Taib Mahmud suah bendar mansutka jaku ansak ti madahka besai bendar guna enti orang Sarawak ditejuka suntuk, laban sida deka meri terima kasih ke sebarang pemeri, taja pan rega pemeri nya enda besai.
Tu beguna bendar ke BN rambau bepilihbesai tu, laban BN tau majakka pengawa korup sida enggau chara meli undi ngena beberapa ringgit lalu udah nya ngena kuasa ti diberi rakyat nya dikena sida nginsap semua pengeraja asal di menua sida empu.
Tiong Thai King, siku kaban politik ti mega menyadi ke kroni penebang kayu batang ke Tiong Hiew King, diatu benung bejalaika pengawa korup rambau bepilihbesai tu, nitihka beberapa penerang ti diterima.
Iya bisi dipeda bejalai ngusung sekayu sitak Lanang besadungka RM300 ngagai bala pengundi iya lalu besemaya deka nembuka laluh RM700 dikena ngenyukupka RM1,000 enti iya menang ila.
Pengawa ti dikereja Thai King nya endang sebengkah penyalah ba undang-undang.
Penyampau nya endang amat besai taja pan Thai King enda kiruhka nya – undi-undi maya bepilihbesai dulu ari tu dibeli ngena rega RM10, tang penyampau ke sekali tu nya seratus kali lipat.
Tang tu ukai sebengkah tanda pementas ti baru ti deka diayanka tauke China nya, tang berupai agi nunjukka iya udah berasai takut lalu tentu deka ditumbangka enda lama agi!
Bejaga-jaga ari orang politik ti bependiau baka apek bayat
Taja pan Thai King besadungka duit ngagai bala pengundi iya mayuh agi ari gaji bulan ti diterima sida, bala pengundi patut mereti ke penyampau nya mimit, enti dibandingka enggau penguntung ti deka diulihka tauke nya ari sida udah iya menang ila.
Tauke-tauke kaya BN baka Tiong Thai King seruran ngumbai pengawa bebelika undi nyadika sebengkah pengawa beranakka puku, ti deka diambi sida pulai ba penyampau ti mayuh agi enggau chara ngerumpak pengeraja asal menua lalu ngeruga duit simpan awam ti udah ditagaka dikena mayar gaji ti tinggi agi ke bala pengereja pengawa, dikena ngaga rumah sekula ti manah-manah, genturung rumah ke rakyat, perengka pengintu pengerai enggau perengka perubat.
Undi majoriti ti ulih Thai King maya pengawa bepilihbesai ke sitak Lanang dulu suba iya nya 4,864, ti tentu begunaka iya nyediaka agih duit suap be penyampau RM5 juta.
Tang duit ti nyampau nya enda besai enti kitai mandingka enggau bebillion-billion ringgit ti deka diulihka iya enggau sida sebilik ari menua Sarawak nengah konsesyen-konsesyen kayu batang, pengawa muka kebun dandang besai sawit, kontrak-kontrak ti besai-besai, lalu diatu, lisin dikena ngulihka minyak ba darat ti terubah di Sarawak, ari Taib Mahmud!
Nginsap pengeraja asal menua Sarawak nyentukka pungkang
Indu kompeni sida Tiong sebilik, Rimbunan Hijau ti tebilang nya, ditumbuh bepelasarka pengawa ngerusak rampa kampung di Sarawak.
Tang diatu kompeni nya sebengkah ari mayuh bengkah kompeni ti pemadu besai di dunya, ti udah ngeruga pengidup orang bansa asal ngena pengawa kamah sida ba menua-menua baka di Indonesia, Papua New Guinea enggau Solomon Islands.
Gerempung anak kompeni ti mampang ari Rimbunan Hijau, baka Jaya Tiasa enggau Sibur Tiasa nya udah ngerusak rampa kampung ti besai bendar rampa di Sarawak lalu muka kebun dandang besai sawit ti mai penanggul ba pengidup raban bansa asal, ti nadai nerima sebarang penguntung ari pengawa “pemansang” perintah munyi ti suah ditebah-tebah bala menteri BN ngelama tu.
Terang bendar tanah kampung Rimbunan Hijau udah dibeli ari sida Taib sebilik, ti diterima sida ba rega ti mit bendar ari Opis Menteri Perambu Pengeraja Asal Menua ti betuaika Taib Mahmud empu lalu udah nya dijual ngagai sida Tiong sebilik dikena ngulihka untung bejuta-juta ringgit.
Pengadang sida Tiong sebilik bekaul enggau pengawa korup terang bendar nyadika sida nya sebengkah kroni ti besai guna ke sida Taib sebilik.
Tu nyadika ketegal ti terang nama kebuah Rimbunan Hijau udah diberi konsesyen terubah ngulihka minyak ba darat menua Sarawak ke beberapa taun ti deka datai. Orang ti bediri di belakang konsesyen tu lalu nyukung pengawa tu iya nya Taib Mahmud empu.
Semua pemeri beungkus bejuta-juta ringgit pulai ngagai sida Tiong sebilik, lalu besai bendar kebuah sida ngetanka kerusi Lanang lalu enda tau enda mengkang taluk ngagai Taib Mahmud.
Ba pengawa politik Thai King meri Taib ‘penaluk’ enggau duit politik dikena nentuka dagang sida sebilik mengkang beduduk enggau manah dikena ngulihka penguntung ti mayuh agi.
Rosebay Enterprise – baka ni Tiong ngeruga bala pengundi iya
Tang Thai King udah ngeruga bala pengundi iya empu.
Iya udah ngulihka pengaya enggau chara ngerampas tanah-tanah NCR enggi bala pengundi iya empu.
Kami minta bala pengundi iya ingatka cherita pasal kompeni Rosebay Enterprise ti kala ditusui kami taun nyin kemari.
Sepuluh buah rumah panjai di sepemanjai Sungai Pelugau udah ngelawa Thai King ti pengari sida, laban deka ngulihka bantu ngelaban sebuah kompeni ti nebang kampung sida.
Tang sida udah enda puas ati laban MP sida nya enggai mantu sida.
Lebuh bala orang rumah panjai nyau angkat ngelaban bala tukang tumbang, sekeda sida ditangkap lalu diemba polis. MP sida, Tiong Thai King, endang enda mantu sida.
Meda diri udah puntan nadai nerima sebarang sukung enggau bantu ari Tiong, bala orang rumah panjai lalu ngaga repot lalu mai kes nya ngagai kot ari bantu bala lawyer kuasa pengelantang mensia ari parti penyakal Pakatan Rakyat.
Lalu udah nya baru sida nemu kompeni Rosebay Enterprise nya endang enggi sida Tiong Thai King sebilik, ti udah bekerugaka rampa kampung sida ngelama tu!
Sarawak Report udah bejalaika pansik pasal sapa orang ti bempu kompeni Rosebay Enterprise, ti betuaika Thai King enggau menyadi iya Chiong Hee, ti sama ngena alamat ti sebaka. Kami tetemuka pemegai share dalam Rosebay Enterprise nya sebuah kompeni ti benama Palmgroup Holdings. Palmgroup diempu Thai King begulai enggau sebuah agi kompeni ti benama Fatherland Enterprise. Lalu kompeni Fatherland nya mega nyadika pemegai share begulai enggau dua iku agi menyadi Thai King iya nya Chiong Hee enggau Chiong Yong.
Bala orang bansa asal di sepemanjai Sungai Pelugau nadai kala dipadahka Taib Mahmud udah nyerahka tanah-tanah NCR ngagai jari MP sida.
Penyalah ngelanggar kuasa pengelantang mensia
Semua pengawa bejual-beli tanah enggau kampung di Sarawak endang bepelasarka chara ti suah dikena, ti endur pengeraja asal menua endang dikuasa perintah Taib enggau BN. Tang dalam repot Suhakam ti baru dikeluarka dulu ari tu dalam laman blog tu terang nunjukka chara-chara ti kamah nya majak dikereja Tiong Thai King ba bala pengundi iya.
Enggau nya, berapa rega semua tanah ti udah diambi Tiong ari bala pengundi iya? Enti dikira ngena rega baka ti dipinta petunggal Taib dalam video Global Witness, RM4,000 ke seeker, tanah NCR nya tau meri untung RM42,272,000 lebuh tanah-tanah di menua nya dibeli kompeni Rosebay Enterprise.
Tu mai reti, duit suap RM1,000 ke siti undi ari Tiong Thai King nya sebengkah rega ti mit. Iya ke bendar, Tiong agi berutang beribu kali lipat ba orang bansa asal di menua nya laban ti udah dirampas iya tanah adat sida!
Enggau nya, pemutus penemu kot udah ngarika bala orang bansa asal di Sungai Pelugau ti dituntung penanggul kena keruga tanah. Tang di menua Sarawak baka ti suah agi dikereja, terang bendar raban bansa asal ti udah tasah nya nadai bulih sebarang pampas ke pengerusak ba tanah sida enggau pengidup sida.
Ba maya ngundi tu, bala pengundi Tiong Thai King di sitak Lanang enda patut berasai salah lebuh sida nerima duit suap ari Tiong, laban duit suap nya nunjukka iya bisi pengingin ke tanah-tanah NCR sida, lalu nambah ke nya duit sebagi ti mimit bendar nya dikena iya mayar utang iya ba sida.
Enggau nya sida patut ngembuan runding ti panjai, sekali ke sida deka ngundi iya baru tauka enda. Enti BN majak ditejuka bekuasa, sida deka nentuka orang baka Tiong majak ngereja tanah orang bansa asal lalu tentu enda mulaika tanah nya, tauka mayar pampas ke tanah ti kena keruga sida nya. Bala orang bansa asal ba siti-siti endur patut berunding panjai-panjai ngelui ari penyuntuk ti diasaika sida ngelama tu, lalu sida nya ngundi ke rebak ti nangkan ke sida.
Semina enggau chara nukar perintah aja, lalu numbangka Taib Mahmud, deka nentuka komisyen tanah deka ngambi pulai rampa menua ngagai bala orang bansa asal ti endang bempu tanah-tanah nya.