Nerumpak kita terang-terang? Kemeli Chong ba bala orang bansa asal ti suah kena tipu.

Lawyer ti tebilang menua Sarawak, Alvin Chong, udah nerangka enggau silik pasal sekeda petua iya dikena nyeliahka chukai enggau undang-undang ba mua kamera ti dilalaika bedau lama tu udah.

Iya ngumbai diri benung meri sanding penemu iya ngagai siku pelanggan iya ti datai ari menua tasik, tang ke bendar iya orang nya siku pengarang berita ti datai benung mansik pengamat cherita bekaul enggau penyalah makai suap ti dipejalaika dalam perintah Sarawak baka ti ngelama tu.
Pengawa Chong nya dikumbai udah chakah bendar dipejalaika di menua Sarawak, lebih agi ngena bala “nomini” dikena nutup identiti bendar bala orang ti bempu kompeni-kompeni enggau konsesyen-konsesyen ti diterima sida ari Kepala Menteri Sarawak Abdul Taib Mahmud.

Lawyer ti kaya nya madahka iya udah suah begigaka bala nomini ari raban orang bansa asal di menua pesisir ti seranta lalu enda mudah disidi orang ti landik ba undang-undang. Raban sida ti seranta nya mudah bendar ditipu lalu mar bendar digiga tauka dikelala bala pemansik.

Bala pelanggan Chong ke bukai nya nyengkaum kompeni kontrak baka Hock Seng Lee

Udah bekau iya ngaku pasal skandal iya ti nulung bala pelanggan iya nyeliahka chukai enggau undang-undang, Chong ti nyadi siku lawyer ti beprofil tinggi di Sarawak nya patut nyadika sabjek ti enda tau enda dipansik. Kebuah pia laban iya suah agi nyukung pengawa bala orang ti tebilang di menua Sarawak.

Raban orang ti tebilang nya nyengkaum Opis Tanah enggau Survei, ti betuaika Taib Mahmud; Kompeni Naim Candera, Sarawak Plantations enggau Dayang Enterprise Holdings, semua bekaul enggau Taib Mahmud nengah petunggal iya ti mega nyadika proksi iya, Abdul Hamed Sepawi; enggau Sarawak Cable, ti diempu anak lelaki iya, Mahmud Abu Bekir ti udah nerima kontrak ti besai ari program kuasa elektrik hidro SCORE.

Nambahka nya kami deka meri klu ngagai raban pemasik ari opis SPRM (ti benung beserungkaika opis-opis Alvin Chong) bekaul enggau sebengkah pelanggan iya, Hock Seng Lee (HSL).

Kompeni pengawa kontrak ti besai nya mega dikaitka enggau perintah Taib Mahmud nyadika penerima mayuh bengkah kontrak awam, sekali ke chara terus tauka nengah kompeni-kompeni enggi Taib Mahmud sebilik.
Ba ujung taun 2011, HSL udah enggau gaga ati madahka kontrak beungkus RM2billion ari kontrak awam lalu penyanding penemu undang-undang sida nya Alvin Chong.

Kaul enggau Taib Mahmud

Enggau jaku ari Chong empu, raban SPRM patut mansik beberapa iku orang ti bukai tauka kompeni ti nyelai-nyelai bekaul enggau kontrak-kontrak awam HSL dikena nentuka sekali ke sida nya bala nomini ti benung digiga.

 

 

 

 

 

 

 

 

Enti baka nya, sapa meh di belakang bala nomini enggau nama kompeni-kompeni ti enda kala didinga nama ngelama tu ti udah ngengkahka sida empu ba entara perintah enggau kontrak-kontrak berega tinggi ngagai HSL, dikena sida ngulihka untung bejuta-juta ringgit?

Dulu ari tu sekeda ari kompeni-kompeni peentara nya kala dibantaika Sarawak Report nyadika kompeni-kompeni ti enggi sida Taib sebilik. Ambi ke banding, projek ngaga sistem pemuai ai kamah di Kuching.

Ba asal iya projek bejuta-juta ringgit nya udah diberi ngagai sebengkah kompeni ti benama Kumpulan Construction ti dipejalaika Raziah Mahmud, menyadi indu Taib, laki Raziah iya nya Robert Geneid enggau siku agi menyadi iya Zaleha Mahmud.

Penerang ari dalam bisi madahka kompeni Kumpulan Construction “endang nadai kala ngembuan sebuah kerita mangkuk”, nya alai enda ngalitka ati enti Raziah udah nyerahka kontrak nya ngagai HSL ti enggau chara pejal besetuju ke chabut rega kontrak nya RM78juta ari semua ungkus nya disimpan.

Kami ulih mantaika chura pengawa ti suah dikereja ba kontrak-kontrak ti bukai ti bekaul enggau kompeni-kompeni enggi Raziah Mahmud. Ambi ke banding, dalam taun 2011 rambau pengawa bepilihbesai sebengkah kompeni ti benama KP Mukah Development Sdn Bhd udah belabuh bejalaika pengawa iya.

Taib ngembuan share iya empu dalam komepni- ti nerima kontrak-kontrak ari perintah menua

Bala pengarah dalam kompeni KP Mukah Development nya Raziah Mahmud, laki iya Robert Geneid, enggau anak dulu iya, Ewan Abas. Lalu pemegai share 100% dia iya nya sebuah ari kompeni sida sebilik, Kumpulan Parabena.

Kumpulan Parabena udah nerima mayuh kontrak ti besai-besai ngelama tu lalu orang ti megai share pemadu mayuh dia iya nya menyadi Raziah, Kepala Menteri Sarawak, Abdul Taib Mahmud empu!
KP Mukah Development udah diberi sebuah konsesyen ti besai dikena ngaga sebuah kolej teknologi di Mukah, lalu udah nya diberi sida ngagai HSL ba rega semina RM291juta aja. Utai ti deka ditemu kami ditu: Nama kebuah kontrak nya enda diberi terus lalu ditengali HSL?
Engka lawyer Alvin Chong ulih meri kitai saut ti sengkeman kini?
Bala nomini

Kami mai perati bala poemacha pulai ngagai pekara pasal beberapa buah kompeni ti nyelai-nyelai ti suah nyerahka kontrak-kontrak sida ngagai HSL, lalu sida ditemu semina dipejalaika raban nomini aja.

Enggau chara ti ngengkahka bala nomini baka ti diasuh Alvin Chong, Sarawak Report minta HSL mantaika identiti bala orang ti nyadi pengarah ke kompeni-kompeni ti nerima kontrak-kontrak besai-besai enggau chara ngena sanding penemu undang-undang ari lawyer nya.

Kompeni-kompeni ti suah bulih kontrak besai-besai ari perintah menua ti manggai bejuta-juta ringgit tang udah nya nyerahka kontrak-kontrak sida ngagai HSL nya nyengkaum Dwimula Sdn Bhd, Pembinaan Nomisual Sdn Bhd, PN Construction Sdn Bhd enggau Matrik Bestari Sdn Bhd.

Sapa meh ti bisi di belakang semua kompeni nya lalu baka ni ikas pengelandik sida ngereja pengawa nyentuk ke sida nembuka kontrak nya?

Kaul entara kompeni-kompeni Pembinaan Nomisual, Dwimula Sdn Bhd, Matrik Bestari enggau Raziah enggau Kumpulan Parabena enggi Taib!

Kami ulih mantaika penerang-penerang ti ngalitka ati. Pembinaan Nomisual, ti nadai ditemu kala bejalaika projek begagaka utai, ditemu suah mujur nerima kontrak-kontrak besai ari perintah menua Sarawak.

Laman web enggi Lembaga Pembangunan Industri Pembinaan (CIDB) bisi ngayanka baka ni kompeni nya ti nerimakontrak awam beungkus bejuta-juta ringgit nyengkaum sebuah kontrak ti beungkus RM131.5juta dikena ngaga 10,000 unit rumah di menua Mukah.

Tang jaku penerang ari HSL bisi madahka kontrak kereja nya diterima sida 3 bulan udah nya enggau rega ti udah dikurangka nyadi RM125,745,992.

Pekara ti baka tu ngujungka kitai betanya-tanya nama utai ti udah dikereja kompeni Pembinaan Nomisual ba RM5,754,078 ti lenyau enda temu penunga nya?

Pemeri penerang ari dalam bisi madahka Sarawak Report ti nyebut kontrak asal nya udah diberika ngagai Kumpulan Parabena Sdn Bhd enggi Raziah enggau menyadi iya Taib lalu mega bala sida sebilik, tang tindak nya udah dikumbai kelalu tampak.

Nya alai kontrak nya lalu diberi ngagai Pembinaan Nomisual sebedau iya digaga nyadika “sab-kontrak” ngagai HSL ba ungkus ti mimit agi.

Enggau jaku pengaku ari Alvin Chong ti madahka diri suah ngereja pengawa baka nya, mensia mayuh bisi kuasa deka nemu enggau silik kini ke penunga duit awam nya dipelanja.
Sapa meh orang ti benama Malaysiawati Binti Tazen, ti nyadi pengarag ti berejista lalu nyadi “orang ti betanggungpengawa” dalam kompeni nya, ti udah mujur bulih penguntung ari duit awam nya? Lalu sapa meh bala pengarah ti bukai dalam kompeni nya? Sekali ke sida nya bala orang ti beli-beli baka ti ku Alvin Chong dikena iya ngelalaika identiti ke bendar bala orang ti bempu kompeni nya?

Sarawak Report udah enda mujur ngiga orang ti benama Zaleha Bin Bujang, ti disadang diau ba sebengkah tumpuk pendiau dalam sebuah rumah ti enda belumur di menua pesisir.

Tang taja pan baka nya, Malaysiawati bisi kaul enggau sebengkah agi kompeni ti nerima kontrak-kontrak besai ari menua Sarawak, lalu baka ti ngelama tu, udah nya nyerahka kontrak-kontrak nya ngagai HSL. Kompeni nya Dwimula Sdn Bhd lalu iya ngena alamat dagang iya ti sama ba Pending Point di negeri Kuching.
Dalam taun 2009 suba HSL madahka sida mujur nerima sebengkah kontrak ngaga projek nekat ai bah di nengeri Sibu ti dipelanja ngena duit awam ti beungkus RM131,151,089.00. Tang jaku gerah nya nunjukka projek nya udah diberika ngagai sida nyadika sebagi ari sebuah consortium begulai enggau Dwimula Sdn Bhd enggau mega Pembinaan Nomisual Sdn Bhd.

Kedua-dua buah kompeni nya, ti megai 15% share ari kontrak nya ukai semina ngena alamt dagang ti sama, tang bala pengarah sida mega nguan rumah endur diau ti sama.

Pengarah enggau pemegai share Dwimula nya siku orang ti benama Jamali Bin Abdullah, ti bekunsi endur diau enggau Malaysiawati Binti Tazen ari kompeni Pembinaan Nomisual. Nitihka surat-surat penerang kompeni, seduai dua iku nya diau serumah ba lumur 498 Jalan Fatingah, Kuching lalu bisi akaun Facebook enggau laman-laman sosial ti bukai, ti nunjukka seduai nya orang diri melaki bini.

Malaysiawati suah ngumbai diri empu nya semina nyadi pengurus dalam kompeni iya.

Nyangka tu meh kebuah Alvin Chong ngelalaika penerang pasal Malaysiawati ke bendar nya siku pengarah enggau orang ti megai share dalam kompeni iya nya. Pekara tu begunaka Alvin Chong meri penerang ti silik.

Tang seninjik bendar dua iku orang melaki bini nya endang salah ba undang-undang nyadika penerima dua iti lisin ti enda sebaka ari opis CIDB. Tu tau nyadika sebengkah isu ti begunaka perati ari sida HSL, SPRM enggau mega perintah ti udah salah beri kontrak awam ti besai ngagai sebengkah consortium ti nyelai dikena bejalaika projek ngaga sistem penekat pemasuk ai bah di Sibu.

Agi mayuh jaku tanya dipansutka

Enggau nya Malaysiawati udah ayan ba sebengkah agi kompeni ti bisi kaul enggau HSL ngulihka kontrak-kontrak ti besai-besai ari perintah.

Matrik Bestari nya sebengkah kompeni ti nerima 10% ari sebuah projek ti diberi ngagai HSL dikena ngaga ‘taman teknologi’ di Kota Samarahan ba ungkus RM72juta, ti sebagi ari ungkus nya dibayar ngena duit awam, lalu sebagi ke bukai nya dibayar ngena tanah. Malaysiawati nyadi pengarah ba kompeni nya begulai enggau siku orang ti enda dikelala.

Zaleha Bin Bujang mega bisi ayan nyadika siku pengarah enggau pemegai share ba sebengkah agi kompeni ti nyelai ti bisi bekaul enggau HSL enggau kontrak perintah, enggau nama PN Construction Sdn Bhd. Lalu pengarah iya nya Malaysiawati Binti Tazen.

PN Construction Sdn Bhd nya sebengkah kompeni besai laban ditemu mujur nerima kontrak terus ari perintah. Udah nya iya lalu ngelepaska kontrak nya (nyadika sub-kontrak) ngagai HSL, enggau chara enda ibuh ngaga ‘dagang kunsi’. Sub-kontrak ba HSL nya nyengkaum projek nekat ai bah di Sibu ba ungkus RM45.7juta enggau projek ngaga sebuah sekula sekondari di Senibong.

Sekali agi kitai beratika pegai share dalam kompeni ti udah dikemendarka perintah nya udah ngelanggar undang-undang. Mayuh agi kompeni-kompeni bukai ti udah disub-kontrak ngagai HSL, ngena atur pengawa ti sebaka. Pekara tu nyau majak ngasuh pengeliat ati mensia mayuh nyau nyadi tendu-setendu.

Enggau tu kami minta raban pemansik SPRM bejalaika pansik sida ba kontrak-kontrak awam ti dipejalaika HSL lalu mega mansik beberapa juta ringgit ti udah dichabut dulu ari sida ti nyadika pansik sida ba lawyer ti dikerinduka Taib, iya nya Alvin Chong.

Kami minta diterangka nama kebuah bejuta-juta ringgit kontrak-kontrak awam ti udah betukar jari entara bala orang ti enda dikelala, sepengudah beberapa juta ringgit mega lenyau pia aja?

Kami deka mantaika pasal sebengkah pekara ti endur bebillion-billion ringgit ungkus kontrak-kontrak awam ti udah diberika ngagai HSL ba menua Tanjung Manis ti benung ditebang lalu dikemansangka nyadi ‘Hab Pengeluar Pemakai Halal’ ti dipejalaika bala petunggal Taib baka ti kala dibantaika dalam filem Global Witness apin lama tu udah.

Di menua nya, MP Norah Abdul Rahman ti disadang deka ngetanka penuduk parlimen iya, mega nyadika siku Kepala Eksekutif ke seraban kompeni dalam Hab Pengeluar Pemakai Halal nya, semua nya dibantu ngena belanja ari perintah menua. Sapa bala orang ti deka bulih penguntung ari projek pemansang ba menua nya?
Kami ulih nerima pengamat ti endur ungkus beratus juta ringgit ti udah lenyau pia aja dikena ngelindung kontrak-kontrak ti pulai ngagai jari kompeni-kompeni ti dipejalaika bala nomini ke Menteri Besai Najib Razak.

Tang, enggau ulah raban SPRM ti semina ngasu bala ikan pusu ti mit-mit lalu ngelepaska bala ikan yu ti besai-besai nya, engka sida patut numpuka perati enggau pansik sida ngagai kompeni pengawa kontrak HSL?

*[kami udah salah tusui pasal siku orang ti benama Zaleha ti dikumbai kami menyadi Taib Mahmud, ti mega megai mayuh bendar share dalam kompeni-kompeni sida ti mujur nerima mayuh kontrak ari perintah, tang ukai Zaleha ke tu. Beduduk ba penyaru kami nya suba, kami udah enggau naka penyampat madamka pekara nya dalam laman blog tu ba taun 2010 suba.]