Baka ni mudah bendar sekretari sebilik ke Pengarah Opis Kampung Sabah, Sam manan, udah mujur bulih lisin nebang kampung ti besai ba atas kampung galau perintah Sabah ti dulu subah endang kampung ti dijaga?
Sam Manan udah madahka diri siku orang ti sanggup nyaga laluh rampa menua, udah bekau rampa kampung di Sabah nya balat bendar ditebang bala orang politik ti udah nyadi kepala iya, lalu mega bala kroni sida.
Kenu ku iya, iya patut regas agi, lalu reti ku iya nya, laluh rampa kampung galau nya deka diubah iya nya ‘kebun dandang besai besitak-sitak’.
Atur tu begunaka tindak ti ngemendarka lisin kebun sawit besai-besai dikereja baka sitak papan dam ti mungkur rampa menua 300,000 hektar di menua nya.
Atur nya dikiena ngeluarka kandang menua ti besai bendar rampa ngambika ditebang dalam kandang menua ti benung dijaga lalu pengawa ngulihka kayu di endur nya mar bendar dikemataka ari kena pasuk bala tukang tumbang ti bechurika kayu batang ari endur ti udah diberi lisin.
Ngena sekim tu kilang kayu ti ulih mindah-mindah dikemendarka bejalaika pengawa sida ba endur ti jauh dalam kampung, lalu nya mar agi dikemataka.
Bala orang ti mantah empas sekim nya udah ngujungka Sam Manan meri saut iya ti madahka mayuh atur ngintu rampa kampung udah dipejalaika, tang nyerumba nya iya mega majak ngemendarka pengawa nebang kampung ba endur ti dulu suba dijaga.
Ari sekeda kompeni ti dikerinduka iya ti udah nya diberi iya lisin numbuhka ‘kebun besitak-sitak’ nya Rinukut Sdn Bhd enggau mega TSH Resources, ti dikuasa siku orang dagang ti rat kaul enggau iya, Dato Kelvin Tan.
Enggau nya, nama kaul tu enggau sekretari Sam Manan ti benama ‘Mag’?
Magdalena Binti Maikas tu beasal ari menua Tambunan di Sabah, munyi ti ditusui iya empu ba laman Facebook iya, udah lama bendar bekereja enggau Opis Kampung lalu dikelala endang rapit kaul enggau bos iya empu.
Pengaruh iya dalam opis nya berupai bendar nyentuk ke tengah laman mua opis nya udah diberi nama ngangkatka nama iya.
Sebuah papan tanda udah didirika dulu ari tu, ba pintu penama ngagai rumah opis nya betulis “Mag’s Garden (Kebun Bungai Mag) – Established (Didirika) 2014”!
Siti agi tindak ti ngasuh orang mayuh geli ati nya ngaga nama baru ke sebuah kampung galau di Sabah iya nya kandang endur Utara Gunung Rara, ti udah digazetka nyadi “Gunung Megdalena” dalam taun 2012.
Mount Magdalena diatu udah ditetapka ngembuan Kandang Kampung Berega Tinggi Kelas 1 – tang dulu suba kandang nya ditetapka kampung komersil, reti nya nunjukka kandang nya udah kusi ditebang ti diatu lalu ditetapka nyadi kampung bungas, sebengkah atur selama di baruh kuasa Kepala Menteri Musa Aman.
Tang, penerang bisi nunjukka pemanah ti diberika ngagai Magdalena nya ukai semina naka meri nama kebun bungai enggau rampa kampung bebukit ngangkatka nama iya empu.
Rekod ti bisi diterima kami mega nunjukka raban sida Maikas sebilik udah dikelala nyadi pemegai lisin nebang kampung.
Lalu, nitihka repot polis ti dikenataika bala pengari rayat ari penyakal dalam taun 2013, nya nyadika atur ‘kebun besitak’ Sam Manan ti dikena iya meri lisin nebang kampung baka nya.
Bala pengari rayat ari penyakal nya udah nanya nama kebuah bayar royalti kayu kampung di menua nua nyau majak kusut taja pan pengawa ngulihka kayu batang ditemu betambah tiap taun?
Bala penyakal udah ngumbai kompeni Rinukut Sdn Bhd nya sebuah kompeni ti mujur nerima 5,000 hektar lisin kebun sawit ti ditanam dalam rampa kampung ti udah ditebang, ti berega tinggi.
Enggau nya, sapa mih ti pemadu bekuasa dalam kompeni Rinukut Sdn Bhd ti ngumbuan kuasa nebang kayu batang berega tinggi dalam kandang kampung ti dijaga lalu nukar menua nya nyadi kebun sawit?
Rekod kompeni Rinukut nunjukka 30% ari syer dalam kompeni nya dipegai menyadi Mag, iya nya Bedi Maikas lalu indu ti segulai sejalai enggau Bedi nya diau ba rumah ti sama, Lemoi Binti Masilim.
Nitihka laman Facebook, Bedi enggau Lemoi nya orang diri melaki bini, tang baka ni seduai mudah bendar tau bulih lisin nebang kayu kampung lalu muka kebun sawit?
Dalam laman Facebook mega Mag Maikas, Bedi Maikas enggau Lemoi Masilim nya rapat bendar kaul, laban sida tiga nya endang sekaban sebelayan.
Tu nyungkak jaku tanya orang mayuh nama kaul Mag enggau bos iya empu, Sam Manan dalam lisin nebang kayu kampung ti besai bendar nya?
Agi mega, lalu 70% ti mayuh agi dalam Rinukut nya dipegai entity tebilang iya nya Dato Kelvin Tan.
Kompeni enggi Kelvin Tan, THS Biocode Sdn Bhd nya nyadika sebagi ari raban kompeni THS Resources, ti beranakka puku dalam kandang menua lisin kebun sawit ti besai ke bukai, ti diulih sida nengah Opis Kampung Sabah ti dikuasa pengarah sida, Sam Manan.
Amat bendar, Kelvin Tan udah mujur bendar bulih lisin nebang kampung ti endur iya meri pangkat pengarah enggau syer 30% ari kompeni iya ngagai orang diri sebilik ti rapat bendar enggau skretari ke Sam Manan, ti ditemu rapat bendar kaul enggau bos iya empu, bulih mayuh macham buah kenang orang dalam Opis Kampung nya empu, ukai semina ketegal meri nama ke kebun bungai enggau rampa kampung ti bebukit ngangkatka nama iya?
Sam Manan engka betindak nyadika orang ti mai ubah dalam Opis Kampung Sabah, tang nyentuk ke maya rekod dikebakka magang bekaul enggau baka ni lisin nya diberi lalu ba rega berapa tiap iti lisin nya, penyalah makai suap nya tusah bendar dikemataka.
Sarawak Report nuduh Sam Manan ngereja penyalah belabanka batang pengawa diri empu lebuh iya meri lisin kampung ngagai seraban orang diri sebilik ngagai skretari iya empu lalu kami deka enchabar iya ngambika mansutka penerang ti silik bekaul enggau transaksyen duit ari wang turu menua nya.
