh ribu iku orang bansa asal pansut lalu ninggalka tanah asal sida empu ketegal ti meri awak ngagai projek tekat ti besai-besai.
Tiap kali pechara dipejalaika dalam kot di Malaysia, pemutus bala akim endang nekanka Perintah Menua Sarawak enggau tuai iya Taib Mahmud salah laban ngeruga kampung enggau tanah NCR enggi orang bansa asal.
Sahabat Alam Malaysia (SAM) udah mujur nunjukka pemuntan perintah menua Sarawak enggau mega perintah besai meri timbal jaku ke pemutus kot, pemendar semua pengawa nebang kampung enggau atur meri lisin kebun dandang besai di menua Sarawak nya mengkang nyadika tanya.
Mayuh raban bansa asal, ti udah menang kes dalam kot bedau tepantup ati enggau pemenang sida laban sida bedau meda ubah ba ulah Perintah Menua sida empu.
Kepala Menteri nya ditemu majak meri lisin kampung enggau kebun dandang besai baka ti ngelama tu, lalu enda ibuh ke kuasa pengelantang orang bansa asal.
Di serata menua Sarawak diatu orang majak ngelala chara Taib megai perintah, sebaka enggau penuai umur iya empu lalu enti iya majak enggai mendingka sada nyawa sida, agi mayuh pengawa bejalai bebala mayuh deka diatur ke dudi hari ila.
Enggau nya, ubah tentu deka datai.