Bala pengarah dalam 1MDB semina diberi kuasa “neruska jurai” ngena atur ti dikumbai sida “perambu dagang kunsi” ba sebengkah aum sida semina dua hari sebedau sempekat dagang kunsi enggau PetroSaudi ti bendar nya ditanggam!
Penerang tu datai ari sekeda minit aum ti udah mujur ditemu Sarawak Report, lalu ke sekali tu pasal aum raban pengarah baka ti dipejuraika kena 26hb September 2009 suba.
Bisi mayuh rekod bekaul enggau aum raban pengarah ti madahka mayuh pekara patut diperesa ba dagang kunsi nya, nyengkaum peresa ba reta PetroSaudi ti dulu ari nya patut ditembuka.
Nya alai jaku setuju nya udah diulihka dikena raban pengurus neruska jurai, tang sida patut nurutka atur ti ditetapka raban pengarah, nyengkaum ngemendarka sebengkah peresa atas 1MDB.
Simpul ti udah dijapai nya dagang kunsi nya ditanggam dua hari udah 28hb September enda ditemu bala pengarah 1MDB empu, ti endang nyadika raban meri pemutus penemu baka ni jurai patut diteruska, udah enda diguna!
Sida nadai diberi kuasa atas dagang kunsi nya ti nerangka sida udah ringat baka ti ditunjukka dalam minit aum bala pengarah kena 3hb Oktober, ti dikereja seminggu udah nya, lebuh bala pengarah nadai nyadang diri betemu baru sebedau 9hb Oktober.
Pengirau ati nya dipansutka maya aum 3hb Oktober laban US$700 juta ari duit bebilion-bilion dollar udah diperanakka nya dipasukka ngagai akaun ti nadai diberi kuasa ari luar dagang kunsi, ti dikemataka bakih Menteri Besai, Jho Low.
Raban pengarah udah minta diterangka pasal duit ti udah dipindahka endur bukai nya ulih diambi pulai, laban sida nadai kala nanggam sempekat nya dulu ari nya!
Kaul Menteri Besai dalam dagang kunsi tu tetap dituliska nyadika rekod. Najib Razak semina nyadika pengerusi ke raban penyanding penemu ke 1MDB, tang ke bendar iya mega nyadika pemegai syer tunggal enggau siku orang ti bisi kuasa mutuska penemu ba pengawa beranakka puku dagang.
Ke bendar iya Menteri Besai Malaysia Najib nya udah besedia mansutka jaku gerah madahka dagang kunsi nya udah ditembuka, tang ukai pasal pemansang pengawa dagang kunsi nya, udah enda ngemuaska ati raban pengarah kena 26hb September.
Dulu ari nya, kena 18hb September, Pengarah Eksekutif 1MDB, Casey Tan, bisi madahka ngagai raban pengarah ti endur PetroSaudi nya diempu Raja Abdullah ari menua Arab Saudi. Tang diatu Casey Tan udah ngelarika diri ari Malaysia lalu dianti Bank Negara Malaysia endur iya nyaut sekeda jaku tanya.
Tang iya ke bendar nya PetroSaudi nya semina sebuah kompeni ti mit lalu bepuku mimit lalu semina ngembuan sekeda dagang ti regas, diempu Tarek Obaid enggau Putera Turki bin Abdullah.
Tang minit aum 28hb September nya terang nunjukka dagang kunsi nya udah bula nusui pasal PetroSaudi nya bedagang ngarika Perintah Arab Saudi.
Pneyaru nya udah ngujungka raban pengarah udah ngurangka sekeda atur dikena nyaga kompeni laban kenu ku sida dagang nya dipejalaika entara dua bengkah perintah, lalu enda kena bungkur undang-undang selama.
Minit nya ngerekod jurai bala pengarah udah diberi penerang ti bula madahka PetroSaudi mai lebih 20 buah kompeni ti bepayung ba dagang kunsi nya.
Ke bendar iya PetroSaudi semina bisi dagang ti mit di menua Argentina, ngena duit tunai ti diinjau lalu udah muka sekeda kompeni kerang di menua bukai dalam beberapa hari aja.
Dalam penyaru penemu nya 20 buah kompeni ti bepayung ari baruh dagang kunsi nya, dia bala pengarah udah bulih pemutus penemu ti endur sida begunaka repot ti silik pasal pemujur semua kompeni nya sebedau sida ulih mutuska runding sida.
Bala pengarah nadai beniat deka nanggam sempekat nya lalu ngemendarka puku dagang ti manggai US$1 billion dua hari udah nya.
Sida dekaka atur meresa ti silik ba kompeni nya.
Raban pengarah udah minta, ba aum 26hb September ti endur peresa patut diatur ba PetroSaudi, dikereja siku pakar ti dipaduka 1MDB (munyi ti direkodka dalam minit, nyadika Kompeni).
Kelimpah ari nya PetroSaudi udah ngupah siku pemeresa, Ed Morse, ti endang bakih ke bala pengarah sida empu, Tarek Obaid enggau Patrick Mahony, dikena ngeluarka repot iya dalam dua hari aja, nitihka penerang ari PetroSaudi empu.
Buah runding bala pengarah ti dipesetujuka kena 26hb September udah enda dikibuhka bala orang ti endang dekaka US$700 juta dibayar masuk ngagai akaun kompeni Good Star di Switzerland enggi Jho Low.
Kebuah baka nya, enti sema bisi peresa diguna bala pengarah nya dipejalaika, tentu dagang kunsi nya enda dipajakka.
Sarawak Report bepuas ati ke perambu nya nyadika atur ngelimpangka duit ti dikereja bala pengarah 1MDB enda ulih nyadi nyata enti nadai sukung ari Menteri Besai ti mega nyadi Menteri Pekara Wang empu.
Sekali ke bala orang baka Shahrol Halmi enggau Casey Tan berani enda ngasika bala bos sida dalam raban pengarah, enda ningaka sanding penemu Jho Low, ti endang ditemu chakah dala dagang kunsi nya?
Sarawak Report bepuas ati enggau pemayuh penerang ti chukup sereta silik bekaul enggau dagang kunsi ti betuju dikena ngelenyauka duit menua lalu dipasukka ngagai akaun Jho Low lalu ari nya dipindah-pindahka ngagai endur bukai ti semina ulih diterangka Bank Pusat di Switzerland, Singapura enggau menua bukai.