USD$300 juta agi dipindahka tama akaun kompeni Good Star Limited ari 1MDB! BERITA ANGAT!

Beranakka puku dagang ngambika maju tauka enda deka nginsap duit injau ari menua Malaysia?

Surat-surat penerang ti baru diulih Sarawak Report nunjukka dalam taun 2011 kompeni Good Star Limited enggi siku orang dagang ti mega nyadika bakih Menteri Pekara Wang / Menteri Besai Malaysia Najib, iya nya Jho Low, udah nerima USD$300 juta agi ‘duit injau’ ti udah dikemendarka 1MDB, ti patut dipasukka dalam dagang kunsi sida, PetroSaudi International (PSI).

Good Star Limited bepalan di Seychelles, tang direjista di Pulau Cayman lalu bisi akaun bank di menua Zurich. Orang ti diberi kuasa nurunka sain dalam akaun nya Seet Li Lin, iya nya mandal Jho Low.

Jho Low seruran madahka diri nadai bekaul dalam 1MDB lalu mega nadai nerima sebarang untung ari wang turu nya.

Good Star Limited – penerima USD$330 juta ari wang turu 1MDB

Tang Sarawak Report udah mantaika rintai nama bala Pengarah dalam PSI ti udah setuju nyadika ‘pengari’ Jho Low lalu ari USD$1.5 billion udah diperanakka dalam PSI entara bulan September 2009 enggau bulan September 2010, USD$860 juta udah dipasukka chara belalai ngagai akaun RBS Coutts di Zurich, ti enggi kompeni Good Star Limited.

Akaun bank RBS Coutts di Zurich enggi Good Star

Diatu bala pemansik udah ngamatka penerang pasal USD$330 juta agi dikemendarka baka ti kala dipinta 1MDB nyali duit ngagai PSI ba bulan Mei 2011, ti mega dipasukka ngagai akaun enggi Good Star Limited.

Duit nya udah dipelanja ngena “duit ti diinjau ari mayuh bengkah bank di menua tasik enggau laluh untung Sukuk Muharabha” ku pemesai raban pemansik, ti mantaika repot sida ba pun bulan nyin kemari ngagai raban penerit undang-undang di Malaysia.

Baka ni pemindah duit nya dikelala dalam akaun 1MDB – duit ti dikumbai udah dipasukka ngagai akaun PSI dalam taun 2012

Duit nya udah dipindahka dalam empat renggat ngena mata duit Dollar Amerika (USD$30 juta USD$65 juta USD$110 juta USD$125 juta) terus ngagai akaun enggi Good Star Limited dalam bank RBS Couuts di Zurich.

Tang pemendar udah diulihka bala pengatur ke 1MDB dikena nyali duit ngagai 1MDB PSI (BVI) enggau dalih dikena “melanja pengawa dagang di menua tasik ba sektor minyak enggau gas”.

Dalam peminta 1MDB nya, nama kompeni Goood Star nadai disebut, pia mega pemindah duit ngagai akaun Good Star pan nadai disebut.

Taja pan baka nya, keempat-empat renggat bayar ba penyampau USD$330 juta ari dua buah bank ti enda sama di Malaysia udah dipindahka tama akaun bank enggi Good Star, nitihka surat-surat penerang ti bisi diterima kami.

Semua duit dipindahka ngagai akaun RBS Coutts enggi Good Star, nitihka surat-surat penerang (nama kod dipelalaika)

Peminta ari 1MDB nginjau duit madahka atur nya “nyadika sebagi ari pengawa chakah perintah Malaysia enggau dagang dalam sektor kuasa”, nitihka repot ari raban pemansik.

Tang penerang ti bekaul enggau sempekat dagang kunsi entara perintah dua bengkah menua nya enda tentu terang tauka nyengala.

Penerang bekaul enggau pengawa dagang PSI di Malaysia mega nadai dikelala, kelimpah ari pengawa sida ti meli sereta ngambi alih bank UBG ari sida Abdul Taib Mahmud sebilik ti dipelanja 1MDB, baka ti kala ditusui Sarawak Report dulu ari tu.

Nambahka nya, 1MDB madahka peminta sida ba raban penguasa pekara wang menya, sida nyali duit ngagai 1MDB PSI (BVI) udah dikemendarka Menteri Pekara Wang enggau bala Pengarah 1MDB, nitihka pemansik.

Duit nya enda dipindahka tama ngagai 1MDB PSI (BVI), tang dipindahka ngagai akaun Good Star Limited, ti dikuasa Jho Low.

Pekara ti nyelai, iya nya raban pemansik tetemu penerang pasal USD$330 juta dipindahka ngagai akaun Good Star nya udah direpotka ngagai Bank Negara Malaysia dipadahka udah dibayar ngagai kompeni PSI, iya nya 1MDB PSI.

Bayar ba penyampau ti kelalu besai patut ditemu atur enggau undang-undang pekara wang Malaysia ba repot ITIS tikas entarabansa.

Repot tu bisi nyebut duit nya udah dipindahka ngagai indu akaun PSI.

Repot ti madahka duit udah dipindah masuk indu akaun PSI (nama kod dipelalaika)

Jaku tanya diatu nya sapa ti meri penerang ti ngasuh saru ti madahka Good Star nya anak kompeni PSI?

Pia mega, nama kebuah nadai siti pan bank ti bisi kaul dalam semua pemindah duit nya ulih tetemu ke repot pemindah duit ti nyelai nya?

Pia mega pengasai ati ti enda arap ti semakin ngerembai pasal baka ni USD$1.103 billion agi belaluh ari pengawa dagang PSI lalu mengkang tesimpan dalam akaun bank BSI Singapura munyi ti disebut Menteri Pekara Wang, Najib Razak?

PSI meli kapal dikena ngulihka minyak ngena duit 1MDB lalu diatu meri lisin ngagai sebengkah konsesyen minyak ti nguntungka ti bepalan ba luar Venezuela. Tang nama utai ti pulai ngagai 1MDB lalu sapa ti meli pengawa dagang nya?

Ari penyampau USD$1.93 billion ti dikira Sarawak Report, udah dijali ngagai PSI, kami tetemuka USD$1.1 billion udah dipasukka ngagai akaun Good Star Limited.

Ba pun minggu tu tadi kami udah mantaika penerang madahka raban penerit undang-undang Singapura bisi tetemuka USD$500 juta udah dipindahka nengah akaun BSI Singapura enggi Jho Low ari akaun Good Star entara taun 2011 – 2013.

Tang Najib Razak mengkang madahka USD$2.3 billion udah mujur diambi pulai ari pengawa dagang PSI dalam taun 2012 lalu USD$1.103 billion ari duit nya mengkang disimpan dalam akaun Brazen Sky Limited enggi 1MDB di menua Singapura.

Kenu ku dalih Najib, iya enggai mai duit ngemayuh nya pulai ke Malaysia ngambika bisi dikena mayar utang 1MDB ti udah balat dituntung penanggul laban pengawa nya begunaka pemendar ari Bank Negara.

Kami arapka tu mih maya ti engkeman endur Kepala Audit Menua berandau enggau bank BSI Singapura awakka sama-sama meresa akaun 1MDB nya.

Comments