Lebuh penusah bebadi ba endur bekereja ditusui nengah suratberita, baka penusah lubang endur ngulihka batu arang ti meletup ti ngujungka bala pengereja pengawa dia bebadi enggau parai di Selantik ba ujung minggu tu tadi, baka selama mega nama kompeni ti bejalaika pengawa dia deka disebut.
Tang, penyelai ba berita nya, pekara ti nyadi nya enda ditusui enggau silik ngagai mensia mayuh di menua Sarawak.
Cherita ti ditusui ngagai kitai mayuh tu pasal bala orang ti bekereja nya, nyengkaum sida ti parai nya, orang ari menua bukai.
Bala orang bansa asal di Selantik empu nadai siku ti bekereja ba lubang tanah arang batu nya taja pan endur nya dipangkang sida.
Sapit menteri Dalam menua MP Wan Junaidi Tuanku Jaafar udah mujur bendar mantu meri penerang pasal penusah nya, nusui pasal bala kuli nya ti datai ari menua Korea Utara ketegal sida nya orang ti ‘berani’ bebanding enggau peranak menua Sarawak empu!
Wan Junaidi madahka ngagai bala pengarang berita, bala anak kuli ari Korea Utara nya tau tama ngagai menua tu lalu bekereja ngena atur entara Pyongyang enggau perintah Sarawak.
Penerang ti munyi nya ngayanka menua Sarawak nya sebuah ari menua-menua mit ti sanggup nguna tulang bala anak kuli ari menua Korea Utara ti putus pengarap ke menua diri empu, laly seraya ke ngeleseka peranak menua Sarawak empu.
Tang, nama kebuah bala anak kuli nya patut berani bendar?
Sekali ke tikas pengelikun ba lubang ngulihka arang batu di menua Sarawak balat agi tau nganu nyawa bebanding enggau bepuluh ribu buah lubang arang batu di dunya tu ke orang menua nya empu bekereja?
Lebuh mantaika repot pansik penusah nya, dia Institusyen Enjinir tetemuka lubang endur ngulihka batu arang nya endang mudah bendar kena tjuntung penusah ti tau nganu nyawa ti enda dijaga enggau manah, lebih agi ba sistem pejalai angin dalam lubang nya.
See Chee How ari parti penyakal ke sitak Batu Lintang udah mansutka jaku minta pansik ti silik patut dipejalaika ba lubang arang batu nya enggau ba endur bukai di menua Sarawak, udah bekau penanggul ba pejalai angin udah ditemu.
Jaku tanya ba pansik nya, nama penau enggau penemu bala sekeda orang ti udah diberi lisin ngulihka asil dalam tanah nya?
Sekali ke Menteri Perambu enggau Pengeraja Asal Sarawak udah nentuka kompeni ti diberi iya lisin ngulihka arang batu nya enda ngembuan rekod bekereja ti manah?
Sekali ke iya ti kala nyadi kepala Menteri enggau Menteri Wang Sarawak suba, udah nentuka kompeni nya ulih ngemasukka duit untung ti manah ke dalam wang turu Sarawak, udah bekau kompeni nya bekerumbakka tanah enggi orang bansa asal endur nya lalu ngeruga pengerai enggai pengelikun sida nyengkaum ngerachun sungai enggau rampa menua sida?
Agi mega pengeraja asal menua nya endang enggi peranak menua nya empu lalu nadai kebuah orang bukai muka projek ngulihka asil tanah di endur nya sepeneka ati, tauka nadai basa enggau orang ti empu menua dia.
Tauka, Gabenor Sarawak ke diatu, Abdul Taib Mahmud, nya semina bejuraika tender ngati ke diri entara iya enggau beberapa iku kroni-kroni iya aja, ti nadai seling tauka pengelandik ngulihka asil dalam tanah, lalu udah nya nurunka kontrak sida ngagai bala sab-kontrak ti bekereja sepeneka ati, ti udah ngupah anak kuli begaji murah ari menua bukai?
Lubang arang batu ti udah dituntung penanggul nya dikereja kompeni Luckyhill Mining Sdn Bhd, sebuah kompeni ti kala dituntung penusah meletup dalam taun 2012 suba, ti ngujungka ekpat iku anak kuli ari menua China udah lesi bebadi laya sulai.
Jaku ansak ti sebaka ari parti penyakal Sarawak dua taun suba ngambika pansik ti silik dipejalaika ba penusah ti terubah, lalu mega patut diseretaka enggau pansik ba empas projek ngagai rampa menua enggau kaul mensia ti disadang udah enda dikibuhka opis-opis perintah ti bekuasa.
Enti semua jaku ansak nya dititihka, engka penusah ti baka nya ulih diseliahka.
Penusah nya ukai siti penusah ti udah dipelalaika kompeni Luckyhill Mining.
Pengasai ati ti enda puas bala orang asal di Selantik nya udah nyata bendar bebali nyadi penusah besai ti nuntung bala anak kuli entudika penusah ti terubah dalam taun 2012.
Bala orang bansa asal di menua nya udah madahka ngagai bala pengarang berita, sida kala ngenataika serebana sida bekaul enggau keruga ti dikereja kompeni Luckyhill enggau kompeni bukai di Selantik, ti diempu sekeda bala orang ti sama dalam kompeni.
Nitihka pemayuh serebana ti dikenataika ngelama-lama tu, pejalai kompeni nya enda tentu meruan, ti lalu ngujungka pengerusak ngagai rampa menua enggau sungai di menua nya ti lalu ngeruga pengerai enggau pengelikun orang mayuh di menua nya.
Tang, baka ke selama, nadai siti pan jaku serebana bala orang asal menua nya didinga sereta dikibuhka.
Sida udah nadai kuasa ngenataika sebarang utai ti bekaul enggau pengawa ba menua sida empu. Sida mega nadai diterangka pasal pengawa ti patut dikereja sida maya penusah bisi nuntung enggau ngenyit. Sida nadai dibayar sebarang pampas tauka diambi bekereja ba kompeni nya. Cherita nya mengkang cherita ti lama.
Lalu sapa mih orang ti di belakang pengawa ngulihka batu arang nya, ti kala diberi lisin ari Menteri Perambu enggau Pengeraja Asal ti mega Kepala Menteri enggau Menteri Wang, iya Gabenor Sarawak ke diatu, Abdul Taib Mahmud?
Kebuah pia, laban lubang arang batu nya sebengkah pengawa ti balat nguntungka – lebih agi enti kitai enda ngira pengelikun enggau pekara bekaul enggau atur gaji bala anak kuli tauka pampas ngagai bala orang ti lesi bebadi laya sulai lebuh ti benung bekereja.
Orang mayuh tentu enda tekenyit ati enggau penerang ti madahka bala orang bti megai syer enggau raban pengarah dalam kompeni nya ari raban sida Abdul Taib Mahmud sebilik begulai enggau raban kroni-kroni sida baka raban Wong diri sebilik ari kompeni WTK?
Bala orang ti mengkang bepagut ba raban Abdul Taib Mahmud sebilik nya raban Wong sebilik ari kompeni WTK, endang kroni ke Abdul Taib Mahmud.
Sekali ke sida nemu pasal pengawa kompeni ngulihka arang batu ti likun?
Rintai nama bala pemegai syer dalam kompeni Luckyhill Mining nya: Zaleha Mahmud (menyadi indu Abdul Taib Mahmud); Datuk Abang Abdul Karim Openg (menyadi Abang Johari, Menteri Perumahan); bini iya empu Datin Airi binti Abdul Manan; ipar Marjuin Bt Haji Abdul Manan; Datuk Amar Haji Hamdan Sirat (Komisyener Polis Sarawak ti dulu suba); Halimah Abdullah (bini Hamdan Sirat) and Benedict Bujang Tembak (senator enggau Kaban Majlis Tertinggi PBB).
Pemegai syer pemadu mayuh nya kompeni Stratum Mining, ti diempu sida Wong sebilik ari WTK!
Dulu suba, Sarawak Report udah mantaika pasal kaul entara Abdul Taib Mahmud sebilik enggau raban WTK nyengkaum Jamilah Binti Abdul Taib Mahmud dalam kompeni nya.
Penusah luban arang batu ti meletup di Selantik nya diatu udah nambahka pemanjai rintai penanggul ngelanggar atur kuasa pengelantang mensia enggau rampa menua ti tau dikaitka enggau rembang pengawa dagang serata dunya sida Wong sebilik, ti kala ditusui enggau silik dalam blog tu.
Enda mukai-mukai nadai siku pan orang di Sarawak deka tekenyit ati enggau atur megai syer dalam kompeni tu.
Sida rindu agi ngaga menua Sarawak tu baka menua enggi sida sebilik aja.
Nya kebuah sida enda kiruh deka ngambi orang bansa asal di menua Selantik nya bekereja ngulihka arang batu.
Laban sida ngira enggai ke orang asal di Selantik minta meminta kuasa atas tanah enggau asil bumi di endur nya.
Taja pan, tanah enggai asil dalam tanah nya endang diempu orang bansa asal dia, sebarang orang politik ti ari luar endur nya nadai kuasa bekerugaka endur nya.
See Chee How ari parti penyakal Sarawak udah ngenataika serebana pasal atur pengawa ti dipejalaika rejim orang diri sebilik ari BN Sarawak ba arang batu nya.
Duit asil ari pengawa nyual arang batu nya udah dipasukka ngagai bup akaun bank di menua tasik, sebaka chara sida nyimpan duit asil ari kayu batang enggau sawit.
See Chee How madahka penerang pasal pengeraja asal bumi di Sarawak endang meruan bisi dichelak ke guna orang mayuh.
A taun nyin kemari bisi 3 juta tan batu arang diulihka ari tanah menua Sarawak ti semina ngeluarka royalti RM22 juta ke wang turu menua.
Reti nya royalti ti diasaika bala rayat di Sarawak nya semina RM7.30 aja ke setan.
Taja pan baka nya Sarawak Report bisi diterangka rega arang batu di pelilih Asia ditu, nya manggai USD$78 ke setan – RM250 setan!
Reti nya menua Sarawak udah netapka rega arang batu ba RM7.30 ke setan, ti tau dijual ngagai RM250 ke setan.
Nama kebuah kepala menteri ti dulu suba nya enda minta bayar royalti besai agi ari pengawa nya ke guna rayat iya?
Tambah mega iya rindu dikumbai orang ‘CEO’ menua Sarawak!
Uji kita meratika, enti sema Abdul Taib Mahmud udah minta 1/3 ari rega arang batu ke menua Sarawak. Penyampau nya meri RM26 juta pulai ngagai wang turu menua – empat kali lipat.
Lalu enti iya mujur minta royalti 50% ari nya, tentu nya deka ngenataika untung RM500 juta ti tau dikena melanja mayuh macham projek ke rayat di Sarawak.
Kini penunga untung ari pengawa nyual arang batu nya ngelama tu?
Sekali ke untung nya dikena mayar gaju bala anak kuli sida? Sekali ke untung nya dikena ngemataka pekara pengerai enggau pengelikun bala anak kuli sida? Sekali ke untung nya dikena mayar pampas ke pengelenyau tanah asal ngagau orang ti empu menua ti udah kena keruga sida?
Tauka, sekali ke untung nya dibayar ngagai bala pemegai syer dalam kompeni sida?
Kitai semua nemu, laban Abdul Taib Mahmud ukai siku orang ti tau nangkin gela CEO Sarawak.
Iya semina tau ngela diri empu nya CEO ke kompeni-kompeni sida sebilik aja, ti udah balat bechurika tanah enggi orang bansa asal di Sarawak ngambika dikena sida sebilik ngulih sereta nugungka pengeraja seraya ke nejuka rayat iya seranta mensena.
Adenan Satem satem, ti nganti penuduk iya patut enggau bebendar nyebut WTK enggau sida sebilik, endang bekaul terus dalam pengawa ngulihka arang batu ti dituntung penanggul ti nabanka nyawa di Selantik nya.
Tambah mega WTK endang udah dipinta enggau nyain sempekat integrity dikena perintah ngemunaska penyalah makai suap ti udu nyadi di Sarawak diatu.
