Kompeni Taib Mahmud ti kala udah dituntung pengerugi ti bepukuka share semina setengah juta ringgit diatu udah mujur bulih duit jali RM2billion ba bulan Disember taun nyin kemari ari Bank Pembangunan Malaysia Bhd (BPMB), ti dipejalaika Opis Menteri Pekara Wang ngena duit awam.
Penerang tu dipansutka ti madahka Kepala Menteri Sarawak nya bempu share dalam sebuah kompeni ti enda tentu dikelala, iya nya KP Mukah Development Sdn Bhd, ti berejista enggau aset ti manggai setengah juta ringgit aja.
Bala pengarah kompeni nya menyadi indu Taib empu iya nya Raziah Mahmud, laki iya Robert Geneid enggau anak lelaki iya, Ewan Bin Abas.
Sarawak Report diatu sekali agi napi risiko kena kutuk laban dikumbai “manchal”, lalu meri tuduh penemu pasal meri duit jali ngena duit awam nya berisiko tinggi ngagai kompeni sida Taib sebilik ti enda tegap ba pekara wang sida patut nyadika sebagi ari pansik bala pemesai ari SPRM.
Bala pemesai SPRM ti kala dikumbai Taib “manchal” sereta “enda lurus” minggu nyin kemari ketegal sida ti udah ngamatka penyalah iya ke bendar iya udah bejalaika pansik sida, lalu Taib mega ngumbai raban NGO Global Witness nya ngembuan kaul enggau raban parti penyakal.
Tang, diatu enggau pengirau ati mensia mayuh ti majak betambah laban udah mereti ke pengusut ba duit awam di Malaysia.
Nama utai KP Mukah Development Sdn Bhd nya?
Nama kompeni nya ngangkatka nama kompeni Kumpulan Parabena Sdn Bhd, ti nyadi pemegai 100% share ba dagang kunsi dalam anak kompeni tu.
Indu kompeni nya suah nyadika perengka dikena ngulihka mayuh kontrak ari perintah menua lalu kompeni nya dipejalaika Raziah lalu nyadika sebagi ari segempung kompeni-kompeni, ti endur beratus-juta ringgit duit awam udah dipasukka nengah kompeni nya.
Baka ni Raziah mujur bulih mayuh kontrak enggau konsesyen nya enda ditemu enggau terang, enti dipeda ari gaya kompeni nya ti enda chukup perengka dikena ngaga rumah tauka muka kebun dandang besai. Sida semina ngelepaska kontrak-kontrak ti ulih sida nya ngagai orang bukai ba rega ti mimit agi ari rega asal kontrak nya, lalu pengawa nya dikumbai makai suap ti berupai sereta nyengala.
Tambah mega, bala pemegai share dalam Kumpulan Parabena nya beberapa iti kompeni enggi sida Taib sebilik, nyengkaum kompeni Miri Properties. Kompeni Miri Properties nya enggi Raziah enggau laki iya lalu mega diempu sebuah agi kompeni ti benama Mesti Bersatu. Lalu siku ari orang ti sama enggau bempu Mesti Bersatu nya Taib Mahmud empu!
Engka ketegal nama iya kena lamun empat iti nama kompeni, tang Kepala Menteri Sarawak nya bisi ngembuan share dalam duit jali RM2billion ti dipelanja ngena duit awam.
KP Mukah Development Sdn Bhd nya diempu Kumpulan Parabena, ti sebagi ke besai nya diempu Miri Properties, ti mega sama diempu Mesti Bersatu ti endur Taib megai mayuh bendar share sama enggau sida sebilik.
Jaku-jaku tanya ti serius
Enggau nadai siku pan menija bank ti betanggungpengawa ti deka nyali duit ngagai sebuah kompeni ti nadai ngembuan sebarang reta dikena mayar pulai duit jali nya, pemutus penemu nyali duit nya ngagai kompeni KP Mukah Development nya sebengkah pekara ti enda ulih diterima akal mensia.
Kompeni ti kala udah dituntung pengerugi nya dipeda semina nembuan sebuah rumah opis, engka nya indu opis sida, ti di nengeri Kuching. Dalam taun 2011 kompeni nya udah berutang beribu-ribu ringgit lalu udah nerangka pengeruji sida ti udu.
Ke bendar iya kompeni nya benung bekenanas ngidupka diri lalu endang ditemu enda ulih mayar chukai ngagai menua Sarawak.
Berebak enggau nya, KP Mukah Development semina udah mansutka penerang pasal pemeri sida ngagai raban bansa. Enggau dalih ti enda temu-tuku nya iya udah nyadi sebengkah konsesyenair dikena ngaga kolej teknologi di menua Mukah, ti dipelanja ngena duit awam ari perintah besai, lalu sereta sida bulih kontrak nya sida enggau jampat-jampat ngelepaska kontrak nya ngagai kompeni Hock Seng Lee ba rega RM291juta ba bulan Julai taun nyin kemari.
Enggau nya kami deka nemu, nama kebuah Opis Menteri Pekara wang ngemendarka Bank Pembangunan meri duit jali RM311,198,700.00 lima bulan udah nya ngagai kompeni nya kena 31hb Disember taun nyin kemari?
Nitihka atur bayar ti direjista ngagai kompeni nya, penyampau nya ti mimit agi ari RM2billion, nya berapa kali lipat enti dibandingka enggau ungkus dikena ngaga kolej teknologi di Mukah ti udah diserahka sida ngagai kompeni HSL nya.
Udah bekau kena tuduh bekaul enggau iya empu, Taib ti udah enda engkeretik ngelama tu, udah angkat lalu enchabar Global Witness ngambika besaraka penemu enggau iya ba mua mayuh.
Patut tauka enda NGO Global Witness nya nerima chabar ari Taib ti mai sida besaraka penemu enggau betanya ngagai iya nama kebuah kompeni iya nginjau duit ngemayuh nya?
Gaya bejali duit ti dikemendarka ngagai orang politik sebilik di menua Sarawak
Bejali duit ngena duit awam RM1.9juta nya nyereminka duit jali bepenyampau RM800juta ti dikemendarka ngagai sebuah agi kompeni enggi Raziah Mahmud, iya nya kompeni Kumpulan Construction, ti kala dibantaika kami beberapa bulan dulu ari tu.
Tentu enda pansut sebarang penanggul ba bank ti sanggup nyali duit awam ti mayuh bendar nya enggau mega duit bala orang ti bisi beranakka puku dalam bank nya enggau nadai sebarang tuju ti nyengala ngagai kompeni sida Taib sebilik beduduk ba sekuriti ti enda temu-tuku nya?
Enggau nadai sebarang penampak, mensia mayuh udah ditejuka ngaga mayuh macham peragam. Sekali ke Taib tauka bala bakih politik iya deka nyerahka konsesyen ti enda temu-tuku nya ngagai kompeni sida empu?
Enti saut nya ya, nama kebuah pekara nya enda diterangka lalu diperesa dulu dikena nentuka endang bisi penanggul bechanggah ba pengawa enggau penuduk?
Terang bendar duit jali enggi rakyat Malaysia nya udah digaga nyadika entaruh judi perintah enggau bakih Taib ba ikas Opis Menteri Pekara Wang Perintah Besai.
Bajet taun ke Bank Pembangunan nya manggai RM30billion, lalu duit ti ngemayuh nya ti patut diagihka ngagai projek-projek perengka diguna enggau pengawa pemansang beskala besai.
Duit jali ti diberi ngagai sida Taib sebilik nya, sebuah kompeni ti semina ba renggat sendirian berhad aja nya ngarika 6.6% ari ke semua bajet ungkup bank nya dipejalaika enggau nadai sebarang tuju ti menuku lalu mega nadai sebarang jamin sekuriti ti nyengala!
Enti kompeni nya puntan lalu bankrap, nama sekuriti ti deka dipinta bank ti nyali sida duit ngemayuh nya dikena bank ngarika rakyat menua Malaysia?
Atur pengawa ti enda betanggungpengawa ba atas duit enggi rakyat Malaysia
Diatu nyau datai ba maya ti chulup endur duit ti ngemayuh nya dibai pansut ari tabung awam menua Malaysia, lalu dipasukka dalam bank ti menua tasik ti enda ditemu dini endur, ti udah ngujungka Malaysia terengkah ba tangga ketiga pengabis tinggi ba pemansut duit rakyat ti enda temu penunga.
Mensia mayuh udah nemu ngelama tu pasal bala orang BN bebendar amat ngeruga tabung awam lalu deka ditabanka sida pansut laban nangika bepilihbesai tu ila enda ngarika sida.
Majalah ti tebilang ari menua US, Vanity Fair bisi nuliska artikel sida ti madahka mayuh agi reta tengkira di menua London nya dibeli bala orang ari menua Malaysia enggau ari Singapura kenyau ari 12 bulan tu udah, enti dibandingka enggau orang di Britain empu!
Enggau nya rakyat Malaysia patut bisi kuasa nemu pasal duit jali ti mayuh bendar nya disadang deka lenyau pia aja lebuh iya terengkah ba jari bala orang baka sida Taib Mahmud sebilik?
Rakyat Malaysia patut diberi jamin enti sema KP Mukah Development nya tak enda mukai-mukai nyadi bankrap, lalu Bank Pembangunan Malaysia Berhad nya patut bisi chara ti begerenti dikena sida ngambi pulai RM2billion nya!