Tuan walikota nengeri London, Boris Johnson, udah bebendar sereta kisuh sekumbang iya nemuai ke KL minggu tu, nguji ngelakuka peluang pengawa dagang ke indu nengeri iya empu di Britain nya.
Duit ti nyelai penatai nya udah dibubuhka di London ari menua Malaysia rambau ekonomi menua kusut suba, lalu nya disadang ngasuh sekeda orang tekenyit, tang terang bendar Boris Johnson enda mansutka sebarang jaku tanya ti nyelai.
Tang iya udah bejaku ngenang utai bukai, ngansak ngambika undang-undang kuota raban bansa ti korup nya diapuska, laban kuota ti baka nya deka muru kompeni ari menua tasik ari ti bedagang di menua Malaysia, tang iya mega nadai ngenang pasal kuasa pengelantang mensia.
Iya mega nadai nyebut pemutus najib ti udah bula ke semaya diri deka ngapuska undang-undang asut ti udu nekan rayat ba minggu nyin kemari, tang melanjarka undang-undang nya dikena ngukum sebarang sapa orang ti agi deka berandauka pasal menua Sabah enggau Sarawak ti patut merintah diri.
Tang dalam rumah Parlimen UK pekara tu udah dikerandauka bekaul enggau atur perintah menua luar, enggau chara mejal raban ari parti Conservative ngambika walikota nya ngenataika kelese sida ngagai Najib Razak.
Baka ti udah direkodka dalam surat Hansard, MP Tom Greatrex, siku ari Komiti Parlimen Pasal Menua Malaysia, mansutka jaku tanya ngagai Menteri Opis Menua Luar, Hugo Swire, ti madahka diri deka nemuai ke menua Malaysia ba pun taun 2015 nyin ila.
Menteri Menua Luar Malaysia, Anifah Aman, mega disadang deka nemuai ke nengeri London minggu siti nyin ila.
Tang betanyaka pasal pemutus Najib ti ngetanka undang-undang asut, menteri nya madahka menua Malaysia patut ‘nitihka stindit entarabansa’.
Kelese ari Hugo Swire nya ngenyitka ati sekeda orang. Najib empu sigi nemu pemutus iya nya endang enda produktif ba tikas entarabansa.
Undang-undang asut Malaysia nya enda sejalai enggau stindit tikas entarabansa lalu pemanah nama Malaysia deka dipeda labuh ba mata dunya.
Najib udah ngelanggur awakka undang-undang nya dikena ngukum sebarang sapa ti nyukung sereta besetuju ke kuasa autonomi sereta merintah diri ke menua Sabah enggau Sarawak lalu atur merintah diri nya deka ngeruga kaul persekutuan menua Malaysia.
Tambah mega sempekat nya ditanggam dalam taun 1963 entara perintah koloni Britain enggau tanah Malaya, lebuh nya menya, sida nadai bulih penemu tulen ari orang mayuh di Sabah enggau Sarawak.
Aum nya kemari diatur di London lalu nadai disereta bala pengari ti sampal ari orang bansa asal Borneo.
Enggau nya asil nya dikumbai merintah diri, lalu nejuka Sabah enggau Sarawak kena genggam Malaya ti rangka dalam pengelama 50 taun nyentuk ke sehari tu.
Utai ti ditemu orang mayuh nya Najib yakin bendar persekutuan nya mujur meri penerang ti amat manah ke Borneo, lalu iya patut ngerami 50 taun tu ngena sebuah referendum, ti abis nadai pan ngamatka pinta ti bebendar ari Sabah enggau Sarawak.
Tang kelimpah ari nya Najib deka ngukum sapa-sapa ti ngelaban penemu gerempung dalam persekutuan nya lalu dikena iya nyungkak jaku tanya ba runding orang mayuh di serata dunya tu pasal nama kebuah iya kelalu takut ke penemu orang mayuh ti popular nya?
Anifah Aman mega, ti datai ari ruang bilik orang ti udah mujur nyadi raban orang ti pemadu kaya ketegal pengawa ngulihka kayu batang di Sabah ti nyadika upah iya taluk ke BN, tentu deka nerang nama kebuah perintah iya takut bendar bejaku ke pasal penemu Sabah enggau Sarawak merintah diri.