Rayat Malaysia Ditangkan Pasal ‘Penusui Cherita Bula’ Clare Rewcastle-Brown
Huan [Sapit Presiden Parti Cinta Malaysia (PSM)] madahka Brown dalam beberapa taun tu “ngerembaika cherita bula” lalu suah “enda besepenemu” dalam penerang-penerang iya empu, ti ngujungka 1MDB, Kepala Menteri Sarawak ti dulu Suba Abdul Taib Mahmud enggau pengawa dagang Kelapa Sawit Malaysia udah nyadi “dengah iya”.
Siti chunto penerang Bron ti enda besenutuk, munyi ku Huan nya, iya udah bebula penerang dalam taun 2011, munyi ti ditusui Global News ari menua Kanada, madahka iya nerima sebarang bantu belanja ari orang politik Malaysia lalu orang ti meri bantu nya ari bala “orang Eropa ti ukai bemotif politik”.
“Dua taun udah nya (2013), Polisi Luar Menua madahka “duit belanja ke program radio iya, munyi ku Brown nya, datai ari siku pemeri Eropa ti deka ke nama iya dilalaika’; ari bala peninga ti ngirumka duit bantu sida nengah laman web iya.
“Lalu dua taun udah nya mega, Brown ngubah lagu iya.
“Suratberita The Sun Daily nusui, Clare madahka Radio Free Sarawak (RFS) dipelanja sebengkah wang turu ti benama di Eropa ti numpuka ngagai isu kampung tropika. Kami mega nerima … pemeri ti mimit-mimit ari orang siku-siku … nengah laman pemeri ba laman web kami’,” ku Huan nuliska ba sebuah blog sehari tu.
Huan udah nya nuduh ti endur ba reality, perintah-perintah di menua Eropa udah melanja mayuh bengkah gerempung ti ukai perintah enggau “raban orang ti rinduka rampa menua” nyengkaum gerempung The Forest Trust, World Wildlife Foundation (WWF) enggau Greenpeace.
“Semua raban orang enggau gerempung tu udah nguji ngerachun runding orang mayuh lalu ngelaban bala orang ti bekebun sawit enggau industri kayu batang di Malaysia. Iya ti jai agi nya, sida ngumbai diri nyadi penyukung industri nya ari belakang, sida bekereja belalai ba pengawa sida ngurangka asil ketau.”
… “iya orang ti bula lalu mudah bendar dilampat enti bisi orang bukai deka ngerintaika penerang-penerang iya ti enda kala besenutuk nya.
“Dalam pua endur iya belalai ti dikena iya ngumbai diri nyukung pengawa nyaga rampa menua nya, Clare Brown ngerembaika jaku bula iya dikena ngutuk sapa-sapa ti berani mantah penemu iya.
“Kereban Komunikasyen iya nya laman blog jai iya empu, Sarawak Report enggau media sosial iya ti penuh enggau penemu jai iya, jauh ari kempen endur iya madahka diri bekereja pulai ke pemanah mensia.”
Nama kebuah orang baka Huan ti deka bediri lalu rindu dipeda baka orang ti beli?
Dua taun ke udah tu kami kala madahka kami melanja stesyen radio kami tu, terima kasih ke siku orang Eropa ti gerah jari ti enggau bebalut enggau sebarang orang ti beli, nya kebuah orang pemeri nya mengkang deka ngelalaika identiti iya empu.
Orang pemeri nya udah numbuhka sebuah wang turu, lalu sebagi ari pejalai wang turu nya ditujuka ngagai pengawa ngemataka rampa menua enggau dikena ngemunaska penyalah makai suap, lalu meri sukung ngagai pejalai RFS.
Diatu kami nambahka jaku kami, ti endur kami bulih penguntung ari pemeri ti mimit-mimit ari bala orang ti ngembuan penyiru enggau penyinu. Baka ni ku kami tu tau nyadi penusui pemula?
Jaku tuduh Huan nya enda bendar lalu nadai besukung, madahka kami tu dipelanja perintah-perintah di Eropah ti beniat deka ngelemika dagang sawit di Malaysia!
Nya iya! Huan patut berasai gaga laban iya siku orang ti bula, seraya ke iya mega nuduh orang bukai nya bula.
Ke bendar iya, belanja kami ti mimit-mimit tu ukai datai ari pengawa enchuri sereta ngerebuk wang turu menua tauka ari pengawa ti salah ba undang-undang. Sapa-sapa orang siku-siku endang bisi kuasa rindu lalu nyukung projek kami tu.
Enti sema bisi pengawa kami nya salah udah kala dikereja kami, kami endang nganti raban orang pengachau baka Huan nya nyerang kami nengah kot.
Orang mayuh patut bejimat enggau sapa-sapa orang ti deka ‘ngenemuka diri’ (ari raban orang ti endang enda nemu nyepil enggau betul)!