Nama kompeni ti udah disebut ti disebut tuai parti SUPP Peter Chin kejang bepilihbesai nyadika kontrak pengaga projek 15 buah rumah sekula di menua Sarawak udah dikemulaka enggau chara bekategori.
Kompeni ti beopis di KL nya, See Hoy Chan, udah madahka ngagai Sarawak Report sida nadai kala ninga pasal perambu projek ti beungkus RM559 juta nya, ti kala diansak lalu dikemendarkan opis Menteri Besai enggai sapit iya beberapa minggu kejang deka bepilihbesai.
Penerang-penerang pasal projek nya udah kala dituliska dalam blog tu madahka 15 buah sekula nya beguna bendar di menua Sarawak lalu Peter Chin udah nuduhka gempung kompeni One BU Redha Services, ti nyengkaum kompeni enggi kroni Taib Mahmud, Redha Services enggau One BU Sdn Bhd bejalaika pengawa nya.
Sepuchuk surat peminta udah kala dianjung ngagai opis Menteri Besai ari kompeni One BU Redha Services Sdn Bhd madahka gempung kompeni sida nya”sebagi ari mayuh bengkah kompeni dalam kompeni See Hoy Chan”.
Udah ti disidi One BU mai reti Number One (Lumur Satu) Banda Utama, ti bisi indu opis kompeni ti tebilang di nengeri KL.
Tang lebuh ti dibai berandau nengah telefon, siku ari raban pengarah dalam kompeni orang diri sebilik nya ba minggu nyin kemari, Dato Teo Chiang Liang, kami dipadahka tu ukai kes ti disidi kami.
Pengawa bebulaka jaku tanya kami nya udah nambahka pengirau ati kami bekaul enggau atur pengawa ti enda patut ba projek ti besai bendar ungkus nya ti udah diperesa Menteri Besai enggau berumban-rumban nya, ti udah diansak siku kaban politik BN ari menua Sarawak semina beberapa hari kejang deka bepilihbesai.
Surat ari Peter Chin ti ngansak projek nya ngambika dikena ngulihka undi raban bansa di menua pesisir ke BN ti udah nganti ba pengelama 50 taun ke rumah sekula ti meruan dikena sida.
Nambahka nya, ngatur pengawa ke perambu projek ti besai bendar baka nya nengah pintu belakang nya sebengkah atur pengawa ti nyelai bendar ke sebuah menua ti seruran begendangka diri bebasaka atur demokrasi, baka menua Malaysia.
Kami udah nanya nama kebuah siku orang politik BN Sarawak deka ngansak nitihka runding iya kediri lalu nyangkung segempung kompeni ti enda dikelala bejalaika projek nya lalu diatu gempung kompeni nya udah meri jaku bula madahka sida bisi kaul enggau segempung kompeni ti tebilang.
Udah nya lebuh Sarawak Report nguji deka berandau dalam telefon enggau pengarah kompeni See Hoy Chan ti bisi kaul terus enggau projek nya, iya lalu mutuska jaku randau kami.
Dato Teo Chiang Hong nya diri menyadi enggau siku pengarah dalam kompeni sida sebilik, ti ngembuan dagang dalam pengawa kebun dandang besai sawit di menua Sarawak.
Iya dikelala nyadika siku orang dagang pemadu kaya sereta bepengaruh di menua Malaysi, baka ti dikenang dalam suratberita Tatler – sebuah suratberita ti ngerintaika nama iya enggau bini iya nyadika seraban sosialis tebilang.
Teo Chiang Hong nya siku pemegai syer pemadu mayuh dalam One BU Sdn Bhd. Lebuh kami nguji deka berandau enggau iya pasal kompeni iya ti nyadi sebagi ari gempung kompeni See Hoy Chan, iya madahka diri benung di menua China lalu enda sengkeman bendar endur iya berandau panjai ke pekara nya enggau kami.
Tang lebuh kami nguji deka betanya lalu ngulihka saut iya enggau ngelansa, randau kami nya mega diputuska iya. Lebuh kami nguji ngangauka iya baru, iya lalu enggai nyambut kangau kami. Pia mega enel kami nuju iya nadai dibalas iya ba minggu nyin kemari.
Pemuntan kami ngulihka saut ari Dato Teo, diseretaka enggau pengawa bebula sechara bekategori ari menyadi iya, ninggalka beberapa iti jaku tanya ti besai bendar reti ngagai Menteri Besai, sapit iya ti mega nyadi Menteri pelajar, Peter Chin enggau mega Taib Mahmud.
Baka ni patut sebengkah porjek nya udah diperambuka lalu terus dikemendarka enggau nadai dipansik silik-silik dulu ba kompeni ti dituduhnya? Kami ditu bejakuka 15 buah sekula ti dipegendangka BN ngagai raban pengundi sida ba maya bepilihbesai.
Kami mega bejakuka duit menua RM559 juta dipelanja enggau peneka ati ngambika dipejalaika orang dagang nya.
Bank Maybank mega bisi bekaul enggau skandal tu, laban Sarawak Report bisi nerima sesalin surat ari pampang opis sida ti besemaya deka meri akses duit jali sida ngagai Dato Teo, ti endur opis sida enggau opis orang dagang nya sama besemak pangan diri ba Banda Utama di KL.
Surat tu datai ari pengurus pampang bank nya, ti dituliska nuju opis Menteri Besai nyadika sukung peminta bejalaika projek nya, dikena ngamatka bank nya ulih nyali duit ngagai One BU Redha Consortium ke projek nya.
Ke bendar iya, setaun udah nya, projek 15 buah sekula ti diperambuka nya nadai agi didinga berita, taja pan peminta nya digaga ngena sekeping keretas besaiz A4 ti diterima opis Menteri Besai nyadika ‘perambu projek’, ti udah dikemendarka dalam beberapa hari aja.
Sama enda didinga berita agi enggau nya, iya nya duit agih setengah billion ringgit ari perintah dikena bejalaika projek ti besai bendar guna ke orang di menua pesisir nya.
Tuai parti SUPP, Peter Chin, mangku tanggungpengawa ti besai ba pekara tu lalu saut iya nama kebuah projek ‘meli undi’ ti enda diperesa dulu nya beguna bendar.
Nyerumba nya mega, bala pengundi di menua Sarawak ti mudah bendar kena keruga diatu sekali agi ditejuka nganti rumah sekula digaga di menua sida enggau mega projek bukai ti benungkus bebillion-billion ringgit ba sebengkah menua ti kaya asil tanah di Malaysia.