Sebarang penerang bekaul enggau pengawa dagang ti datai ari kandang SCORE bisi aja sesebengkah pekara nya sebaka enggau pangan diri. Iya nya pengaya ti datai ngagai kuchik Kepala Menteri Sarawak enggau sida sebilik.
Ke bendar iya, peransang ti nyengala di belakang projek ti disukung perintah menua nya endang dikena nambahka pengeraja orang diri sebilik nya lalu muka peluang dagang ti besai ngena konsesyen ari kayu batang, kebun dandang besai enggau kontrak ti diberika ngagai sida ari Taib Mahmud empu.
Kitai patut ingatka selampur projek SCORE nya benung dipelanja nengah tanggam bon duit jali ti nyelai sereta dipelalaika, ti diinjau beduduk ba bungai duit jali dua kali lipat ti bisi dalam dagang tebuka, nengah institusyen belanja menua tasik di Labuan.
Tentu bisi siku orang ti benung ngenatka penatai untung ti mayuh ari duit ti diperanakka nya, tang nadai siku kitai tu nemu sapa.
Projek pemadu besai ke diatu ti baru udah dipenyadi ba kandang SCORE nya sebengkah palan ngaga sereta ngeluarka baja tiru fosfat di pelilih Simalajau.
Tu nyadika pengawa beranakka puku dagang manggai RM1 billion, ti betuaika kompeni Taib Mahmud sebilik empu, CMS. Datai ke sehari tu CMS ti betuaika Richard Curtis, siku peranak menua UK ti bekereja di Malaysia.
Sebaka enggau pengawa pengeluar barang ti bukai ti dibai Taib tama ngagai Sarawak nya sebengkah palan pengeluar baja fosfat ti endang disadang nanggul pengerai mensia mayuh lalu mai pengerusak ngagai rampa menua.
Raban NGO rampa menua udah lama madah ke pengirau ati sida bekaul enggau atur ti dikena bejalaika palan pengeluar barang ti tau ngeruga rampa menua di Sarawak nya baka ti benung dipejalaika perintah Sarawak ti betuaika Taib Mahmud.
Mayuh pengawa dagang di menua Sarawak endang patut bisi kaul enggau Kepala Menteri tu, tang iya bempu kemata pengawa ti penuh ba empas ngagai rampa menua enggau sosial tauka mensia mayuh.
Udah tembu semua pansik dipejalaika, asil pansik nya deka diiyar ke tisi lalu diubah baru dikena ngabur mata bala orang bukai lebih agi mensia mayuh.
Palan pengeluar baja tiru fosfat Simalajau nya nyadika sebengkah kes ti deka dikenataika ditu. Palan nya ulih ngeluarka setengah juta rachun ti bisa tiap taun, tang nama putar pengawa dikena napi sebarang penanggul jemah ila?
Fosfat nya sebansa baja tiru ti bisa. Richard Curtis udah madahka dagang CMS ti baru nya nyadika palan ke terubah digaga di menua adap Asia Tenggara.
Nitihka sebengkah penerang ti udah dikamatka, enti fosfat nya enda dibai tauka dipindahka enggau chara ti profesyenal, fosfat tau mai pengerusak ngagai pengerai mensia mayuh.
Isu-isu ngagai rampa menua nyengkaum “pengelepas gas beracun ngagai ruang angin, ai kamah enggau munyi ti inggar ari palan” kenu ku repot nya.
Ke semua repot nya begunaka penampak lalu raban penerit pekara pengelikun ti ngatika diri patut diambi bekereja sebedau palan nya tau dikumbai nyadi sebagi ari dunya ti endur mensia diau baka di Sarawak.
Kompeni CMS udah minta tanah ke tapak palan pengeluar fosfat ari siku orang ti pemadu bekuasa di Sarawak, iya nya Kepala Menteri, tang iya enggau sida sebilik nya mih raban orang ti beempu kompeni CMS!
Nadai siti pan repot berita pasal pengawa ngaga palan pengeluar nya dipansutka ba suratberita menua tu.
Abis kurang pan bala orang ti beempu menua nya patut dipadahka dulu pasal isu tu sebedau projek belabuh dikereja ba endur sida nya. Lalu pansik patut dipejalaika dikena nentuka Sarawak nitihka lalau baka ti dipejalaika ba menua ti udah mansang sereta ngembuan penemu saintifik, lalu mega bisi palan pengeluar ti baka nya.
Nadai penerang ti silik ba sapa ti deka diasuh nyadi pengurus palan nya di menua Sarawak, ari baruh kemata Curtis ti ngarika CMS.
Nama kebuah enda nejuka Taib maduka orang ti betul nyadika pengurus ba palan nya?
Nyerumba pemayuh palan pengeluar ti digaga dalam pelilih kandang SCORE, bala orang ti bempu menua nya mih ti napi uras bisa ti datai ari palan nya, tang ukai meri penguntung ke sida.
Dalam kes palan pengeluar baja fosfat tu, jaku tanya iya, sekali ke orang ti bempu menua nya ulih diambi bekereja ba palan ti balat tau ngenataika penanggul pengerai, lalu baka ni sida deka bulih latih ti betul?
Saut ke tanya nya “Nadai”. Taib udah melakangka pengawa meri latih pengelandik ngagai raban nembiak ba sepemanjai 35 taun iya merintah.
Nya alai, kitai tentu enda tekenyit ninga cherita penatai beratus-ribu anak kuli ti endang landik bekereja ari, ambi ke banding, “menua orang Islam ti manah” baka Bangladesh bekereja dalam palan nya ila.
Nama guna mansutka jaku pujuk ngagai orang ti bempu menua ti bulih penguntung ari pengawa dagang nya?
Ba Taib, dikena mujuk sapa-sapa pasal pemanah mai masuk palan pengeluar barang ti bisa-bisa ti besai ngagai menua Sarawak, lalu ngerusak sereta ngempang batang sungai, iya patut bejaku belalauka mayuh bengkah penerang.
Utai tu dikereja iya nengah ensera ti ditempa-tempa iya nengah randau enggau bala pengarang berita.
Richard Curtis patut meri penerang ti silik dikena nyaut jaku tanya tu, lalu ukai mansutka jaku gerah iya ti kabur bekaul enggau “pemansang” ke menua.
Laban ditu kitai ukai semina berandauka pasal palan pengeluar baja fosfat aja. Tang kitai berandau pasal palan pengeluar besi aluminum enggau mangan, iya nya sebengkah pengawa dagang ti udah ditemu mai penanggul pengerai ngagai bansa China di menua sida empu, ti diatu udah ditemu besedia mindahka pengawa dagang enggau palan sida ti pengamah nya tama ngagai menua … Sarawak
Ditu kami minta penerang ti tau dikarapka lalu patut diambi tindak ti JAMPAT!
