Mohd Najib Abdul Razak ngaku undang-undang soldadu bechura drakonia, ti diansak iya nengah aum parlimen dalam sehari-dua tu agi, bepelasarka undang-undang ti ditunda ari UK dikena nagang serang bom ba orang mayuh.

Utai tu enda bendar serta enda amat.

Kuasa liberal engka ulih dikena di menua Britain ba sapa-sapa orang nyadika atur bejaga-jaga ari serang ba orang mayuh, tang enda ulih dikena ba orang mayuh di menua Malaysia.

Undang penagang serang penyelawai di UK dikena ba peranak menua bukai ti disadang ngelanggur atur nyerang enggau chara ngerambang ba orang mayuh ti enda bedosa – sebengkah serang ti nadai kala dikereja orang di menua Malaysia sebedau tu.

Bida iya, undang-undang Najib nya terang bendar deka dikena iya ba bala orang ti mantah pengawa enggau atur politik iya dalam menua iya empu – rayat Malaysia empu.

Undang-undang Britain ngemendarka perintah nangkap lalu enda ibuh dipechara ba sebarang orang peranak ari menua bukai ti dipelabaka bisi merambu nyerang orang mayuh, tang undang-undang Malaysia mega ngemendarka atur nangkap enggau enda ibuh dipecharaka ba sebarang rayat ti disadang Menteri Besai ngeruga penuduk iya. Kenu ku iya, iya deka nangkap sapa-sapa ari rayat iya ti ditemu iya ngachau ekonomi menua, ambi ke chunto … nyengkau sapa ti mantah atur pengawa iya ba pekara nya.

Lisin dikena nyadi tuai perintah bediktator ti diansak Najib nengah parlimen ti bekelulu nya dalam kandang tiga hari nya ngembuan tuju ti jauh agi timpai. Nya ngelai ti endur bala wakil rayat ti udah dipilih rayat sida empu nya udah ngelepaska kuasa iya besetujuka undang-undang baru Najib nya.

Lalu bala kaban parlimen iya udah ngemendarka undang-undang baru Najib nya dikena enggau nadai dipejuraika enggau lenak.

Iya udah ngeluluka diri ti endur semua kuasa nya semina semina ‘agih undang-undang dikena ngelampat sebarang pengachau ti nyadi’ – tang nadai utai ulih nagang iya nempa peragam ati iya laban iya diatu udah sekut runding enggau chara dikena iya bepaut ba kuasa.

Ngelama tu pengachau dalam menua nadai kala udah nyadi di Malaysia, tang iya deka ngulihka mayuh agi kuasa enti dibandingka enggau kuasa dikena Winston Churchill lebuh soldadu Nazi mansang ngagai tebing tasik Britain dulu menya.

Lebuh Winston Churchill numbuhka Kabinet Perang iya dikena ngelaban soldadu Nazi ti mansang ke Britain, iya udah ngaul raban parti penyakal dalam kabinet nya dikena iya masa sereta ngetanka prinsip demokrasi lalu mai semua rayat iya begempung napi penusah ari serang munsuh nya.

Tang Kabinet Perang ti ditumbuhka Najib nya semina ngembuan bala kroni politik iya nyengkaum siku tuai polis menua ti ukai dipilih rayat, ti udah latah lalu beserangka sapa-sapa orang ti mantaika pengasai irau ati pasal penyalah makai suap ti dikereja orang ti ba penuduk ti tinggi di menua Malaysia nya.

Ngena undang-undang baru nya iya ngemendarka bala kroni ngena kuasa sida peneka ati sida, laban dikena sida nagang pengachau enggau keruga pengawa penyelawai. Iya ke bendar, Najib meri kuasa penuh ngagai bala menteri kroni iya pengebal ari kena dawa undang-undang, enti sema sida bisi penyaru kereja lebuh ngelaban pengawa penyelawai.

‘Penyaru’ nya nyengkaum bekerebukka wang turu bansa lalu mindahka duit peneka ati ngagai akaun bank sida empu, ti udah nya dikena nyungkak pekara pengelikun sereta bejaga-jaga ari serang penyelawai, orang ti berani mantah, raban penerit undang-undang menua enggau bala pemesai siku-siku ti ‘deka numbangka Menteri Besai’ Malaysia.

Tu sebengkah ari chara Najib ngulihka kuasa penuh tuai dictator ba atas menua enggau rayat iya empu, ti kenu ku iya dikena nyaga pengelikun menua ari keruga penyelawai. Iya ngereja nya laban pengarap rayat ba iya udah majak lenyau-selenyau dikena iya terus merintah, lalu iya mega bisi penanggul ba undang-undang menua.

Ngansak undang-undang nya diterima nya nadai bekaul enggau nyaga pengelikun rayat Malaysia ari keruga orang penyelawai, tang ke bendar iya dikena ngelindung Najib Razak ari empas salah pengawa makai suap pemadu besai.

Tang diatu penyalah makai suap udah jauh bendar tetanam dalam parti iya empu, UMNO.
Bala penyukung iya dalam parti UMNO diatu semina ngarapka berapa pemayuh upah ulih diberi Najib ngagai sida ari pengawa dikereja sida nitihka asuh iya. Asal mih numbas dikena sida bekemas lalu ninggalka menua Malaysia lalu ngenduh di menua tasik (baka London enggau New York).

Enggau undang-undang dikena ngelaban pengawa kasar enggau penyelawai tu Najib udah enggau chara ofisyel ngapuska atur perintah demokrasi, udah bekau iya mangku pengawa nya ngelama tu, ti endur iya kala besumpah mai ubah ba menua.

Iya ngereja tu laban iya udah nemu undi nunjukka iya ti mangku pengawa Menteri Besai Malaysia pemadu enda dikerinduka rayat – semina 16% aja dikerinduka.

Nadai siku orang deka arap lebuh Najib enggau kroni iya madahka agih undang-undang tu enda disalahkena kelimpah ari dikena ngelaban pengawa penyelawai enggau pengasar.

Najib diatu udah nemu semua tindak iya udah puntan lalu iya nadai bejuluk ati deka ngatur pengawa bepilihbesai agi.

Siti chara ti pemadu manah ke iya diatu nya iya tau madahka serang soldadu penyelawai deka nyadi sebarang maya dikena iya madamka semua pengawa bepilihbesai nyentuk ke notis ti baru dikeluarka jemah ila.

Dalam kandang minggu tu parlimen deka besetujuka kuasa penuh ngagai Najib lalu meri iya kebal dikena iya majak nekanka rayat iya empu. Bisi siku soldadu penyelawai ti pemadu jai di menua Malaysia ti balat ngeruga pengidup rayat, iya nya iya empu.

Ba sekeda orang UMNO ti ngerunding diri empu aja, Sarawak Report enggau sida ti bukai deka nganti maya diri mansutka ke but sida ari London nyentuk ke New York. Ningkilka tikas peranak menua ari sapa-sapa nya ukai pengawa ti mudah dikereja.