Ba pengelama beberapa minggu Sarawak Report udah mansang ba baris mua, nuliska repot pasal sekeda isu ti bisi bekaul enggau pengelenyau bebilion-bilion dollar ari wang turu pemansang menua Malaysia, 1MDB.

Kami udah mantaika mayuh surat penerang enggau emel ti endang disadang kami tau ngasuh sekeda orang ringat sereta nyima di Malaysia bekaul enggau penyalah makai suap, penanggul salah atur pejalai belanja menua enggau pengawa ngelanggar undang-undang menua.

Tang ke sekeda orang ti diayanka dalam gambar dalam artikel kami, bisi bendar bala sida irau ati bekaul enggau gambar enti dibandingka enggau, sekali ke sida deka kena pansik tauka ditekan tanggungpengawa bekaul enggau penanggul dalam 1MDB diatu.

Kami ulih nyimpul penemu ditu, laban beberapa hari ti udah laman web Sarawak Report napi serang kimpin ti balat dikena mejal kami madamka sekeda gambar nya, ti ditemu udah meri penerang koroboratif ke cherita tauka repot ti ditulis kami nya.

Enggau gambar sereta cherita bekaul enggau sekeda orang siku-siku ti ditusuika bebelanja besai, ti udah nya dikaitka enggau pengelesap duit bebilion-bilion dollar ari wang turu pemansang ti patut dikena ngemansangka rayat Malaysia enggau pelilih menua ti agi tinggal ba pemansang, kami pechaya penerang nya nyereminka isi berita ti bendar lalu orang mayuh patut bisi kuasa meda tauka meresa semua gambar nya.

Ba ari Satu minggu nyin kemari seraban penegeruga professional udah mujur tama ngagai laman admin ba laman web Sarawak Report tu.

Sida tu belabuh bejalaika pengawa bekerugaka laman web tu ari pukul 10.37 pagi lalu dalam pengelama setengah jam nya sida udah madamka siti ari repot kami lalu sida udah mujur nentuka bagi trash dalam laman kami tu mega diperesi enggau silik (awakka kami enda ulih ngeluarka cherita nya baru).

Bala pengeruga laman nya udah nentuka lumur IP sida dilalaika, ba chara sida ngelalaika endur asal sida.

Dua iti lumur IP nya nuju pelayan bekarung lalu sida ngelalaika diri nya datai aari Google – sebengkah chara nipu ti mudah, munyi ti diterangka bala pakar internet ngagai kami.

Enggau nya, ni bagi cherita ti udah dikeruga sida nya?

Herita nya pasal pengerusi kompeni Aabar Investment ari menua Abu Dhabi, iya nya Khadem al-Qubaisi.

Cherita nya ditujuka ngagai siti penerang ti madahka pengerusi waang turu nya udah bejalaika pengawa dagang ti besai ti napi jaku kutuk laban bisi bekaul enggau 1MDB, udah nerima bayar lebih USD$20 juta ari kompeni Good Star Limited.

Good Star Limited nya nyadika sebuah kompeni ti ditemu kami nyadika penerima bayar ti resia ke ‘bayar duit injau’ USD$700 juta, ti patut dibayar ngagai PetroSaudi ari 1MDB.

Kami ulih ngamatka penerang ti madahka kompeni Goood Star Limited nya endang enggi Jho Low.

Enggau nya kami udah mansutka jaku tanya, nama kebuah pengerusi Aabar Investment ari menua Abu Dhabi nerima bayar $20 juta ari kompeni Good Star, udah bekau Aabar Investment dibai enggau atur ti nyelai awakka meri jamin ba pengawa ngeluarka bon 1MDB dikena meli palan kuasa karan di Malaysia?

Sekeda orang ti mantah pejalai wang turu 1MDB nya betanyaka nama kebuah dagang kunsi tu ti diatur gerempung duit jali Goldman Sachs ngulihka bayar komisyen 11% ti begunaka jamin ari Aabar Investment?

Sida ti mantah nya nunjukka terma-terma dalam jamin nya manggai setengah ari penyampau duit ti ulih ari bon nya patut diengkahka di menua Abu Dhabi.

Sida mega nunjukka dagang kunsi nya mega meri pemilih dikena meli palan kuasa karan ti udah ditanya lalu nya ulih mansutka atur nya ari sekeda tagang dalam 1MDB mega dipejal mayar $1 jta dollar pada haribulan ti nangkanka nya.

Ba ujung minggu nyin kemari tuai penyakal DAP Tony Pua bisi nunjukka, laban chara 1MDB milih mindahka duit tu, ngujungka wang turu nya betambah ba pemayuh duit ti diinjau ngagai RM20 billion dikena bebelika perengka ke palan kuasa karan di Malaysia ti semina beungkus semina RM10 billion aja.

Enggau nya kami betanya nama pengujung ke duit ti lenyaau enda ditemu penunga nya lalu nama kebuah pengerusi Aabar Investment ti udah besangkutpaut dalam dagang kunsi tu, nerima sepenyampau bayar ti mayuh dalam taun 2012 ari kempeni Good Star Limited?

Diatu kami deka nentuka kebuah artikel kami nya kena keruga lalu dipadamka terus ari laman kami tu ukai ketegal sekeda orang berasai nyima ke berita enggau gambar ti dibantaika kami bisi bekaul enggau duit bayar nya?

Tauka, engka laban gambar al-Qubaisi ti mangku pengawa di bekerejaka wan guru menua iya empu di Abu Dhabi udah diayanka ba gambar ti dikeluarka kami kelimpah ari enggau penerang ti bekaul enggau reta pengeraaja enggi iya?

Sarawak Report udah suah bendar kena serang tauka dikerga, ti mega betuju dikena madamka sekeda gambar ti ayan dalam laman web kami.

Ba beberapa hari sebuah opis agensi gambar bala selebriti ti enda kala didinga nama udah minta kompeni pelayan web kami madamka semua gambar ti bekaul enggau Jho Low ti benung beperindang di menua Selatan Peranchis bergulai enggau Paris Hilton (Jho Low dipadahka melanja Hilton bejuta-juta dollar ba palan endur ngelantangka ati seraya ngirup champagne).

Agensi gambar bala selebriti ti enda kala didinga nama nya udah ngemba kami ngena leka jaku undang-undang, minta kami madamka gambar ari laman web kami tu, taja pan semua gambar nya lama udah bisi ba internet tauka dalam laman web ti bukai enggau daalaam surat majalah ti bukai, laban munyi ku agensi nya sida bisi ngembuan hakcipta (kuasa bempu) ba gambar nya.

Taja baka nya, agensi ti enda kala didinga nama nya lalu bedau ulih nunjukka penerang sida bisi kuasa bempu gambar nya.

Agensi nya mega nadai nunjukka sida bisi ati deka minta bayar pampas kami udah ngena tauka mantaika gambar nya.

Tang agensi nya udah milik nengah pintu belakang tama ngagai laman kami tu ba poengawa sida nguji madamka semua gambar lalu mega ngemba kami sida deka ngena undang-undang ba kami.

Jho Low ditemu udah berubah nyadi orang ti ngasika apai indai lalu ngembuan ulah manah udah bekau gambar iya ti ngayanka sekeda ari pengeraja iya.

Kami arap, tu ukai pendiau belalai iya dikena meli kuasa bempu ke atas gambar nya, ti endang betuju madamka gambar ari dipeda mayuh agi orang.

Enti Jho Low amat nguji deka empelas mua diri enggau chara ngemba bala pengarang berita awakka enda mantaika gambit nya, kami pechaya iya patut nerangka ngagai rayat Malaysia nya iya nadai begunaka duit ari wang turu nya.

Tambah mega gambar ke terubah ngayanka orang kaya ti agi biak nya benung berami udah diayanka udah bekau pengawa nanggam sempekat enggau PetroSaudi ti asal dalam bulan September 2009 suba, iya nya udah bekau USD$700 juta dipindahka ngagai akaun kompeni Good Star ari 1MDB.

Udah nya dientudikaUSD$160 juta ba bulan September 2010 enggau USD$260 juta ti udah dibayar 1MDB ngagai PetroSaudi, ti udah nya mindahka duit nya ngagai akaun bank Jarvace nengah kompeni PetroSaudi Seychelles ti deka dikena meli bank UBG, ti endur Jho Low bisi sher ti mayuh lalu mega nyadika siku ari pengarah ba bank nya.

Kami deka nemu sekali ke duit nya mega dikena melanja lawyer ngeluarka surat sama ti kasar dikena meresi nama iya?

Gambar nya mega ngayanka ulah Paris Hilton ti mabuk ti benung bepagut ba Jho Low nyentukka tanchut dalam iya pan ayan dipeda ba gambar nya.

Enti Jho Low arapka diri ulih madamka pengingat orang enggau chara mansutka duit ti mayuh dikena ngukum orang, kami mega pechaya ke gambar tu patut disadung enggau naka pemayuh, ngambika mayuh agi orang ngelala sereta ingat ke pasal cherita tu, sebedau gambar tu dipadamka sereta undang-undang diteritka.

Lebih agi enti ke semua atur nya dipelanja ngena duit to diinsap pansut ari wang turu pemansang menua Malaysia, 1MDB.

Kami ngansak orang mayuh nyimpan gambar tu lalu nyadung tauka engkahka gambar tu ba laman Facebook sida, nyerumba orang siku ti nguji madamka gambar bakih dagang iya empu, Khadem al-Qubaisi.