Lebuh apai tiri iya bulih kuasa diktator ba ujung minggu tu tadi, dikena iya majak duduk mangku pengawa iya ngambika iya ulih ngelaban semua macham jaku tuduh enggau jaku bantah orang ba penyalah makai suap pemadu besai di Malaysia, Riza Aziz mega dipeda ngeluarka belanja ti mayuh lalu beperindang di sebelah-belah nengeri Hollywood.
Kompeni Riza ti benama Red Granite Pictures udah nawarka pengawa ngagai Martin Scorcese ngambika ngeluarkan filem sida ti baru, sebengkah projek beungkus beratus juta dollar ti bechura cherita lama pasal siku tuai menua Amerika, George Washington, ti bejuluk The General.
Pemeri penerang madahka pengawa nya diatur bakih Riza, Joey McFarland, ngagai Martin Scorcese ngambika ngaga filem nya, nangkan filem sida ti ke terubah ti penuh kontroversyel suba, Wolf of Wall Street.
Perambu ke sekali tu dikena ngaga pelasar ke Jho Low enggau bakih Riza, ti pelakun, Leonardo di Caprio, ti benung bebendar deka ngulihka sebuah perais Oscar.
Ke sekali tu filem nya dipeda baka ti dikena meri peluang ke di Caprio ngeluluka diri nyadi siku tuai menua cherita lama Amerika ti pemadu tebilang, George Washington.
George Washington nya siku pemun prinsip demokrasi enggau pendiau liberal Amerika
Bebida enggau nya, ba ujung minggu tu, Malaysia meda Najib ngulihka kuasa penuh iya, semina dalam timpuh tiga hari ba pengujung aum parlimen iya, ngansak undang-undang Majlis Keselamatan Negara (MKN) 2015 ti dipeda meri kuasa penuh lebih ari pemayuh kuasa diktator ngagai tuai Nazi kelia, Hitler. Bala pemerati politik udah ngaga simpul penemu sida, undang-undang MKN2015 nya udah ngapuska sistem perintah demokrasi di Malaysia.
Undang-undang nya ditetapka dalam beberapa jam sebedau aum parlimen nya ditutup lalu nadai dipejuraika agi, ngemendarka Najib ngena kuasa soldadu iya ti endur iya tau meri sebarang ketegal peneka ati iya lalu ngukum peneka ati iya. Ketegal ti diberi iya nya dikena nyekang serang penyelawai, taja pan menua Malaysia jarang tauka enda kala diserang penyelawai ngelama tu.
Bala pemerati politik di serata dunya besetuju ke penemu ti madahka Najib dipeda besak mantaika perambu undang-undang ti baru nya dikena ngelindung iya ari kena tuduh lalu didawa ke semua penyalah dikereja iya, ti tau ngujungka penuduk iya kena keruga, lebih agi penuduk bini iya, indai Riza iya nya Rosmah Mansor.
Kunsil Lawyer Malaysia udah saum penemu enggau raban pengelepas sivil ari serata dunya ti mantah pengawa ngerampas kuasa ti dikereja Najib, ti madahka undang-undang ti baru nya enda ibuh dikena lalu belaban enggau undang-undang menua Malaysia.
Undang-undang ti baru nya ngemendarka Menteri Besai bejalaika kuasa eksekutif authoritarian iya. Kuasa ti baka nya semina dikena maya menua dituntung penusah ketegal kena serang munsuh, tang enggau enda ibuh bejalaika atur darurat ba Artikel 150 Konstitusyen Persekutuan. Reti nya Menteri Besai udah ngerampas kuasa ari Yang Di-Pertuan Agong, lalu ngelanggar agih dalam Artikel 150 nya. Enggau nya undang-undang baru nya patut dipejuraika [jaku penerang ari Kunsil Lawyer Malaysia]
Tang apai tiri Riza udah melakangka semua kuasa undang-undang menua ngelama tu lalu dalam pengelama beberapa taun ngambika ngapuska semengat merdeka ti nyadika peneka sistem undang-undang di menua Malaysia. Enggau nya iya enda ibuhka jaku kutuk enggau jaku bantah ba ulah enggau pendiau iya, nyengkaum jaku bantah ari kaban UMNO parti iya empu.
Niang George Washington tentu enda lantang enti iya nemu filem pasal pengidup enggau pengawa iya nya dipelanja ngena duit ti ulih nerumpak ari menua Malaysia laban maya iya agi idup suba iya siku orang ti ngangkatka atur perintah demokrasi enggau pengelepas ke semua orang.
Patut tauka enda filem nya nusui pasal pengawa ngerumpak wang turu di Malaysia ti dikereja siku Menteri Besai Najib Razak, nengah 1MDB ti dikereja Jho Loww enggau Khadem Al-Qubaisi, ti endur belanja besai-besai sida nya udah ditemu Sarawak Report enggau media ti bukai?
Pengawa nguji nutup, nangkap, ngemba enggau ngapuska bala penyepu wisel pasal skandal ti patut nyadika bagi dalam skrip filem nya lalu Sarawak Report mega mega ati deka nuliska skrip ti baka nya.
Lalu siti da agi – sekeda asil pansik ti ngayanka baka ni duit bebillion-billion dollar ti dipindahka enggau chara belalai nengah wang turu di menua tasik enggau bank entarabansa, ti udah ngelanggar undang-undang pekara bank enggau chara mantu ngemujurka pengawa ngerumpak nya.
Nitihka penerang ari dalam Hollywood, raban polis FBI diatu benung mansik bala bakih Riza dalam Red Granite, betanyaka mayuh macham penerang bekaul enggau skandal nya – kelimah ari mansik pasal sekeeda rumah besai-besai di Beverly Hills enggi Riza enggau Khadem ti ngarika sekeda set jaku tanya pasal baka ni dua iku nembiak tatau nya tau nyadi kaya.
Penanggul Najib Razak diatu nya ba pemendar ari skandal tu udah dikusaika ngambika dipeda menua Malaysia enggau bala bakih iya di menua tasik, ti udah ngujungka pengerusak nama iya mar dibiki agi.
Pengawa ngulihka kuasa autokratik Najib ulih dipeda ari chara Najib nutup penyalah iya ba undang-undang dulu ari tu – enggau chara ngapuska semua undang-undang ti udah bisi nya.
Wan Saiful dari gerempung IDEAS udah mansutka pengasai ati ti diasaika orang mayuh di Malaysia:
“Bala orang ti ngaga undang-undang ari raban BN udah mutuska pengarap rayat sida enggau chara buta nyukung undang-undang MKN2015 ti udah ditetapka parlimen kemari, ti ngujungka menua Malaysia nuju pemetang.
“Aku irau enti iya ulih ngena undang-undang tu ngetanka kuasa iya semina ketegal ti deka mengkang bekuasa nya.
“Aku ngutuk atur autokratik ti dikereja perintah tu,” ku Wan Saiful, ngansak undang-undang nya dibatak pulai baru. [Malaysia Insider]
Industri filem Hollywood enggau bala pengeluar sida patut berunding panjai, sebedau sida belabuh ngagai filem pasal George Washington, siku tuai menua Amerika, ngena pun penatai duit chara ti kamah ti diulihka siku anak diktator ti korup ari menua Malaysia.
Nya ulai siti chara dikena meri basa ngagai George Washington, tauka chara dikena meresi nama pelakun sida ti udah kamah laban penyalah makai suap sekeda orang ti udah ditemu rangka sereta bekerugaka wang turu menua diri empu.