Kompeni ti dikaul 1MDB dalam dagang dalam PetroSaudi ba taun 2012 diatu benung dipansik kediri raban penerit undang-undang menua Australia.
Pengurang ba pansik ti menyana di menua Malaysia empu dalam dagang ti nyelai tu, atur nganchurka puku dagang kompeni Avestra ti dipejalaika Komisyen Sekuriti & Dagang Australia (ASIC) udah meri sekeda penerang ti besai guna.
Wang turu ti bepenyampau satu billion dollar, ti udah disimpan enggau chara belalai di Pulau Cayman, ti dipadahka 1MDB bisi ngundan ‘penguntung’ ari dagang kunsi enggau PetroSaudi.
Siku penulis berita pekara dagang ari Malaysia ti bepalan di Sydney Australia, Ganesh Sahatjevan, udah mujur nyerungkai pansik raban ari ASIC dalam dua tiga hari tu lalu iya udah mega mujur mantaika penerang ti madahka raban penerit undang-undang Australia udah ngaga simpul penemu ti madahka kompeni Avestra nadai ngembuan sebarang duit datai ke bepuluh juta – jauh agi ari US$2.3 billion ti diambu 1MDB nyadika puku dagang sida.
Tu nambahka agi penerang madahka Wang Turu Bridge Global Absolute Return SPC, ti dipejalaika Avestra, ke bendar iya nadai nyengala nyadika sebuah entiti dagang ti beregista di Cayman lebuh 1MDB ngumbai diri bisi ngemasukka duit ti kelalu mayuh ke dalam kompeni nya.
Suratberita pengawa dagang Wall Street Journal udah ngaga simpul penemu sida ba renggat utai ti nyadi nya dalam artikel sida ti pengambis baru “Hunt For Billions Invested in 1MDB Merujuk Kepada Australia”.
Sekeda bala orang ti benung nitihka pengerembai penanggul 1MDB deka nemu, nadai sebarang duit puku dagang dikena mayar Aabar Investments. Penyampau nya US$1.03 billion munyi ti disebut Arul Kanda nyadika udah kala dipegai dalam duit tunai ba akaun bank Brazen Sky dalam bank BSI Singapura.
Sarawak Report lama udah mansutka penerang ti madahka nadai sebarang mata duit disimpan, ti udah nya diaku Arul munyi nya. Tu mih kebuah raban Deutsche Bank udah matak diri ari dagang kunsi nya ba bulan May tu tadi.
Baka ti ditunjukka Wall Street Journal, pengawa dagang enggau Aabar ti madahka Najib ti nyadi Menteri Besai udah mujur ngulihka duit injau ti nyadika tanggungpengawa perintah Malaysia begigaka duit dikena mayar Aabar, taja pan Najib ngeluluka diri madahka bala pemayar chukai enda dipejal nebus utang 1MDB.
Raban orang dagang di dunya tu nemu pasal ‘duit tunai’ ti udah nya nyadi ‘wang turu’, ti udah nya nyadi ‘unit ti mit-mit aja’ ti dikumbai bisi dalam Wang Turu Avestra/Bridge Global Cayman lalu diatu dalam bank BSI Singapura nya semina ensera aja.
Semua duit ti udah dipasukka dalam dagang kunsi PetroSaudi ari 1MDB udah lama dicuri sebedau sida nutup dagang sida ba taun 2012 lalu duit puku dagang dalam PetroSaudi, kenu ku sida, udah dijual enggau chara ti nyelai ngagai Bridge Global di Pulau Cayman ba rega US$2.32 billion.
Bala orang ti bisi dalam Bridge Globan nya semina nyukung 1MDB enggau chara besetuju ngelamun pengelenyau duit ti mayuh nya – sebengkah sukung ti udah diterangka sida enggau enda belalai.
Bala pemeresa kira-kira wang dalam kompeni KPMG enggai ningaka ensera ari pulau Cayman lalu bala pemeresa kira-kira dalam Deloittes semina nutup mata sida ba utai ti udah nyadi ti enda dikemataka sida, nyadika chara sida malas budi jamin ari bakih baru Menteri Besai Najib ari kompeni Aabar.
Nama kebuah Najib enggau Perintah Malaysia setuju meri jamin ke duit injau Aabar bulan May nyin kemari, kelimpah ari ti mansutka duit tunai ti udah terubah iya dijamin Aabar ngagai Deloites?
Laban penyampau semua duit injau nya mayuh bendar lalu tau ngasuh malu.
Baka ti ditunjukka Sahathevan, pansik ba penerang ti betatak ti dipadahka dalam regista Cayman ti nyelai nya nunjukka wang turu ti dikumbai dituntung pengerugi ba tengan taun 2012 nya, endang nadai nyengala entiti ti beregista nyentuk ke bulan November 2013!
Baka ni penerang ti pemadu manah ti madahka endang nadai duit tunai tauka nyawa ‘unit’ dalam dagang nya – semina pemula ti kelalu banggar ti pansut ari 1MDB!
