Udah beperagam ke mayuh macham leman pekara beberapa hari, anak lelaki siku orang ti mungkal penumbuh AmBank Hussain Ahmad Najadi, udah sechara tebuka ati nusui lalu ngamatka pengirau ati diri ke penyalah makai suap dalam bank ti kala dikemataka iya suba.
Hussain Najadi udah mati kena timbak ba endur engkah kerita di KL kena 29hb Julai 2013, iya nya sehari sepengudah iya ngaga repot polis bekaul enggau penyalah makai suap nya.
Pascal Najadi, iya nya anak lelaki Hussain Najadi, diatu ti benung diau lalu bekereja di Moscow, udah berandau enggau Sarawak Report lemai tu tadi ba pengawa iya ti ngaku madahka tu mih motif apai iya dibunuh.
Pascal madahka iya enggau sida sebilik ninggalka menua Malaysia kali ke penudi kena 8hb Mac 2014, iya nya sama berebak enggau hari pengelenyau bilun MH370. Kenyau ari maya nya iya lalu ngumbai iya enggau sida sebilik enda likun diau ti Malaysia agi.
Iya madahka ngagai Sarawak Report ba kali ke penudi iya betemu enggau niang apai iya, nya empat hari sebedau apai iya parai dibunuh lalu dulu agi ari nya iya kala ninga apai iya bejaku ke pasal pekara ti seruran ngachau runding iya.
Tang Pascal madahka iya nadai kala dipadahka sekali ke apai iya nya kala ngenataika repot polis. Tang iya pechaya ke apai iya kala nusui pekara nya ngagai sekeda orang dalam perintah ti benung bekuasa maya nya.
Pascal mega bercheritaka pasal apai iya ti kala bejaku ke baka ni iya udah enggai nyambut suap ari sekeda pengari ari parti UMNO.
Pascal madahka iya ulih belaba ke kes pemarai apai iya nya udah ditutup laban nyentuk ke diatu raban polis Malaysia udah enda mujur nangkap bala orang ti ngereja penyalah nya tauka nusui pasal pejalai pansik ti meruan.
Lalu pekara ti ngasuh ati pedis agi nya, pemuntan raban polis meri penerang ngagai sida sebilik tauka mansik dikena ngulihka penerang ari sida sebilik pasal pengawa niang apai iya besehari-sehari lebuh iya agi idup suba.
Pascal madahka diri semina bisi nerima siti kangau telefon ari polis ti agi biak, ti enda tentu lanchar berandau ngena jaku Inggeris, bekaul enggau pemati apai iya nya.
Udah nya, sida Pascal sebilik nadai agi dikangauka polis.
Ke pengujung iya, pemunuh nya udah ditangkap lalu meri penerang pasal siku lelaki ti udah ngupah iya enggau ungkus RM20,000 ngambika nimbak Hussain Najadi sampai parai. Tang nitihka penerang ascal empu, iya nadai ninga penerang ti madahka polis udah nangkap pengupah nya, ti udah ditemu sida diau di menua Australia lalu ditemu bisi kaul enggau sekeda orang dalam perintah di Malaysia.
Pascal Najadi nya siku orang ti landik ba pengawa bank tikas entarabansa, madahka ba ke dudi hari pasar tikas entarabansa deka lenyau pengarap orang ba menua Malaysia, ketegal empas penyalah makai suap ti balat dikereja lalu mega ketegal pengelemi ba atur pekara wang menua.
Pascal madahka ngagai Sarawak Report, penerang nya deka nganu sebuah rejim perintah ti seruran deka bepanggai ba pengawa nginjau lalu mega ba pejalai dagang pekara wang.
