Sapit Presiden PKR, Tian Chua, udah mujur ngulihka perati bala peninga iya di London kena lemai hari Minggu tu tadi, ba pengujung penemuai iya ke menua Eropa ti mega nyengkaum pejalai iya ti bejurai enggau pemesai-pemesai EU di nengeri Brussels.
Mayuh jaku tanya ditujuka ba sekeda cherita ti bekaul enggau pemayuh duit menua ti tebasau bekaul enggau wang turu 1MDB ti ditengkebang Menteri Besai Najib Razak, ti diatu udah nyadika utang pemadu besai di Malaysia, ti manggai USD$40bilion.
Tian Chua udah nunjukka skandal nya ngembuan pekara ti nyelai, bebanding enggau penanggul pekara belanja ti bukai di menua tu, ti endur penanggul dikaitka terus enggau Menteri Besai Najib Razak.
Penerang pasal penanggul nya udah diputarbelitka, ti endur Menteri Pekara Dalam Menua udah dipejal ba minggu nyin kemari, ngaku diri udah saru jaku dalam aum parlimen enggau chara bebula madahka Perintah Malaysia kala nyamin duit injau ke 1MDB.
Penanggul tu udah ditunjukka Tony Pua ari parti DAP, ti kala udah dituduh bula ulih Menteri nya.
Udah bekau nuliska ‘surat lantang ati’ ti ngembuan kaul, ngagai bala orang ti nyali duit baka ti ditunjukka Menteri nya, ti udah diberi tanggungpengawa Perintah Malaysia ngambika nyamin duit injau nya, iya udah tepejal ngemetulka dawa iya lalu matak pulai serang iya ba Tony Pua.
Tian Chua udah nunjukka dalam kes nya endang bisi ayan chap jari sain enggi Menteri Besai Najib Razak ti bisi dalam dokumen nya, lalu PM Najib dipeda udah enda mujur madahka pekara nya ngagai baka bakih iya dalam rumah parlimen pasal liabiliti-liabiliti tu.
Tambah mega Najib endang mangku pengawa nyadi Menteri Pekara Wang menua enggau Pengerusi dalam Lembaga Penyanding Penemu 1MDB.
Iya mega nyadika kuasa pengerak di belakang pengawa dagang ti udah balat dikelingi utang nya. Nyerumba nya, ba pekara ti bukai, baka skandal Port Klang, bala menteri bukai tau ditekanka bisi tanggungpengawa baka nya.
Tian Chua nyereminka ba sebengkah penerang ti madahka Najib udah ngejang jauh agi lalu nyaman sereta besalahka Tony Pua laban dikumbai iya mansutka jaku petenah ba beberapa iti jaku tanya bekaul enggau skandal nya.
“Kitai deka nemu kini penunga sida lebuh aum UMNO minggu ti deka datai tu ila”, ku iya madahka ngagai bala pengarang berita, enggau chara nerangka baka ni Najib dipeda belalai ari orang mayuh.
Dr Mahathir mega nerangka iya ngasaika Najib Razak nya udah ngamahka nama iya nengah penanggul tu enggau pekara ti bukai lalu disadang enda ngenataika diri ngagai aum nya.
Tian Chua ngujungka jaku ba taklimat iya ti disambut enggau lekik ketawa bala peninga iya, ti endur iya ngenang, enti bisi siti pemanah dalam polisi chukai GST ti dipejalaika perintah nya, ti mega sebagi pansut ari salahatur 1MDB, atur chukai nya endang ukai pekara ti dikerinduka bala pengundi sida.
Nyerumba nya, pekara-pekara lunggar penemu dalam pengarap enggau bansa ti udah enda ulih ditagang agi, ku Tian Chua. Rayat diatu udah belabuh angkat ngelaban sereta mantah sida, tauka belabuh nyukung sekeda gerempung beluan kanan ti enda patut diperansang sereta dikemendarka betumbuh.
Ba maya ke diatu nadai siku orang nyukung UMNO, ku Tian Chua, laban parti nya udah ngasuh sida empu enda engkeman dalam ati rayat laban sida balat setanah enggau gerempung ti bepenemu kasar baka ISMA enggau Perkasa.