Menteri Besai Malaysia Najib Razak majak napi jaku kutuk sehari tu enggau pengeluar sebengkah repot ti silik di KL ti diasilka raban NGO Human Rights Watch, ti diatur dulu ari penemuai Presiden Obama ujung bulan tu ila.
Repot 145 iti limpir nya ngutuk perintah Malaysia laban udah nanam asai ati ti takut lalu ngeruga kuasa peneka ati bejaku di Malaysia lalu repot nya bepelasarka analisa ti silik ba undang-undang kuasa perintah kukut besi entara taun 2014-2015, nyengkaum Akta Ngasut, Akta Nyelak enggau Ngeluar, Akta Komunikasyen enggau Multimedia enggau Akta Begelumu Enggau Likun enggau undang-undang penyalah, semua nya udah dikena ba sada nyawa ti mantah perintah Barisan Nasional.
Raban NGO Human Rights Watch madahka chura undang-undang tu dikena mai pengirau ati ke proses salah guna atur undang-undang, nangka orang sepeneka ati lalu nawa orang enggau chara bechiping.
Enggau nya raban NGO diatu udah seluan enggau bala orang ti mantah, ti ngerepotka pasal atur ti kasar ti dikena Menteri Besai Malaysia nutup mulut sapa-sapa ti inggar mantah iya.
Bedau tentu lama tu udah Sarawak Repoirt kala ngerepotka baka ni Najib udah enggau beguai-guai ngena kuasa eksekutif iya nyekat sebarang orang ti nguji ngena tanggungpengawa sida ti nyadi pengari rayat ari parti penyakal ti mantah perintah iya.
Blog Sarawak Report udah disekat ari ti dikerembaika di Malaysia ngena akta enggau undang perintah Najib ti baru.
Blog tu udah disekat di Malaysia laban ngeluarka asil pansik kami ba skandal 1MDB, enggau dalih ti madahka kami ngubah sereta ngachau semua penerang asil pansik enggau tuju dikena ngachau, ngeruga sereta meri malu orang siku-siku.
Editor Sarawak Report dipansik ngena undang-undang pengawa salah lalu sebuah waran tangkap udah dikeluarka, kelimpang sebuah peminta ngemasukka nama iya dalam rintai Notis Mirah ba opis Interpol (Polis Entarabansa).
Tang, Interpol udah nulak peminta Perintah Malaysia nya.
Enta chunto undang-undang kasar ti dikena ba atas raban penyakal, raban orang ti rinduka kuasa pengelantang mensia, bala pengarang berita, bala lawyer enggau rayat selama, lalu ari nya repot nya selanjur enggau atur nyekat Sarawak Report lalu ngansak perintah Malaysia enggau raban opis SKMM matak sekat sida lalu ngetu mansik kami.
Dalam surat sida ti ditujuka ngagai Menteri Dalam Menua Zahid Hamidi, raban NGO Human Rights Watch nya bisi disempulang mayuh jaku tanya.
Jaku tanya tu ti mega disempulang mayuh agi jaku tanya udah dikirumka ngagai Menteri Dalam Menua, Lawyer Bansa, Kepala Polis Menua enggau Opis Menteri Multimedia enggau Komunikasyen ti dulu ari pengeluar repot nya. Pekara ti ngenyinuka ati nya, raban NGO Human Rights Watch mengkang bedau nerima sebarang respon.
Repot nya deka ngujungka bala tuai perintah ari serata dunya mar bendar deka melakangka salah guna kuasa pengelantang mensia ba pegai perintah Najib, mayuh agi bala sida nya deka dataai di Kuala Lumpur bulan nyin ila laban deka ngulu aum ASEAN ke-27.
Repot ti bisi penekan nya nyengkaum jaku randau enggau bala orang ti rinduka pengelantang raban bansa, bala pengarang berita, bala lawyer, enggau raban orang aakademik, raban orang politik ari penyakal, enggau mega penerang ari perintah, enggau repot media bekaul enggau pechara dalam kot ti bisi kaul enggau kuasa sepeneka bejaku enggau begempuru.
Repot ti penuh “Creating A Culture of Fear: The Criminalisation Of Peaceful Expression in Malaysia” boleh dibaca (DITU).