Bos APCO Malaysia ke dulu suba, Paul Stadlen, ti diatu siku orang ti nguasa operasyen media enggau suratberita ke Najib Razak dipeda makin lenyau pemisa ipuh iya.

Mayuh orang betanya sekali ke pendiau ti rindu berami nya datai ari upah iya ti dipelanja ngena duit chukai rayat?

Kemari, enggau penerang ari Najib (ti endur media nya dikuasa Stadlen) udah ngujungka Anwar Ibrahim diukum jil ti balat dibantah orang semina ketegal penyalah beleman sama lelaki.

Ba penerang ti mudah Stadlen ti ngumbai pechara nya sebengkah “proses ti lama” ba kes ti betegalka politik lalu udah nya ngumbai plaintiff nya nyadika “orang ti napi pengasar penyati seks ti balat”.

Ooops! ……

Bala penulis komen sepenyau ba New York Times nunjukka, bala akim Malaysia nyau deka ngalahka diri ba chara sida nuduh Anwar laban beleman chara pejal ba penulung iya ke dulu suba, ti lama udah ngubah jaku tuduh diri ngagai pengawa beleman entara dua iku lelaki.

Nya kebuah nama kebuah Stadlen mansutka tuduh pelesu ba siku orang politik penyakal lebuh maya Perintah benung ngatur pechara pasal pengawa beleman chara kasar?

Sekali ke iya ngiga orang mayuh serata dunya nya sinu ke iya, ti endur mayuh agi orang nya tekenyit enggau pemutus raban akim ti ngukum jil siku orang ketegal penyalah belemen sama lelaki? Stadlen patut nemu kes tu udah ditemu orang mayuh lalu jaku tuduh ti bula nya semina dikena ngulihka upah?

Kada enda Stadlen udah kelalu mayuh ai bisa diirup iya ba pengerami malam dulu ari nya lalu enda nemu enggau silik pasal utai ti udah nyadi?

Laban, ngena chara bebelitka penerang ti ngasuh saru runding nya semina deka ngenyaika agi nama tuan iya, ti dipelabaka endang orang ti melanja iya (ngena upah ti besai) ke pengawa PR iya kelimpah ari penemu iya ba berita entarabansa lalu baka ni chara ngatur nya.

Diatu udah bisi orang enda lantang ati di Putrajaya ke penatai Stadlen dalam opis Najib Razak.

Tambah mega kompeni APCO empu udah diketuka pengawa sida nyadi kompeni penyanding penemu beberapa taun ke udah, laban kompeni nya bepun ari menua Israel lalu menua Malaysia endang begedi ke sebarang utai ti bisi kaul enggau Israel.

Tang Najib ti nyadi tuan Stadlen udah ngetanka penuduk iya lalu udah ngatur pekara belanja ti besai bendar nyadi siku penyanding penemu pekara belanja, ti ngetur semua pekara komunikasyen Menteri Besai nya.

Penerang ari dalam madahka ngagai Sarawak Report pasal kompeni Stadlen nya enda jauh ari opis raban komunikasyen Menteri Besai nya dibayar upah enda kurang ari RM3,000,000 setaun.
Entara bala orang ti diupah bekereja dalam raban nya, siku peranak menua Britain, Arif Shah.

Arif Shah nya endang diupah nempa penerang PR ti manah-manah pasal 1MDB ti makin puntan, nitihka penerang ari dalam ti udah diperesa Sarawak Report, lalu mega dikena nguasa komunikasyen ba pengawa ngelancarka IPO dikena nyelamatka wang turu nya, ti bisi kaul enggau pengelenyau bejuta-juta dollar.

Komunikasyen ke PR tu bekaul enggau pemayuh upah RM1.5 juta tauka mayuh agi ke kompeni Stadlen, nitih ke bala orang ti ngelala iya.

Palan ngelantangka ati ti tebilang di sebelah nengeri KL baka Zouk suah nyediaka mija ke Stadlen, ti terang bendar ngasaika pengaya lalu iya bisi timpuh ti mayuh ngena semua belanja nya.

Kejang pengerami Krismas taun nyin kemari, Stadlen bisi charut enggau sekeda orang lalu udah nya dijamah orang dalam lif di KL.

Bala orang ti ngelala iya madahka batang besi bisi dikena orang nyamah Stadlen lalu iya balat bendar bakal ba laya nya.

Laban penyarut nya nyadi di Malaysia, Stadlen mujur ngelamun cherita nya ari diayanka dalam sebarang suratberita, taja pan mayuh bala pengarang berita nemu pasal berita nya.

Tu mih siku orang ti udah meri arah ngagai raban media ke Menteri Besai napi sebarang PR ti mar-mar ti ulih dirunding tau nyadi di serata dunya.

Tambah mega, enda kurang ari dua iti kes pechara dalam kot ti nyelai, diatu dipeda mantul pulai ngagai Najib, baka isu kes beleman sama lelaki ba Anwar Ibrahim enggau kes bunuh Altantuya.

Udah nya pansut mega isu 1MDB ti nekan tanggungpengawa Stadlen, ti endur Najib patut ngayanka pengelandik sida ngatur pejalai puku dagang bala orang ti beranakka puku sida dikena Najib ngulihka pengarap sida.

Diatu Stadlen patut ngema tanggungpengawa ba pengilap ti udah nyadi beberapa hari tu udah, bekaul enggau nama tuan iya ti napi mayuh jaku tanya ari suratberita New York Times.

Tang pekara nya agi mengkang dilalaika ari media, tang nya mega udah ngeruga kaul diri sebilik Najib empu enggau anak tiri iya lalu mega enggau bakih dagang kunsi iya.

Tang, dalam pekara tu Stadlen udah nimbal jaku tanya orang mayuh ba ulah Najib enggau Rosmah ti bebelanja besai, ti endur iya madahka Menteri Besai nya nampung pengeraja orang tuai iya empu.

Ba siti berita ti udah dipansutka kena hari Satu nyin kemari, bekaul enggau pengaya nyelai Jho Low, pejalai duit ari wang turu 1MDB enggau reta enggi tauke kayu batang Sarawak di menua US lalu enggau kaul Jho Low nya enggau Najib enggau Rosmah lalu mega enggau anak tiri Najib ti baru bejinak-jinak dalam pengawa ngaga wayang, Riza Aziz.

Saut ti ngasu saru runding ti bekaul enggau pengeraja Menteri Besai ti kenu ku iya nya diturunka ngagai iya nya udah ngundang komen ari mayuh orang politik di Malaysia empu, lalu penerang nya udah nyungkang pengeringat ari bala sida Najib sebilik, ti ngumbai apai sida Tun Abdul Razak, ti mega siku Menteri Besai suba, udah nyadi siku tuai ti tebilang belabuh ari pengawa iya ti bekereja ba opis perintah.

Bala menyadi Najibti udah ngamatka penerang ti madahka apai sida Tun Abdul Razak nya siku Menteri Besai tu lurus, udah idup chara jelan lalu lebuh iya mati iya nadai ninggalka reta pengeraja ke bala anak uchu iya.

Bebida enggau apai iya, Najib enggau bini iya Rosmah nya dua iku melaki bini ti balat rua bebelanja lalu diatu tekan nya diasaika Stadlen ngambika miki pengerusak enggau pengamah nama orang diri sebilik nya.

Kelimpah ari nya bisi mega penerang ti madahka pengeraja Najib diturunka ngagai iya ari Wang Turu Noor.

Tang bala pemerati madahka penerang nya enda betul (kelimpah ari Tun Noor nya kelia udah ninggalka duit iya ba wang turu nya, ukai ngagai bala anak uchu iya).

Tambah mega, dikena ngaitka duit nya enggau nama Tun Noor deka nyungka tanya ti nyelai-nyelai, aki Najib, iya nya Tun Noor, ari sepiak indai iya nya bulih pengaya enggau chara numbuhka empayar judi di Genting!

Disimpulka enggau jaku pandak, Stadlen udah nambahka penanggul Najib enggau bala orang ti benung engkabit ba Menteri Besai nya pechaya ke Menteri Besai nya balat begunaka siku pemesai PR ti kurang agi beperindang lalu numpuka mayuh agi jam iya ba kereja iya.