Penyaru besai ti berupai ti dipansutka Kepala Menteri anak patung ke Taib Mahmud, Adenan Satem, udah ngujungka batang berita dalam Borneo Post dibali baru.
Taja pan bakanya, versyen bechelak repot nya mengkang ngundan jaku Adenan ti ngemalu, ti endur iya madahkan kebuah besai iya enda nagang penama Anwar Ibrahim ke menua Sarawak sekumbang PRK Balingian laban, kenu ku iya, dikena nyeliahka ari dikutuk orang mayuh serata dunya.
Ngena atur ti salah ba undang-undang Adenan Satem udah nagang enda kurang ari 8 iku tuai politik tebilang ari PKR, ti endur, kenu ku iya, semua sida nya udah dipasukkan dalam ‘lis orang ti dipertaika’, dikena nagang sida bejalaika kuasa politik sida bekimpin di pelilih PRK Balingian nya.
Berebak enggau maya nya, bala tuai pro-PBB/BN, nyengkaum Sapit Menteri Besai Muhyiddin Yassin udah dikemendarka tama lalu nemuai ngagai sitak PRK Balingian nya, enggau mega enda nagang penama siku tuai orang ti suah didinga durah-durah namam benih pemenchi bebagi bansa, IbrahimAli, tama ngagai menua nya, tang raban penyakal ti deka nemuai nitihka atur undang-undang ditagang.
Kemari Adenan udah ngumbai diri enda berani nagang Anwar tama ke menua Sarawak, laban Anwar udah chukup tebilang lalu dikelala orang mayuh di sebelah dunya.
Pengawa ti nguji deka nutup penyaru jaku enggau berupai nya udah ngujungka cherita dalam Borneo Post ti dikuasa PBB nya dituliska baru. Tang cherita ti asal ti udah dichelak dalam suratberita nya enda ulih diubah agi nyengkaum ti bisi dituliska dalam blog berita ti bukai ti sama bisi ngulu aum pengarang berita nya.
Ari ketegal ti enda nemu nunjukka basa ba bala orang politik penyakal ti betul ba atur undang-undang nya sebaka bendar enggau chara meri basa ke orang bukai baka ti udah dikereja Taib Mahmud, ti lama udah suah salahguna ba pengawa bekuasa atas opis imigresyen dikena nagang sapa-sapa temuai ti disadang tau ngeruga kuasa diktator iya.
Pekara nya kemari belabuh enggau jaku gerah Adenan kejang pengawa PRK Balingian iya deka “nagang sebarang sapa orang luar ti bepenemu lunggar dalam jalai pengarap, bechiping bansa enggau penanam pemenchi dalam menua nya”.
Jaku Adenan nya udah dibalut kamah penemuai siku tuai orang ti balat ngemesaika tuan Melayu, Ibrahim Ali, ke Kuching ti udah direpotka.
Opis Imigresyen udah nya lalu nguji mansutka sebengkah penerang sida ti bebulaka berita pasal penemuai 3 hari Ibrahim Ali nya, tang udah nya lalu ditimbal repot dalam Sarawak Report.
Nyerumba nya, raban orang ‘ti ngachau’ udah diasuh nikal pulai, nya ke bendar iya bala tuai parti penyakal demokrasi ti betul ba atur undang-undang menua, ti datai enggau ati lurus laban deka kimpin di sitak Balingian.
Ngena jaku ti sumbung dalam aum pengarang berita kemari bekaul enggau pemenang parti iya, dia Adenan udah terang bendar udah ngelala chara-chara ti enda demokrasi dipejalaika parti iya maya bepilih, ti udah ngelui sekeda repot ti madahka undi BN nya bisi dibeli ngena RM10 ba sitak Balingian ti dituntung penyeranta nya.
Jaku gerah iya ti kelalu ngelui ari pematut enggau pemanah nya, ba penemu iya, deka ngujungka orang mayuh di serata dunya enda ibuhka pengawa PRK nya ti kenu ku iya nya sebengkah pengawa muai undi ti lurus, seagi-agi tuai penyakal baka Anwar nya enda ditagang tama.
Adenan madahka iya ulih napi sebarang penanggul ti datai ari penemuai Anwar, seagi-agi pengawa kimpin raban penyakal ti bukai nya ulih dikurangka.
Pengawa ngundi ti diayan-ayanka nya ukai nunjukka sistem demokrasi ti tulin. Tang media ti bebas enda ulih dipejalaika di Sarawak.
Enggau atur ti madamka cherita asal dalam Borneo Post berumban-rumban lalu nukar berita asal nya ngena berita ti udah dibali nya udah ngayanka baka ni iya berupai bendar bekuasa ba media. Tang atur nya udah balat agi ngerusak pemanah nama iya enggau BN laban mensia mayuh udah ngelala chara kamah enggau pemeli Adenan Satem.
Versyen ti udah dibali nya dikena ngubah jaku Adenan, ti dikereja suratberita nya dikena ngelamun penyaru pansut ari mulut Kepala Menteri!
Dalam jaku Kepala Menteri ti udah dibali nya, suratberita nya udah ngayanka Kepala Menteri udah ngeleseka jaku orang bukai bekaul enggau kutuk orang di serata dunya, kelimpah ari ti nempaka cherita ke iya empu.
Asai malu nya udah nambah, enggau penerang ti dipeda orang mayuh.
Kepala Menteri ti baru nya patut belajar baka ni deka salahguna kuasa iya. Iya patut nemu sereta ngelala, nutup penyaru diri empu nya jai agi lalu ngena chara ti salah ba pengawa bepilih baka nya nunjukka iya enda ulih ngumbai diri menang enggau chara ti betul ba undang-undang.
Belabuh ari diatu Sarawak Report deka ngerembaika pekara tu ngena bantah ti betul ba opis pengari menua di serata dunya, awakka mensia mayuh di serata dunya baka ni Adenan udah sengaja ngagang pejalai pengawa bepilih nya enggau chara bebas sereta lurus, lalu nama kebuah iya ‘ngemendarka’ Anwar Ibrahim tama ke menua Sarawak.
Klik ditu (http://sarawak.s3.amazonaws.com/documents/Original-Borneo-Post.pdf) ke berita ti asal.
Klik ditu (http://sarawak.s3.amazonaws.com/documents/revised-borneo-post.pdf) mega ke versyen berita ti udah dibali ari asal.