Sarawak Report udah bulih sekeda minit aum raban pengarah 1MDB ti ngamatka jaku penerang ari Arul Kanda bekaul enggau ‘duit tunai dalam bank’ ba BSI Singapura nya ukai salah penerang tang nya nyadika chara salah ti sengaja dipansutka dikena ngerachun runding orang bukai.
Bank Negara Malaysia udah nemu skandal tu ari penerang ti dikena enchabar pengawa Lawyer Bansa ti nguji nyekat pansik ke dalam 1MDB bedau lama ti udah. Pengawa nya udah nyungkak pengirau ati orang mayuh ba ulah bala bakuh Najib ti enggai nerima penerang madahka duit berbillion-billion udah dichuri ba sebengkah pengawa dikena ngelamun pemuntan wang turu pemansang Malaysia nya.
Dalam bulan April Sarawak Report bisi udah mansutka penerang ti diulihka ari raban penerit undang-undang pekara wang di Singapura ti nunjukka nadai ‘duit tunai’ dalam akaun enggi 1MDB dalam BSI Singapura.
Pekara nya udah mejal Arul Kanda’ matak sekeda jaku gerah parlimen ti dipansutka Menteri Pekara Wang Malaysia, Najib Razak, ti udah tekelanjur madahka US$1.103 billion udah dipasukka ngagai akaun bank BSI Singapura.
Arul udah nerangka pasal reta 1MDB ti disimpan dalam BSI nya ba ‘unit-unit’ aja, ti dikumbai Sarawak Report enda tau nyadika jamin ke mata duit ti bendar (enti sema bisi).
Tang diatu kami bisi bulih sekeda minit aum raban pengarah 1MDB ke aum bulan Januari ti endur CEO Arul udah nguji meri jamin ngagai bala pengarah ti endur iya madahka endang bisi duit tunai dalam akaun kompeni Brazen Sky dalam bank BSI.
Arul kanda udah meri dalih ti enda engkeman ba nama kebuah, kelimpah ari ngena duit dalam wang turu nya, 1MDB udah nginjau mayuh agi duit dikena nutup belanja ti majak kembai nya. Tu nyadika timbal ke pengirau ati Pengerusi sida, Lodin Wok Kamaruddin, ti endur raban pengurus udah besemaya ngagai orang mayuh deka ngambi pulai duit nya tang sida puntan ba pengawa nya.
Nitihka sekeda minit aum, dalih Arul ti madahka duit enda ulih dibai pulai laban duit nya mengkang disimpan dalam bank nyadika jamin ke siti agi duit injau ti deka dikemendarka Deutsche Bank.
Raban pengarah baru tembu madahka 1MDB napi pengelenyau duit tunai ti balat enggau mega penanggul nadai bepengarap, nyerumba kompeni nya ti merambu deka ngelepaska diri ari penanggul sida empu enggau chara ngeluarka syer ba pasar dagang syer.
Lalu Lodin deka nemu nama kebuah raban pengurus nunaika semaya sida deka ngena laluh ari duit dalam wang turu Caymen Island (Brazen Sky), ti dikumbai iya bisi ‘penguntung’ ari puku dagang dalam PetroSaudi kenyau ari 2009 – 2012 suba.
Saut ari Arul nya ukai semina enda ulih dikarapka, tang sengaja ditusui iya ngambika ngenyarutka runding orang ti ninga tusui iya nya.
Kenu ku penerang Arul ngagai raban pengarah, Deutsche Bank nagang iya mai duit tunai pulai, laban bank nya ngasuh sida nyimpan duit tunai di Singapura ti sebaka penyampau US$975 juta ti udah dijali ngagai 1MDB.
Endang mar bendar dikarapka enti pengawa nyimpan duit dalam bank dikena meri jamin duit injau ti sebaka penyampau, lebih agi lebuh ‘kos servis ti tinggi’ nyadika pengirau ati ba wang turu nya?
Enggau nya, ukai ketegal Arul udah salah tusui, tang penerang nya amat bendar pasal aset tunai nya dipegai, enggau chara meri dalih bank ti nyali duit nya enggai nerima sebarang jamin nangkanka nya.
Bisi isu ti nyelai pansut ari minit aum ba bulan januari nya. Ba penerang ke orang mayuh 1MDB madahka US$1.103 billion dalam akaun Brazen Sky, tang Arul madahka ngagai raban pengarah semina bisi US$939 juta aja – iya nya lebih seratus juta kurang.
Tang nadai siku pan raban pengarah dia udah mangkitka pekara ti nyengala nyelai nya.
Tang Sarawak Report madahka semina siti aja penerang ti tau dikarapka ba semua talat enggau kelikuh tu, ti endur Arul puntan mai pulai duit tunai ti ku iya nya, laban endang nadai sebarang utai dalam akaun nya.
Diatu kitai benung ngiga dini endur RM42 billion nya?
Pemutus aum enggau ulah besetujuka lojik ke penerang Arul Kanda ti ninggalka bebillion-billion ringgit dalam bank dikena meri jamin duit injau mayuh agi billion, nunjukka ulah ti enda ambi peduli raban pengarah nya.
Siku CEO 1MDB ti udah badu bekereja dia, Shahrol Halmi, ti nemu bendar pasal nama kebuah nadai duit ti bendar dalam akaun BSI Singapura.
Tambah mega iya udah nyadi pengerusi raban pengarah lebuh maya pengelenyau US$700 juta ari 1MDB kenyau ari hari terubah dagang kunsi 1MDB PetroSaudi dipunka.
Iya empu udah ngemendarka dua iti duit injau ngagai PetroSaudi – US$500 juta dalam bulan September 2010 lalu udah nya US$330 juta ti dipasukka ngagai akaun Good Star Ltd enggi Jho Low dalam taun 2011, nitihka surat penerang ti diterima Sarawak Report ari pansik Bank Negara Malaysia atas puku dagang wang turu nya.
Bayar ti manggai US$11.83 billion, ti ngayanka penyampau munyi ti dipansutka Gabenor Bank Negara, Zeti Aziz, lebuh iya mansutka jaku kutuk mantah pengenggai Lawyer Bansa mansutka pechara bekaul enggau penyalah besai ngenchuri duit, nyengkaum awakka 1MDB patut ngambi pulai duit nya.
Tang Shahrol udah enda malu minta orang ti ngangti iya, Arul kanda, mansutka penyampau puku dagang kenyau ari 2009 suba!
Diatu nyau ukai nyadika entelah agi kini penunga duit puku dagang PetroSaudi nya dipasukka entara 2009 enggau 2011 – lalu duit nya ukai masuk ngagai bank BSI munyi ti disebut!
Nya udah nerangka baka ni nadai sesen pan duit udah ditebus ari dagang kunsi nya dalam taun 2012, nya kebuah nadai duit diperanakka di Pulau Cayman nya.
Sekeda surat penerang ti udah bisi ba Sarawak Report diatu udah datai ba jari sekeda raban penerit undang-undang pekara wang entarabansa, madahka duit nya udah dipansutka ari dagang kunsi 1MDB PetroSaudi, udah dipasukka ngagai akaun Good Star enggi Jho Low; dikena meli UBG Group (ti endur Jho Low enggau Taib Mahmud ditemu bisi bekaul); dikena mayar Jho Low enggau bala konspirator dalam PetroSaudi enggau duit tambah ngagai PetroSaudi empu.
1MDB udah nyewa Bridge Partners dikena ngemataka ‘puku duit tunai’ dalam akaun ti dibagi-bagi di Pulau Caymans!
Pengawa dagang 1MDB enggau Aabar Investment udah meratika duit ari wang turu nya tepuruk tama ngagai panjuk utang ari 2012 enggau 2013.
Sekali agi, Aabar/IPIC datai baru laban deka nyelamatka wang turu ti udah balat tebunsa nya, kelimpah ari orang ti ngaga pemutus penemu (Najib Razak) dipeda baka ti numbak lubang dalam ekonomi menua Malaysia tu udah majak balat puntan, ketegal ti deka nyelamatka penuduk iya empu dalam politik.