Jaku-jaku penerang ke diatu ari bala orang dagang dalam OM Holdings udah ngayanka pengurang ba pengirau ati Kepala Menteri Sarawak ke penanggul rampa menua ti datai ari kilang-kilang di menua nya.
OM Holdings ti bisi opis besai di Bermuda ti dikangauka Taib Mahmud ngambika beranakka puku ba pengawa ngeluarka besi manganese di Simalajau, ti disadang deka meri 20% penguntung ngagai kompeni sida sebilik, CMS dalam pengawa dagang kunsi nya.
Jurai penemu ti udu korup nya nyengkaum pengawa ngaga kilang manganese ti disadang deka ngamahka rampa menua ti lalu deka nuntung pengerai raban orang bansa asal enggau mega rampa menua di pelilih menua nya.
Di menua-menua bukai kilang ti ulih ngenataika pengamah rampa menua dipinta ngelanggur enggau silik lalu diperatika enggau semak pengawa sida ti begunaka belanja ti tinggi ngagai bala orang ti beempu kilang baka nya.
Tang nitihka jaku Kepala Eksekutif kompeni Boustead Singapura, Wong Fong Fui lebuh iya dipinta mansutka penemu iya bekaul enggau nama kebuah sida mutuska runding deka napi risiko lalu beranakka puku dalam kilang OM Holdings, madahka menua Sarawak nadai penanggul rampa menua lalu bala rakyat Sarawak beguna bendar ke kilang ti baka nya dikena nyukung tekat hidro elektrik Bakun. Bala orang dagang, ku iya nambah, bulih pengelepas ti manah ba pekara chukai enggau bekal kuasa elektrik ti murah bendar.
Empas-empas ngagai raban orang bansa asal ti diau semak endur kilang nya enggau mega ngagai kampung bungas ti semak nya udu ngirauka ati.
Terang bendar bala orang dagang baka Wong Fong Fui nya ngumbai tuai-tuai perintah menua Sarawak nyau udah puntan penemu dikena narit bala orang dagang beranakka puku dikena nyukung projek Bakun enggau tekat-tekat hidro ti bukai, ti udah diperambu lalu standard ba ikas pengamah rampa menua nya tau enda dikibuhka.
Lebuh maya Taib Mahmud bejalaika langgur pengawa kilang ti besai-besai iya, mesej iya terang bendar madahka Sarawak nya ukai menua ti keji ke pengamah rampa menua.
Agi mega, tiap sen duit nya dibayar ngagai Taib Mahmud enggau pengawa dagang iya ti deka dikena nambahka pengeraja iya empu. OM Holdings mega udah beranakka puku bejuta-juta ringgit enggau ngati ke diri ba anak kompeni CMS, iya nya KKB Builders Sdn Bhd dikena ngaga kilang nya.
Pekara ti ngenusahka ati iya nya pengelantang enggau pengerai raban orang bansa asal dalam proses tu udah enda dikibuhka.
Diatu udah bisi sekeda repot ti madahka penanggul ba pengerai udah belabuh nuntung bala orang bansa asal ti diau semak enggau kilang Pressmetal di menua Mukah nya.
Nitih ke penerang ari bala temuai ti ngelawa endur nya, pelilih menua ti ngelingi kilang nya udah ngayanka bekau pengamah rampa menua ba utai tumbuh, tanah enggau sungai. Rachun ti dikena ngeluarka aluminum nya bisa bendar ba semua utai idup semak nya dia.
Pekara ti ngasuh ati irau nya bala orang bansa asal ti dituntung penanggul udah enda diambi bekereja dalam kilang lalu datai ke diatu sida nadai bulih sebarang penguntung ari pengawa kilang ti semak pendiau sida.
Betipak enggau nya, Taib Mahmud udah ngeluarka sekeda penerang ti madahka iya ngelanggur pemasuk bepuluh ribu iku pengereja pengawa ari menua bukai baka India awakka ngisi pengawa puang ba kilang-kilang di Mukah nya.
Bedau tentu lama ti udah Taib Mahmud udah nemuai ngagai dua buah universiti Islam di menua Indai laban ngumbuk bala nembiak ti benung belajar dia bekereja di kilang-kilang di Mukah enggau Simalajau nya. Pengawa nya udah melakangka bala rakyat Sarawak empu ti dikumbai iya sebengkah pemuntan iya empu ketegal enda meri pelajar enggau pengelandik ti nengkeman dikena ngisi pengawa ba kilang dalam langgur pengawa ‘pemansang’ iya sekumbang iya merintah 30 taun tu.
Ari penerang ti dipansutka pasal polisi-polisi BN ti mai tama bala imigran ke menua Sabah dikena ngelemika undi rakyat di menua nya empu, mensia mayuh diatu patut betanya nama kebuah Taib Mahmud milih universiti-universiti ari India nya.
Nyerumba nya, potensyel dikena nambahka pengaya sida Taib Mahmud sebilik enggau bala kroni iya majak dipejalaika ari siti penegap ngagai penegap ti nangkanka nya. KKB Engineering udah ditagaka ngulihka kontrak dikena ngaga sebengkah penyangkai kapal dikena nyukung pengawa ekspot manganese ari kilang OM Holdings. Peluang ti bansa nya nadai besekat laban Taib Mahmud endang siku orang ti nguasa pengawa ngeluarka lisin di bansa nya.
Lalu terang bendar mega Kepala Menteri nya gaga bendar ati ngena kuasa politik iya di Malaysia mai bala orang dagang dalam projek-projek ti enda temu-tuku (sekali ke tau nguntung tauka ngerugi). Lebuh ti ditanya, Wong Fong Fui, madahka pengawa bedagangka manganese nya enda dijamin, laban rega besi nya selalu kusut, tang iya andal sereta arap bendar ba dagang setengah billion dollar nya deka disukung puku kompeni ti mimit.
Pengandal ba dagang nya disukung bank-bank di menua Malaysia ti sanggup bejudika $300 juta. Wang turu nya disukung sebengkah consortium ti bepelasarka RHB Bank Bhd; Malayan Banking Bhd; Standard Chartered Malaysia Bank Bhd.
