Sarawak Report enggau sekeda bala orang bukai udah nguji narit perati orang mayuh ngagai pekara bekaul enggau penyalah makai suap di menua Sarawak enggau Malaysia, ti udah ngengkahka menua tu nyadika sebuah menua pemadu jai nama jai rita ba penyalah makai suap ti mai penanggul pengidup rayat iya dikereja raban elitis perintah.
Penerang enggau bantai penerang kami udah meri gambar pasal penyalah nya ari sehari ngagai sehari, ti endur salah guna kuasa udah berampit ngagai bala orang ba tikas perintah di menua Malaysia.
Sarawak nyadika sebengkah menua ti kaya ba pengeraja asil tanah iya, ti endur semina mimit aja bala rayat iya patut ulih idup enggau lantang, enti sema pengaya menua nya disadung enggau sama bela enti rampa menua iya dikemataka enggau manah sereta meruan.
Tang udah nyau ka setengah abad penyalah ngenchuri ti enda besekat ti dikereja sekeda ruang bilik orang diri sebilik ti rangka, kampung Borneo ti dulu suba penuh laban pengeraja asil kampung enggau tanah ti berega, diatu udah tusur lalu nyadi amur enggau abus lalu mayuh agi rayat iya ti seranta nya nyau diansak nuju garis pemunas.
Pengeraja ari asil minyak Sarawak udah diulihka pansut ari bumi enggau tasik Sarawak lalu dibai ke Semenanjung Malaysia lalu bajet belalai Petronas enggau sebarang penatai pemisi ti udah diagihka pulai ngagai menua Sarawak udah dichuri sekeda orang ti ngembuan kaul politik, ti endang diiring tuai sida ba pengelandik enchuri enggau ngembuan ulah behipokrit.
Tu siti ari kebuah orang Sarawak patut mereti ke penanggul ti ninggang orang selama ti dikenataika penyalah makai suap dalam atur pengawa perintah lalu nya beguna bendar ke sida, lalu enda patut ditejuka sida majak nyadi.
Tuai ti bepenemu jai tau mai penusah pengidup, nyengkaum pemati ke bala rayat, ti, enti ditejuka bala sida ti megai perintah enggau chara ti lurus, deka ngarapka pengidup ti likun sereta lantang.
Siti repot baru ti besai bendar guna udah bisi dijual di pasar entarabansa dua tiga hari tu, ti nerangka penyalah nya enggau lenak.
Bup repot nya ti benama “Trillion Dollar Scandal” nerangka baka ni menua ti benung mansang ditambat penyalah tuai ti balat makai suap lalu tau bendar mai penanggul dalam pengidup rayat sida.
Bup “Trillion Dollar Scandal” ditengkebang seraban orang dalam NGO Pemunas Penyeranta Mensia, ONE Campaign ngaga anggar bala orang ti seranta nya benung dirumpak enda kurang ari satu trilion dollar ninting taun ti datai ari penyalah makai suap bala tuai perintah ti endang dikungkung penyalah makai suap di serata dunya tu, ti dibantu elemen belalai ngelindung pengawa salah sida.
Duit nya udah diinsap ari wang turu menua lalu dipasukka ngagai kuchik bala tuai ti korup ti dilindung bank tikas entarabansa ti endang ngambi upah ngemataka pengeraja bala orang ti balat bepenyalah nya.
Tuai ti balat ngereja penyalah makai suap enggau orang bank ti mantu sida ngereja penyalah nya patut bempu tanggungpengawa ke penusah pengidup bejuta-juta iku mensia ti nadai diberi peluang bulih utai ti manah-manah dikena sida neruska pengidup sida baka besekula, pekara ngintu pengerai, rumah endur diau, tanah endur ngidupka diri, pengerja ari tanah, peluang bekereja, pemakai enggau ai irup.
Tu endang penanggul ti balat ngenusah pengidup orang mayuh ti ditemu orang mayuh di serata dunya lalu orang di Sarawak patut angkat lalu nyadaka peminta sida ngena nyawa ti inggar sereta terang, DIATU.
Sida patut inggar nyawa minta semua bank di serata dunya, ti ngemataka bejuta-juta dollar duit simpan orang ti dichuri ari menua Malaysia, patut diasuh bempu tanggungpengawa lalu dipecharaka ketegal penyalah sida.
Lalu sida patut ngansak gerempung politik di menua UK, US enggau di menua maju ti bukai badu agi ngelalaika duit simpan bala kroni enggau orang politik ti kaya-kaya enggau nyelai ari menua Malaysia.
Repot tu tau dibacha ari: One Campaign – Trillion Dollar Scandal